Filipyen 3

Vre Lazistis devan Bondye

1Aprezan, mon bann frer ek ser! Mon dir zot, rezoui zot ini avek Senyer. I pa deranz mwan pour repet sa ki mon'n deza ekri; pour zot, i bon fer li.

2Fer atansyon sa bann malfeter, sa bann move zouvriye ki parey bann lisyen; sa bann zouvriye ki donn tro lenportans lo sirkonsizyon. 3Nou ki'n resevwar vre sirkonsizyon, akoz nou ador Bondye par son Lespri e nou met nou lafyerte dan Zezi-Kri. Nou konfyans pa baz lo bann privilez imen. 4Pourtan, mon ti ava'n kapab reklanm sa bann privilez. Mon annan rezon pour fer li, plis ki zot: 5Mon ti ganny sirkonsi kan mon ti annan wit zour. Mon en vre Izraelit par nesans, mon sorti dan tribi Benzamen. Mon en vre Ebre e mon bann zanset, zot Ebre. Mon ti pratik Lalwa Zwif, koman en bon Farizyen. 6Mon ti telman fanatik, ki mon ti en persekiter Legliz#3.6 War Akt 8.3; 22.4; 26.9-11.. Pour sa ki konsernan lobeisans Lalwa, mon ti san repros.

7Me tou sa bann kalite ki mon ti war koman en gen pour mwan, aprezan, mon konsider zot koman en pert akoz Kris. 8Wi! Mon menm konsider tou keksoz koman en pert, konpare avek sa byen ki bokou pli siperyer: konnesans Zezi-Kri mon Senyer. Pour li, mon pa'n rod okenn avantaz personnel. Mon konsider tousala koman salte, pour mwan ganny Kris, 9e vin konpletman ini avek li. Pa lobeisans Lalwa ki rann mwan zis, me lafwa dan Kris. Bondye ki rann mwan zis e i rann zis sa enn ki krwar dan li.

10Annefe, tou sa ki mon dezire, se konn Kris ek pwisans son rezireksyon; partisip dan son bann soufrans, pour vin parey li dan son lanmor, 11avek lespwar ki mwan osi, mon ava resisite parmi bann mor.

Taye pour Ganny En Pri

12Mon pa pretann ki mon'n fini ariv lo sa bit, oubyen ki mon'n deza vin parfe. Me mon fons annavan pour esey sezi sa pri, akoz mwan osi, mon'n ganny sezi par Zezi-Kri.

13Mon bann frer ek ser! Mon pa dir ki mon'n fini ganny sa pri, me mon fer en sel keksoz: Mon oubliy tou sa ki deryer mwan, e mon fer tou pour ganny sa ki devan mwan. 14Mon taye pour mwan ariv lo bit, pour ganny sa pri ki Bondye, par Zezi-Kri, in apel nou pour resevwar depi lao.

15Nou tou ki adilt spirityelman, annou adopte sa menm preokipasyon. Me sa enn ki annan en lot lopinyon, Bondye ava ekler li lo sa size. 16An tou ka, annou kontinyen avans dan sa direksyon ki nou'n pran ziska prezan.

17Mon bann frer ek ser! Imit mwan zot tou. Nou'n donn legzanp. Alor, annou gard nou lizye lo sa bann ki swiv sa legzanp. 18Souvan mon'n dir zot, e la mon repet an pleran: Bokou pe viv en lavi koman lennmi lakrwa Kris. 19Zot pe al ver zot prop pert. Zot vant i zot bondye; zot fyer pour sa ki ti devre fer zot onte; zot mazin zis bann keksoz materyel.

20Me nou, nou bann sitwayen lesyel, ki pe esper avek enpasyans nou Sover, Senyer Zezi-Kri ki pou retournen sorti dan lesyel. 21Par sa pwisans ki met tou keksoz anba son lotorite, i pou transform nou lekor feb pour fer li vin parey son lekor glorye.

Currently Selected:

Filipyen 3: BSK

Highlight

Copy