Malasi 2
2
Profet I Averti bann Pret
1Bann pret! Aprezan, la sa ki mon ordonn zot: 2Si zot pa ekout mwan, e zot pa pran ka pour glorifye mon non dan sa ki zot fer, alor mon pou devers malediksyon lo zot, SENYER ki deklare. Mon pou sanz mon benediksyon an malediksyon. Annefe, mon'n fini modi zot, akoz zot pa pe pran mon lord aker. 3Mon pou pini zot desandans. Mon pou zet fimyen dan zot figir, fimyen ki zot anmennen pour sakrifis, e zot ava ganny anmase ansanm. 4Alor, zot ava konnen ki se mwan menm SENYER liniver ki'n anvoy sa lavertisman, pour ki mon lalyans avek desandans Levi i reste valab. 5Mon lalyans avek li, ti en lalyans lavi ek lape. Mon ti donn li pour zot ganny respe pour mwan e vreman onor mon non. 6I ti vreman transmet mon mesaz e i ti ansenny laverite. I ti mars avek mwan dan lape ek lwayote konplet; i ti ede pour fer bokou dimoun retourn lo bon semen. 7I devwar bann pret pour ansenny vre konnesans Bondye. Lepep i devre pran konsey avek zot pour konnen ki lalwa i dir, akoz se zot ki mesaze SENYER liniver.
8Me zot bann pret, zot pa'n swiv sa semen drwat; zot in fer bokou dimoun tonbe par zot lansennyman. Zot in detri lalyans avek Levi, SENYER liniver ki deklare. 9Alor, mon pou imilye zot e fer lepep mepriz zot, akoz mon volonte pa'n ganny swiv e zot bann desizyon pa ti touzour zis.
Lepep I Enfidel anver Bondye
10Nou tou, pa nou annan en sel papa, en sel Bondye ki'n kree nou? Alor, akoz nou tronp kanmarad e kas lalyans ki Bondye in fer avek nou bann zanset? 11Zida pa'n reste fidel anver Bondye. Zot in komet en akt degoutan dan pei antye e dan Zerizalenm. Zot in mank respe anver sanktyer ki SENYER i kontan. Zot in marye avek bann fanm etranze ki ador lezot bondye. 12Mon demande ki SENYER i detri sa zonm ki'n fer sa aksyon parmi pep Izrael, e nenport ki, menm sa enn ki anmenn en lofrann devan SENYER liniver.
13La ankor sa ki zot fer: Zot vin kouver lotel SENYER avek larm. Zot sanglote e fer gro tapaz, akoz i nepli pran ka, ni aksepte zot lofrann ki zot anmenn kot li. 14Zot demande: Akoz ki i nepli aksepte zot lofrann? SENYER i pa aksepte ou lofrann akoz i ti temwen promes fidelite ki ou ti fer avek ou premye fanm, dan ou zenes. Sa fanm ti ou konpanny ki osi ou fanm dapre sa ki ou'n promet. 15Bondye pa i'n fer zot en sel lekor e donn zot sa menm souf lavi? Son sel dezir se ki zot ganny zanfan ki vin vreman pep Bondye. Alor, fer atansyon ki personn pa kas promes fidelite ki i'n fer avek son fanm dan son zenes. 16Mon ay divors, SENYER Bondye Izrael i deklare. Mon pa kontan kan zot komet sa aksyon vyolan anver zot fanm, SENYER liniver i deklare. Alor, fer atansyon ki personn pa kas son promes fidelite.
Bondye I Anvoy Son Mesaze Anons Zour Zizman
17Zot in fatig SENYER avek zot bann koze. Pourtan, zot demande: Ki mannyer nou'n fatig li? Zot fatig li kan zot dir: SENYER i aksepte tou bann malfeter e i kontan zot. Oubyen kan zot demande: Oli sa Bondye ki fer lazistis?
Currently Selected:
Malasi 2: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
