Zenez 8
8
Noe I Sorti dan Lars
1Bondye ti mazin Noe ek tou bann zannimo sovaz ek zannimo domestik ki ti avek li dan lars. I ti fer en divan soufle lo later e delo ti konmans desann. 2Bann sours delo souteren ti aret koule e bann lafnet dan lesyel ti fermen, lapli ti arete. 3Delo ti desann gradyelman. Apre 150 zour, delo ti'n diminyen. 4Lo disetyenm zour, setyenm mwan, lars ti swe lo enn bann montanny Ararat. 5Delo ti kontinyen desann ziska dizyenm mwan e lo premye zour dizyenm mwan, bann latet montanny ti aparet.
6Apre 40 zour, Noe ti ouver en lafnet ki i ti'n mete dan lars. 7I ti larg en korbo ki ti ale vini, ziska ki delo ti'n sek lo later. 8Apre, Noe ti larg en pizon pour verifye si delo ti'n sek lo later. 9Me sa pizon pa ti war landrwa pour li apoze, akoz ti ankor annan delo partou lo later. Alor, i ti retourn kot Noe dan lars. Noe ti met son lanmen deor e fer li antre. 10Noe ti esper ankor set zour e i ti larg sa pizon ankor en fwa. 11Aswar, sa pizon ti retournen avek en brans zoliv ver dan son labek. Alor, Noe ti konnen ki delo ti'n desann. 12I ti esper ankor set zour pour li larg en lot pizon ki pa ti retournen.
13Lannen ki Noe ti ganny 601 an, lo premye zour premye mwan, delo ti'n fini sek lo later. Noe ti tir kouvertir lo lars e i ti war ki later ti'n sek. 14Lo vennsetyenm zour, dezyenm mwan, later ti'n konpletman sek.
15Alor, Bondye ti dir Noe, 16“Sorti dan lars avek ou fanm, ou bann garson ek fanm ou bann garson. 17Fer sorti tou bann diferan lespes zannimo ki avek ou, bann zwazo ek tou bann pti bebet, pour ki zot ava reprodwir partou lo later e ranpli later.”
18Alor, Noe ti sorti dan lars avek son bann garson, son fanm ek bann fanm son bann garson. 19Tou zannimo, tou zwazo ek pti bebet, ti sorti par group.
Noe I Ofer En Sakrifis
20Noe ti fer en lotel pour SENYER. I ti pran enn parmi bann zannimo pir ek en zwazo pir e i ti ofer koman en sakrifis konplet lo sa lotel. 21Loder son sakrifis ti fer plezir SENYER ki ti dir dan li menm: Mon pa pou zanmen modi later ankor akoz bann et imen. I vre ki depi son lazenes, leker zonm i move. Zanmen ankor mon pou detri bann vivan parey mon'n fer.
22Tan ki later i egziste,
pou annan en sezon pour plante e enn pour rekolte.
Pou annan letan lafreser ek letan lasaler,
sezon lete ek sezon liver,
lizour ek lannwit.
Sa pa pou zanmen arete.
Currently Selected:
Zenez 8: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
