Akt de Zapot 6
6
Set Zonm pour Ed bann Zapot
1Pandan sa bann letan, koman lakantite disip ti'n ogmante, ti annan konplent ant bann Zwif ki koz Grek ek bann Zwif ki koz Ebre. Bann Zwif ki koz Grek ti plennyen an dizan ki zot bann vev ti pe ganny neglize dan distribisyon manze. 2Alor, bann zapot ti konvok tou bann krwayan. Zot ti dir, “I pa byen ki nou aret pres Parol Bondye pour nou okip bann zafer manze. 3Alor, mon bann frer! Swazir set zonm parmi zot, ki annan bon repitasyon, ranpli avek Lespri Sen e bokou lasazes. Nou, nou ava donn zot sa responsabilite. 4Konmsa, nou ava kapab kontinyen konsakre tou nou letan dan lapriyer e lanons Laparol.”
5Sa propozisyon ti fer plezir tou dimoun. Zot ti swazir, Etyenn, en zonm ranpli avek lafwa ek Lespri Sen, Filip, Prokor, Nikanor, Timon, Parmenas ek Nikola, en konverti sorti Antyos. 6Zot ti prezant sa bann zonm devan bann zapot ki ti priy avek zot e enpoz lanmen lo zot.
7Parol Bondye ti kontinyen fannen; lakantite disip ti ogmant vit dan Zerizalenm. En gran kantite pret ti aksepte krwar dan Zezi.
Etyenn I Ganny Arete
8Etyenn, en zonm ki ti ranpli avek lagras ek lafors, ti pe fer en kantite siny ek gran mirak parmi lepep.
9Me ti annan serten zonm ki ti opoz li. Zot ti bann manm en sinagog ki zot ti apel bann “Libere”. Ti osi annan bann Zwif sorti Sirenn ek Aleksandri. Serten ti sorti Silisi ek provens Lazi. Zot ti vin diskit avek Etyenn.
10Me Etyenn, ranpli avek Lespri Sen ti koz avek lasazes e zot pa ti kapab reponn son largiman. 11Alor, an sekre, zot ti pey serten zonm pour dir: Nou'n antann li pe koz kont Moiz e kont Bondye.
12Konmsa, zot ti reisi eksit lepep, bann ansyen ek bann profeser Lalwa. Zot ti vin kot Etyenn, sezi li e anmenn li devan Konsey siperyer. 13La, zot ti anmenn serten dimoun ki ti fer bann fo lakizasyon kont li. Zot ti dir: Sa zonm i toultan pe koz kont nou Tanp sen ek Lalwa. 14Nou'n antann li dir ki Zezi ki sorti Nazaret, pou detri Tanp e sanz bann koutim ki Moiz in donn nou.
15Tou bann manm Konsey ti fikse Etyenn e zot ti war son figir vin parey pour en lanz.
Currently Selected:
Akt de Zapot 6: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
