Psonm 99
99
Bondye I Lerwa
1SENYER i lerwa.
Bann pep! Tranble.
Son tronn i par lao bann seriben.
Later! Sekwe.
2SENYER i gran dan Zerizalenm;
i domin tou bann pep.
3Loue son non ki gran e formidab.
SENYER, i sen.
4Lafors en lerwa i dan lanmour
ki i annan pour lazistis.
Ou'n etabli ladrwatir, ou'n etabli lazistis.
Ou'n etabli ladrwatir ek lazistis dan Izrael.
5Loue SENYER, nou Bondye!
Ador li devan son tronn!
SENYER, i sen.
6Moiz ek Aaron ti parmi son bann pret.
Samyel osi ti parmi bann ki ti envok son non.
7I ti koz avek zot dan kolonn lafimen.
Zot ti gard son bann komannman
ek bann lalwa ki i ti'n donn zot.
8SENYER, nou Bondye!
Ou ti reponn ou pep.
Ou en Bondye ki ti pardonnen;
me ou ti osi pini zot pour zot bann fot.
9Proklanmen ki SENYER, nou Bondye i gran!
Prosternen devan son montanny sen,
akoz SENYER, nou Bondye i Sen.
Currently Selected:
Psonm 99: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
