Romen 16

Konpliman Personnel

1Mon rekomann avek zot, Febe, nou ser ki travay koman en dyakones dan Legliz ki Sankre. 2Akey li byen, koman fodre resevwar en krwayan. Ed li dan tou fason ki i bezwen zot led, akoz i'n ed bokou dimoun, enkli mwan menm.

3Fer salanm Prisil ek Akila, mon bann koleg travay dan servis Zezi-Kri. 4Zot in riske zot prop lavi pour sov sa ki pour mwan. Pa zis mwan tousel ki rekonesan anver zot, me osi tou bann Legliz dan lemonn non-Zwif.

5Fer salanm osi Legliz ki reini dan zot lakaz. Fer salanm mon zanmi Epenet premye fri pour Kris dan provens Lazi. 6Fer salanm Mari ki'n donn bokou lapenn pour zot. 7Fer salanm Andronik ek Zinyas, mon bann fanmir ki ti ansanm avek mwan dan prizon. Zot ganny byen estimen parmi bann zapot e zot ti'n vin kretyen avan mwan. 8Fer salanm Anpliatis mon bon zanmi dan Senyer. 9Fer salanm Irben, nou koleg travay pour Kris, ek Stakis mon bon zanmi. 10Fer salanm Apeles, ki'n montre ki son lafwa dan Kris i solid. Fer salanm tou dimoun kot Aristobil. 11Fer salanm Herodyon, mon fanmir. Fer salanm tou dimoun kot Narsis ki'n aksepte Senyer. 12Fer salanm Trifenn ek Trifoz ki pe travay pour Senyer, ek mon bon zanmi Persid ki'n travay pour li. 13Fer salanm Rifis ki Senyer in swazi, ek son manman ki osi mon manman. 14Fer salanm Asenkrit, Flegon, Hermes, Patrobas, Hermas ek bann frer ki ansanm avek zot. 15Fer salanm Filolog ek Zili, Nere ek son ser Olenpas ek tou bann ki'n ganny apele pour Bondye, avek zot. 16Anbras kanmarad fraternelman. Tou bann Legliz Kris i fer zot salanm.

17Mon demann zot, frer ek ser, fer atansyon avek sa bann ki senm divizyon ek dezord kontrerman avek lansennyman ki zot in gannyen. Evit bann tel dimoun. 18Annefe, sa bann dimoun pa servi Kris, nou Senyer, me zot vant. Par zot bann zoli parol ek bann diskour flater, zot arive anbet dimoun ki lespri i senp.

19Annefe tou dimoun i konn zot lobeisans pour Senyer. Sa i fer mwan plezir. Me mon ti ava kontan ti zot vin pli saz pour fer sa ki byen; plis ankor, pour evit fer sa ki mal. 20Bondye, ki donn lape, ava byento kraz Satan anba zot lipye.

Lagras nou Senyer Zezi ava avek zot tou.

21Timote, mon koleg travay, i fer zot salanm, ensi ki Lisiis, Zason ek Sosipater, mon bann fanmir.

22Mwan, Tertiis ki'n ekri sa let, mon osi fer zot salanm dan Senyer ki gard nou ini ansanm. 23Gayis ki'n resevwar mwan se li, e kot Legliz i rasanble, i osi fer zot salanm. Erast, trezorye lavil, ek nou frer Kartis i fer zot salanm.

24Lagras nou Senyer Zezi ava avek zot tou. Amenn#16.24 Napa sa verse dan plizyer ansyen maniskri..

25Aprezan, annou rann glwar sa enn ki annan pouvwar pour rann zot for dapre Bonn Nouvel e dapre Zezi-Kri ki mon pe anonse, dapre revelasyon mister Bondye ki'n reste sekre pandan lontan. 26Me la aprezan, sa mister i'n ganny revele e anonse avek tou bann nasyon, par sa ki bann profet in ekri, dapre lord Bondye eternel, pour ki zot ariv dan lobeisans par lafwa. 27Nou rann glwar Bondye, ki sel i posed lasazes, par Zezi-Kri, pour touzour! Amenn.

Currently Selected:

Romen 16: BSK

Highlight

Copy