ESTHER 5
5
Estherüh Nokpao si Haman Netü Sümai Nai Ha au Nyungji
1Apa keithon ajekhaiu samnyi nouko Estherüh nokpao tsam- mongnyiu shitho tholoküta khukü nokpao tsammong tsampai dongai sheilutkü tsakü noiküla. Nokpao nou apa noikham ainou koukhan tü kha sheilutkü moknoi. 2Tilai nokpao nou Esther kengchiai tsanoikü ep, nungai Estherüh nokpao atsüojinyang ep, naiuso nokpao nou apa chaiou lakkeng pailai nou Esther hau loksankiu. Nungai apa sungküta nung athon nai thalo. 3Nokpao nou sangkü ngiom, “Menyiu Nokpao Esther, titi?” “Ni ti aiuji, ngühau achite, jü nokshing apaitso lüko ngü nihau kiu-e.”
4Estherüh thalakü ngiom, “Nokpao ni mongchio naito ngo lüsoh athaiutha sümai tsak khemtsünko ni naiuso Haman aje jümesan the-iau aiuji.”
5Nungai Nokpao nou Haman tü liukü shiau ngiokhem kiu. Nung- tiphe nokpao si Haman ne Estherüh jontsün sümai nai khu. 6Naiuso nokpao nou thengshiukam taoko nai Esther tü sangkü ngiom, “ni ti aiuji ngü hau achite, naiuso nung ni eppe. Ni jünokshing apaitso thaiutha sanglüko, ngo ni kojatsün kiu-e.”
7Estherüh thalakü ngiom, 8“Ngü kojatsün kiuau Nokpao atsüojinyang noi naito, ni naiuso Haman aje ngo lühom athaiutha sümai tsak khemtsün nouko jü mesanau theau mongchioji. Nung taoko nai ngo ti aiuji nung ni hau chite-e.”
Hamanüh Mordekai Loatau Kausaiji
9Tilai Haman nung sümai wankü khu, apa mongmeikü naiuso mong- lingkü noiküla. Lüko nungtaoko apaüh Mordekai nokpao bekhan ai ep, naiuso tilai Mordekaiüh apa yanlükhun, nung taoko ti asuhat ii hankü tsüepsan, Haman apako thatü mongmatkü noiküla. 10Lüko apaüh meshen chija jeilokü tsamai khuwan. Nungai apaüh apa paiusihaiso apa tsamai jon naiuso apa tsammongnyiu Zeresh lüko kamhaau sangkü noiküla. 11Apaüh ngüso khako apa titi memei, apa thsoso piakü noitsün, nokpao nou apa noithang atsok nai titi kium, naiuso nokpao khemko asonghoi chikü khako apa titi atengting noin ta bülomkü hankü noiküla. 12“Loüh ti noishin,” ta Hamanüh tsülaokü chite, “Estherüh khemsantsün sümai nai nokpaoko aikü khuau ngütü simkü sautso khu- haau tsükiu, naiuso je loüh lühom lüko jonshikü noin. 13Nungti lüko Yihudahai nou Mordekai nokpao bekhan ko moknoitsün lektsoto nung chikü nou jü thaiutha ti tsüde.”
14Nungai apa tsammongnyiu si apa paiusihaisoüh apa hau ayam nungti hankü noiküla: “Mordekai loatkü phananau pai nou meter 22 tsokkü tiau tsüshan? Küta lühom ahom ni nokpao tü ngioküta Mordekai lüloatan-i nung phiai ni monglingkü sümai nai khuau shio-e.” Hamanüh nung mongthat amei tsak ta yang, nungtiphe apaüh nung pai nou kikü taiu.
Currently Selected:
ESTHER 5: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
