APUNG ANYIM 20

Abraham naiuso Abimelek

1Abraham Mamre ainou soikü Kanan goumchi ajepekki nai khuküta Kades si Shur jetko kih. Atao intso noikütenai apa Gerar nai kihtsün taoko, 2apaüh apa tsammongnyiu Sara nung apa nio ta ngiom. Nungtiphe Gerar nokpao Abimeleküh apa meshen tsammong- nyiu ao theau apa dongai nialokü shi. 3Sotso Goa nou apa dongai meamean nai sungküta ngiom, “Ni eanao noin, tiautenai ni nung menyiu nou sau tsamsigoh yangankü noin nung jonlou.”

4Lüko Abimelek menyiu dongko shimkü moshikü noiküla, küta apaüh ngiom, “Apaou, ngo aphio tsüsun! Ni ngo naiuso jü khaiunia lomo-e süne? 5Abraham apa pemüh nung menyiu nou apa nio ta ngiom, naiuso nung nyiuhai nou lüko nungtilu ngiom, Ngü nung mongyang yanthsüokü nai chhin, naiuso ngo tsüthakü ti tsüchhi.”

6Goa nou meamean nai thalakü ngiom, “Ah, ni mongyang yanthsüokü nai chhin ta ngo ngeji; nungshioko ngo ni jü thako angei sunhetsün ainou lolaokü taiu, naiuso ni apa tü thantanao tsükiu. 7Lüko lo nyiuhai nou apa tsammongpo hau laokü lükiuwan. Apa e-po tsak noin, naiuso apaüh athaiutha misao saokiu-e, nungaito ni tsü-eane. Lüko ni nyiuhai nou laokü tsükiukü naito, ni naiuso akhaiuniaso chikü eanao noin ta ngo ni tü lotsüoji.”

8Nungthan nyap beta Abimeleküh apa khemko asonghoi chikü jon küta ti shithawaokü noiküla ngüso hau chiten, naiuso ngüso thsüokü hattat. 9Nungaih Abimeleküh Abraham jon küta sangh, “Ni sam tü ti chhin? Jü khaiuai naiuso jü nokshing khaiuai nung aküothe kanjikanao lümeikü ngo ni tü ti aphio chhin? Ni ngü tü chhitsünli to sauüh laitso tsüchhiela. 10Ni nung tiauta chhin?”

11Abrahamüh thalakü ngiom, “Nungai Goa asuhattsün tsaktso tsünoi-e küta ngüsoüh jü tsam- mongnyiu loao ngo loatte ta ngo yang. 12Apa atsüoting jünio noin, apa jüpo thso menyiuthso nou noin, lüko jü nyiu tsüde, naiuso ngo apa tsamsigoh yang. 13Nungtiphe tilai Goa nou ngo jüpo tsam ainou mesan goumchi nai hongan, ngo apa tü ngiom, Ngo adei ta khaiunia pungkü hau chitetsün shioko ni ngü tü titi ngiotsüo noin nung hanji.”

14Nungaih Abimeleküh Sara Abraham hau laokü kiu, nungko aikü apaüh apa hau thainian naiuso tsamki nouso kium. 15Apaüh Abraham tü ngiom, “Nung apem jü goh, ni tiai aiuji lükih.” 16Apaüh Sara tü ngiom, “Ngo adei hau tangkason ni aphio tsünoi ta niko hatsünso tü hanau mitha heng tsak kiuji, khaiunia pungkü nou ni aphio tsünoi ta nge-e.”

17-18Tiautenai Sara Abraham tsammongnyiu tü ti thawao, nyiuhai saulünou Abimelek tsamkhaiu ko methso tsühaao thaiutha nung Apaou nou shan. Nungtiphe Abrahamüh Abimelek thaiutha misao sao, naiuso Goa nou apa lomeikiu. Ngüsoüh methso epao thaiutha apaüh apa tsammongnyiu naiuso apa tsamki menyiuthso nouso lomeikiu.

Currently Selected:

APUNG ANYIM 20: KHIABSI

Highlight

Copy