ESTHER 1
1
Nokpao Tsammongnyiu Vashtiüh Nokpao Ahasurus Lochi Lotsaoji
1-2Nokpao Ahasurus Persiahai noknio ateng Susa ko apa nokpao noikham ai noikü khiamkhan 127 khako India ainou Sudan saokü nokshingkü noiküla.
3Apa nokshing sampon nouko nai apaüh asonghoi naiuso nokpao nok- shinghoi chikü thaiutha sümai tsak shan. Persiahai si Mediahai süpaihoi loüh khiamkhan nai nokshingpaou nouso naiuso lengsiyahoi nouso kamhakü noiküla. 4Apa ün ajinka nokshing, jengtsaiu, akhengting asuhat naiuso nianlom nou alei louk thumkü hankü noiküla.
5Nungphiai, nokpao nou Susa noknio nai noitsün khaiunia memei si tsosilu chikü thaiutha sümai tsak shan. Nung sümai nokpao tsam aimongko anojet tsak thumkü noiküla. 6Nung Pemong nou paipun asangnya tsüdekünai athaio nou alengyam shanküta Marbel kheam nouso chiai ne ashethop nou tang- kason khiaptso nouso tü thsanlut. Chaiou lakkeng naiuso tangkason nou shantsün then nouso marbel nou shantsün kemongko taiu, asangnya naiuso anyaching nou nung chiai noiküla. 7Chaiou lakkeng thengkam nousoko theng nou kium, nungko thengkam nime lüko emekü tsünoiküla, naiuso nokpao nou theng mongchiokü senkü noiküla. 8Nungko athat ti tsüyangkü shiu-ikü noiküla; khaiunia pungkü ngüsoüh aiutsün litso shiuau nokpao nou nokpao tsamai ayathsüotsünso tü ngiokhem kiukü noiküla.
9Nungtaoko, nokpao tsam mongai Nokpao tsammongnyiu Vashtiüh menyiuhoi hau sümai tsak kiukü noiküla.
10Nokpao sümai chinyatnyi nouko nai nokpao nou theng shiuküta monglengkü iula, nungtiphe apaüh apa tengkhaiu ayathsüotsünso thsülemkü taiutsün ngüso khaiunia chinyat: Mehuman, Biztha, Harbona, Bigtha, Abagtha, Zethar naiuso Karkas so jonkü noiküla. 11Apaüh ngüsotü apa tsammongnyiu Vashti apa khaiu nai kandio keiloküta nialokü shiau ngiokhem kiu. Nung menyiu aleng ameiteng tsak noiküla, küta nokpao nou apa alengmei asonghoi nouso si apa mesanso chikü hau hanau mongchiokü noiküla. 12Lüko tilai ayathsüotsünsoüh Vashti hau nokpao nou ngiotsün chiten, menyiu nou ashiau tsümong- chio, nungüh nokpao mongmat sungikü noiküla.
13Nungaih nokpao saisileli kikiyamko aküo ngetsünso sauhaiüh ngiokhem ngen nungso ta mikhem kiuau sang. 14Nung ange khaiu- niahoi sauhai apaüh paikü ayamhan thaiutha kankeikü noitsün: Kar- shena, Shethar, Admatha, Tarshis Meres, naiuso Memukan nung Persea naiuso Mediahai asonghoi chinyat nouso apa nokshing nai asonghoi ongko atsokteng noikham nai noitsünso noiküla. 15Apaüh nung khaiunia nousotü ngiom, “Ngo, Nokpao Ahasurus yathsüotsünso athoiluttsün tsak hakü tsammong- nyiu Vashti dongai hongküla, naiuso apaüh nung chhiau tsüthalokü shanan! Samüh apa da ti chhiau ngiokhem nou ngioji?”
16Nungai Memukanüh Nokpao naiuso apa asonghoi khako nge-ikü ngiom, “Menyiu Vashtiüh nokpaolu tsüde lüko apa asonghoiso lüko lo- miamiu-atsüoting tünaito nokshing mongko noitsün khaiunia apem lochi-iu. 17Vashtiüh ti chhin nung lula naito menyiu pungkü nou meshen tsammongpo tü lonyapkü thapau yalou-e. Ngüsoüh ngio-e, ‘Nokpao Ahasurus tsammongnyiu Vashti tü apa dongai shiau jon, naiuso apaüh tsümongchiokü shanan.’ 18Tilai Persiahai si Mediahai nokpao khemko asonghoi nouso tsammong- nyiuüh nokpao tsammongnyiu saisile thaiutha lula-e, ngüsoüh ngüso tsammongpo hau nung ajekhaiukolu chite-e, naiuso ngüsoüh tsammongpo nouso ta ngüso tsammongnyiuso mongmate. 19Asuhatkü noitsün Nokpao nung potha naito, nokpao nou Vashti tilaitso nungphiai nokpao khako tsüshi-iau epung tsak ahong. Nung ngio nou Persia si Mediahai ngiokhemai tilaitso tsüli-eshi-iau satkü taiu au ngiokhem lükiu küta nung Menyiu Nokpao noikham nou menyiu amei ajantso hau lükiuwan. 20Tilai nung ngiokhem nou nokshing nou thapekkü ngelakü iula-e, menyiu pungkü nou momo tsammongpo memei lüko tsüdekünai tsosilu lüko wekü paotsangkü kankei-e.”
21Nokpao naiuso apa khemko asonghoi nousoüh nung mongyang mongchiokü noiküla, naiuso Memu- kanüh ayang kiutsün nung nokpao nou chhin. 22Nokpao khiamkhan pungkü dongai momo khiamkhan thsamsat saisile naiuso ngio ai satküta ngiongem kantsünso hongkü ngiom, tsammongpo pungkü apa tsamkhaiu ko Apaou naiuso apa da athonting oukong sonkü noi-e ta ngiokü noiküla.
Currently Selected:
ESTHER 1: KHIABSI
Highlight
Share
Copy
Want to have your highlights saved across all your devices? Sign up or sign in
Khiamnuingan Naga C.L. Bible - ASIO THSAMLAI
Copyright © 2005 by The Bible Society of India
Used by permission. All rights reserved worldwide.
