Zenez 43

Zakob I Les Benzamen Al Lezip

1Lafanmin ti sever dan pei. 2Kan zot ti'n fini manz dible ki zot ti'n aste Lezip, zot papa ti dir zot, “Retournen, al aste ankor en pe manze pour nou.”

3Me Zida ti dir li, “Sa zonm ti averti nou: Mon pa pou aksepte resevwar zot si zot frer pa avek zot. 4Si ou deside anvoy nou frer avek nou, nou ava desann e al aste manze pour ou. 5Si ou pa les li vin avek nou, nou pa pou ale, akoz sa zonm ti fer byen kler avek nou: Mon pa pou resevwar zot, amwen ki zot frer i avek zot.”

6Izrael ti dir, “Akoz zot in tret mwan konmsa e dir sa zonm ki zot annan en lot frer?” 7Zot ti reponn, “Sa zonm ti kestyonn nou lo nou menm e lo nou fanmir. I ti demann nou: Eski zot papa i ankor vivan? Eski zot annan en lot frer? Nou ti reponn son bann kestyon. Eski nou ti kapab mazinen ki i ti pou dir: Anmenn zot frer isi?”

8Zida ti dir Izrael, son papa, “Les Benzamen vin avek mwan. Nou bezwen ale pour ki nou reste vivan e pa mor, ou menm, nou ek nou bann zanfan. 9Mon ava responsab pour li. Si mon pa retourn avek li e met li devan ou, mon ava koupab devan ou pour sa fot pour touzour. 10Si nou pa ti'n tarde, nou ti ava'n fini fer en dezyenm vwayaz.”

11Alor, Izrael, zot papa, ti dir zot, “Fer sa ki neseser: Pran en pe meyer prodwi sa pei met dan zot sak, e anmenn koman en kado pour sa zonm: En pe lesans, en pe dimyel, zepis, pistas ek zamann. 12Anmenn doub larzan ki neseser avek zot. Retourn sa larzan ki ti dan zot sak. Petet zot in tronpe. 13Pran osi zot frer e retourn kot sa zonm. 14Mon swete ki Bondye Toupwisan i tous leker sa zonm e ki i ava pran pitye pour zot. I ava les zot lot frer ek Benzamen retournen. Kanta mwan, si fodre perdi ankor mon bann zanfan, i ava konmsi mon ti napa zot.”

Zozef I Fer Lafet pour Son bann Frer

15Alor, zot ti pran sa bann kado, zot ti anmenn doub kantite larzan avek zot, ansanm avek Benzamen. Zot ti desann Lezip e al prezant zot devan Zozef.

16Kan Zozef ti war Benzamen avek zot, i ti dir son administrater, “Anmenn sa bann zonm kot mwan, touy en zannimo, prepar li pour zot, akoz zot pou manz avek mwan midi.”

17Sa zonm ti fer parey Zozef ti'n ordonn li, e i ti anmenn zot kot Zozef.

18Ler sa bann zonm ti ganny anmennen dan lakaz Zozef, zot ti per. Zot ti dir, “Akoz sa larzan ki zot ti remet dan nou sak premye fwa, ki nou pe ganny anmennen dan son lakaz. Zot pou profite pour atrap nou e fer nou lesklav ansanm avek nou bann bourik.”

19Alor, zot ti al kot administrater ki ansarz lakaz Zozef pour koz avek li devan laport. 20Zot ti dir li, “Eskize, mon senyer, nou ti vin isi en premye fwa pour aste manze. 21Ler nou ti arete pour kanpe e ouver nou sak, nou ti war tou nou larzan dan sakenn nou sak. Alor nou'n retourn avek sa larzan. 22Nou'n osi anmenn ankor larzan pour aste manze. Nou pa konnen lekel ki ti met nou larzan dan nou sak.”

23Sa serviter ti reponn, “Reste trankil, pa bezwen per. Se ou Bondye e Bondye ou papa ki'n met en trezor dan zot sak. Mon'n resevwar zot larzan.” Apre, sa serviter ti anmenn Simeon kot zot.

24I ti anmenn sa bann zonm dan lakaz Zozef. I ti donn zot delo e zot ti lav zot lipye. I ti osi donn manze zot bourik. 25Zot ti prepar zot kado letan zot ti pe esper Zozef, akoz zot ti'n aprann ki zot ti pou manz la.

26Kan Zozef ti ariv se li, zot ti donn li kado ki zot ti'n anmenn dan lakaz, e zot ti prosternen devan li lafas ater. 27I ti demann zot, zot nouvel. I ti demande, “Eski zot vye papa ki zot ti mansyonnen, i byen? Eski i ankor vivan?”

28Zot ti reponn, “Ou serviter, nou papa i byen e i ankor vivan.” Zot ti bese e prosternen.

29Zozef ti lev lizye e i ti war son frer, Benzamen, garson son manman. I ti dir, “Eski li menm zot pli zenn frer ki zot ti mansyonnen? Bondye ava beni ou mon garson!”

30Zozef pa ti kapab tenir, son leker ti gro; i ti anvi plere; i ti sorti deswit. I ti al dan son lasanm prive kot i ti plere. 31Apre, i ti lav son figir e sorti. I ti kontrol son lemosyon. I ti dir, “Servi manze.”

32Zot ti servi Zozef apar, e son bann frer separe. Bann Ezipsyen ki ti la avek li, zot osi zot ti manz separe, akoz bann Ezipsyen pa manz avek bann Ebre. Annefe, pour bann Ezipsyen, sa i en keksoz degoutan. 33Bann frer Zozef ti asiz devan li, lene dapre son drwa premye garson e apre, bann ki pli zenn dapre laz. Sa bann zonm ti regard kanmarad avek letonnman. 34Zozef ti fer servi zot porsyon manze ki sorti lo son latab. Porsyon ki Benzamen ti gannyen ti senk fwa plis ki pour lezot. Alor, zot ti bwar diven avek li ziska zot ti soule.

Currently Selected:

Zenez 43: BSK

Highlight

Copy