Akt de Zapot 10
10
Pyer ek Korney
1Ti annan en zonm dan Sezare ki ti apel Korney. I ti en kaptenn dan larme Romen, dan Reziman Italyen. 2Sa zonm ki ti annan respe pour Bondye, ti byen relizye. Avek son fanmir, i ti touzour priy Bondye. I ti fer bokou lomonn bann pov parmi pep Zwif e priye regilyerman.
3En zour, ver 3 er apremidi, i ti ganny en vizyon. I ti war byen klerman en lanz Bondye antre se li. Sa lanz ti dir li, “Korney!”
4I ti get lanz avek lafreyer. I ti dir, “Ki i annan Senyer?”
Lanz ti reponn li, “Bondye in ekout ou bann lapriyer e in war ou bann lomonn anver bann pov. I pa'n oubliy ou. 5Aprezan, anvoy detrwa zonm Zope pour al sers en serten Simon ki osi apel Pyer. 6I pe reste kot en travayer lapo ki apel Simon e ki reste dan en lakaz lo bor lanmer.”
7Kan lanz ki ti'n fek koz avek li ti'n ale, Korney ti apel de parmi son bann serviter ek en solda byen relizye ki ti dan son servis depi lontan. 8I ti rakont zot tou sa ki ti'n arive. Apre, i ti anvoy zot Zope.
9Lannmen, ver midi, letan zot ti pe vwayaze e pe apros Zope, Pyer ti mont lo twa lakaz pour priye. 10I ti lafen e i ti anvi manze. Pandan ki zot ti pe prepar manze pour li, i ti ganny en vizyon. 11I ti war lesyel ouver e en lobze ti desann. Sa lobze ti resanble en gran nap atase par son kat kwen e desann ziska ater. 12Ladan, ti annan tou kalite zannimo kat lapat, reptil, ek toudsort kalite zwazo. 13En lavwa ti dir li: Pyer! Leve, touye e manze.
14Me Pyer ti reponn, “Non Senyer! Zanmen mon'n manz nanryen ki enpir#10.14 War Lev 11.1-47. Ez 4.14.”.
15Sa lavwa ti dir li ankor: Pa bezwen apel enpir, sa ki Bondye in deklar pir.
16Sa ti ariv pandan trwa fwa, e apre, sa lobze ti remont dan lesyel.
17Pyer ti demann son lekor, ki sinifikasyon sa vizyon ki i ti'n gannyen.
Pandan sa letan, bann zonm ki Korney ti'n anvoye, ti arive devan laport, pour demande kote Simon i reste. 18Zot ti lev lavwa e demande, “Lanmenm kot Simon ki osi apel Pyer i reste?”
19Pyer ti ankor pe reflesi lo sinifikasyon sa vizyon, kan Lespri ti dir li, “Ekoute! I annan isi trwa zonm ki pe rod ou. 20Leve! Desann, e al avek zot san ezite, akoz mwan menm ki'n anvoy zot.”
21Alor, Pyer ti desann kot sa bann zonm. I ti dir zot, “Mwan menm sa dimoun ki zot pe rode. Ki rezon ki'n anmenn zot isi?”
22Zot ti reponn, “Nou'n vin isi anvoye par Korney, en kaptenn dan larme Romen, en zonm zis, ki annan respe pour Bondye. Tou bann Zwif i annan bokou lestim pour li. En lanz Bondye in ordonn li pour anvoy sers ou pour li ekout sa ki ou annan pour dir.”
23Pyer ti akey zot koman son bann envite. Zot ti pas lannwit la.
Lannmen, Pyer ti leve e al avek zot. Detrwa bann frer krwayan dan Zope ti akonpanny li. 24Son lannmen, zot ti ariv Sezare. Korney ti pe esper zot avek tou bann manm son fanmir ek zanmi entim ki i ti'n envite. 25Kan Pyer ti arive, Korney ti vin zwenn li e i ti tonm ater devan son lipye avek gran respe. 26Me Pyer ti fer li leve. I ti dir li, “Leve! Mwan osi mon zis en zonm.”
27Pandan ki i ti pe kontinyen koz avek Korney, i ti antre dan lakaz, kot en kantite dimoun ti'n rasanble. 28I ti dir zot, “Zot konnen ki en Zwif pa devret frekant en etranze, oubyen antre dan son lakaz. Me Bondye in montre mwan ki mon pa devret konsider personn koman enpir. 29Pour sa rezon, kan ou ti apel mwan, mon pa'n refize vini. Alor mon ti ava kontan konnen akoz ou'n fer apel mwan.”
30Korney ti reponn, “I annan trwa zour, apepre sa ler, mon ti pe priye ver 3 er apremidi, parey labitid. Toutakou, mon ti war en zonm dan en lenz blan, klate, debout devan mwan. 31I ti dir mwan: Korney! Bondye in antann ou lapriyer e i pa'n oubliy ou bann lomonn. 32Alor, anvoy detrwa zonm Zope pour al sers Simon, nonmen Pyer. I pe reste dan lakaz Simon, en travayer lapo, ki reste obor lanmer.
33Deswit mon'n anvoy dimoun sers ou, e ou'n aksepte vini. Aprezan, nou'n rasanble devan Bondye pour ekout mesaz ki Senyer in ordonn ou pour dir nou.”
Diskour Pyer dan Lakaz Korney
34Pyer ti pran laparol. I ti dir, “Aprezan, mon vreman konpran ki Bondye pa fer preferans pour personn, 35me dan nenport ki nasyon, tou dimoun ki annan respe pour li e ki fer sa ki byen, Bondye i kontan zot. 36Zot konnen ki Bondye in anvoy son mesaz pour pep Izrael pour anons Bonn Nouvel lape par Zezi-Kri; li menm ki Senyer pour tou dimoun.
37Zot konnen ki, apre batenm ki Zan ti prese, sa mesaz i'n ganny proklanmen atraver Zide antye, konmansan par Galile.
38Zot konnen koman Bondye ti konsakre Zezi ki sorti Nazaret avek pouvwar son Lespri Sen. Zot osi konnen koman Zezi, partou kot i ti ale, ti fer dibyen e geri tou bann dimoun ki ti anba pouvwar dyab, akoz Bondye ti avek li.
39E nou, nou temwen tou sa ki i'n fer dan pei bann Zwif e dan Zerizalenm. I ti ganny touye, kloute lo en lakrwa. 40Me Bondye ti resisit li trwazyenm zour, e fer li aparet 41non pa avek tou dimoun, me avek nou ki Bondye in swazir davans koman son bann temwen. Nou'n manze e bwar ansanm avek li apre ki Bondye ti'n resisit li#10.41 War 1.4; Lk 24.30.42.. 42I'n ordonn nou prese e anons avek lepep ki se li menm ki Bondye in etabli pour ziz bann vivan ek bann mor. 43Tou bann profet in koz lo li. Zot in dir ki sa enn ki krwar dan li pou ganny pardon son bann pese par pouvwar son non.”
Bann Non-Zwif I Resevwar Lespri Sen
44Pandan ki Pyer ti pe koze, Lespri Sen ti desann lo tou sa bann dimoun ki ti la pe ekout Laparol. 45Bann krwayan Zwif ki ti'n vin akonpanny Pyer ti byen etonnen pou war ki Bondye ti'n devers son Lespri Sen lo bann non-Zwif osi. 46Zot ti pe koz dan bann lalang etranze e rann glwar Bondye.
47Alor, Pyer ti dir, “Eski nou kapab refize batiz sa bann dimoun avek delo, alor ki zot in fini resevwar Lespri Sen parey nou?”
48I ti donn lord batiz zot lo non Zezi-Kri. Alor, zot ti envit Pyer pour reste ankor detrwa zour avek zot.
Currently Selected:
Akt de Zapot 10: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
