Akt de Zapot 5

Ananyas ek Safira

1Me ti annan en zonm ki ti apel Ananyas. Avek son fanm Safira, zot ti vann zot propriyete. 2Ananyas ti tonm dakor avek son fanm pou gard en parti larzan. I ti al remet leres avek bann zapot. 3Pyer ti dir li, “Ananyas! Akoz ou'n les Satan pran kontrol ou leker? Ou'n koz manti avek Lespri Sen, an gardan en parti larzan ki ou'n gannyen pour sa propriyete. 4Avan ki ou ti vann li, sa propriyete ti pour ou, e apre ki ou ti'n vann li, larzan ki ou ti'n gannyen ti pour ou. Akoz alor, ki ou'n deside dan ou leker pour fer en tel aksyon? Pa avek zonm ki ou'n manti, me avek Bondye.”

5Koman Ananyas ti antann sa bann parol, i ti tonm sek ater e i ti mor. Tou sa ki ti antann sa ki ti'n arive avek li ti ranpli avek lafreyer. 6Bann zennzan ti vini, anvlop son lekor e anmenn li pour al antere.

7Anviron trwa erdtan plitar, son fanm ti traverse, me san konnen sa ki ti'n arive. 8Pyer ti demann li, “Dir mwan, eski pour tan, ki zot in vann zot propriyete?”

I ti reponn, “Wi, pour sanmenm sa pri.”

9Alor Pyer ti dir li, “Koman zot in kapab deside ansanm pour teste Lespri Senyer? Ekoute, sa bann zonm ki'n anter ou mari in deza arive; zot lanmenm deor, e zot ava anmenn ou osi.”

10Deswit Safira ti tonm ater lanmenm dan lipye Pyer e i ti mor. Kan sa bann zennzan ti retournen, zot ti war li mor. Alor, zot ti anmenn li e anter li akote son mari.

11Legliz antye ek tou bann dimoun ki ti antann sa, ti ganny en gran lafreyer.

En Kantite Siny ek Mirak

12Bann zapot ti fer en kantite siny ek mirak parmi lepep. Bann krwayan ti reini ansanm dan Arkad Salomon. 13Me personn parmi lezot, pa ti oze zwenn avek zot, menm si lepep ti pe dir dibyen lo zot. 14Pli ale, en pli gran kantite dimoun, zonm ek fanm, ti krwar dan Senyer. 15Zot ti anmenn bann malad dan semen e depoz zot lo lanmak ek nat. Konmsa, kan Pyer ava pase, son lonbraz ava kouver enn ou lot parmi zot.

16En gran lafoul ti osi sorti dan bann lavil otour Zerizalenm. Zot ti anmenn bann malad, ek bann ki ti pe ganny tourmante par bann move lespri. Zot tou, zot ti ganny geri.

Bann Zapot I Ganny Persekite

17Alor, Gran-Pret ek tou bann ki ti avek li, setadir bann manm parti Sadiseen, ti ranpli avek zalouzi anver bann zapot. 18Zot ti fer aret bann zapot e devan tou dimoun, met zot dan prizon. 19Me pandan lannwit, en lanz Senyer ti ouver laport prizon e fer bann zapot sorti. I ti dir zot, 20“Ale! Met zot debout dan Tanp e anons lepep sa mesaz konsernan sa nouvo Lavi.”

21Kan zot ti'n antann sa, zot ti al dan Tanp granmaten e konmans ansennyen.

Kan Gran-Pret avek son lantouraz ti arive, zot ti konvok Konsey ek Lasanble bann ansyen dan pep Izrael. Zot ti anvoy sers bann zapot dan prizon. 22Me kan bann gard ti ariv dan prizon, zot pa ti war bann zapot. La rapor ki zot ti al fer devan konsey: 23Nou'n war prizon byen fermen e bann gardyen dan zot plas. Me kan nou'n ouver laport, nou pa'n war personn anndan.

24Kan komandan ki ansarz Tanp ek bann gran-pret ti antann sa bann parol, zot ti byen etonnen e zot pa ti konnen koman pour eksplik disparisyon bann zapot.

25Plitar, en zonm ti antre e dir avek zot, “Sa bann zonm ki zot ti met dan prizon, pe ansennyen dan Tanp.”

26Alor, sa komandan avek son bann gard ti al sers zot. Me zot pa ti servi lafors, akoz zot ti per ki lepep ti ava kapab saboul zot avek ros.

27Zot ti fer bann zapot antre, fer zot pas devan Konsey. Gran-Pret ti kestyonn zot, 28“Pa nou ti'n defann zot strikteman koz ankor lo sa non? La zot in fann zot lansennyman dan Zerizalenm antye, e zot oule met responsabilite lanmor sa zonm lo nou.”

29Pyer avek lezot zapot ti reponn, “Nou devre obei Bondye plito ki zonm. 30Bondye nou bann zanset in resisit sa Zezi ki zot, zot in met anmor lo lakrwa. 31Bondye in elev li lo son kote drwat e i'n etabli li koman Sef ek Sover pour donn pep Izrael lokazyon pour sanz zot lavi e resevwar pardon zot pese. 32Nou, nou temwen sa bann levennman, ensi ki Lespri Sen ki Bondye in donn bann ki obei li.”

33Ler zot ti antann sa, bann manm Konsey ti pran en gran lakoler. Zot ti deside pour touy bann zapot. 34Me enn parmi zot, en Farizyen ki ti apel Gamalyel#5.34 Gamalyel ti enn bann gran profeser Zwif. I ti manm Konsey siperyer, oubyen Sannedren. (War 22.3.), en profeser Lalwa, byen estimen, ti debout devan Konsey. I ti demande pour fer bann zapot sorti. 35I ti dir avek Konsey, “Mon bann zanmi Izraelit! Fer byen atansyon sa ki zot oule fer avek sa bann zonm. 36Pa tro lontan, Tedas ki ti pretann i ti en zonm enportan, ti aparet. I ti menm annan apepre 400 zonm avek li. Me ler zot ti touy li, tou bann ki ti avek li ti fannen e sa mouvman ti disparet.

37Apre li, pandan lepok resansman, ti annan Zida, sa Galileen. I ti reisi ganny en gran lafoul pou swiv li. Me li osi, i ti ganny touye e tou bann ki ti swiv li ti disperse.

38Alor, mon dir zot ozordi: Pa bezwen pran ka avek sa bann zonm; les zot trankil. Si se zonm ki deryer sa plan ek travay ki zot pe fer, i pou disparet par li menm. 39Me si sa i travay Bondye, zot pa pou kapab detri li. Fer atansyon ki zot pa pe lager kont Bondye.”

Zot ti aksepte konsey Gamalyel.

40Zot ti rapel bann zapot, fer fwet zot, e donn zot lord pour pa koz ankor lo non Zezi. Apre sa, zot ti les zot ale.

41Bann zapot ti kit lasal Konsey, byen kontan, ki zot ti'n ganny konsidere diny pour ganny maltrete pour sa non Zezi. 42Tou le zour dan Tanp e dan bann lakaz, zot ti kontinyen ansennyen e anons Bonn Nouvel Zezi koman Mesi.

Currently Selected:

Akt de Zapot 5: BSK

Highlight

Copy