2 Makabe 6
6
Bann Zwif I Ganny Persekite akoz Zot Lafwa
(1 Mak 1.41-64)
1En pe letan apre, lerwa ti anvoy Zeront, en Atenyen, pour fors bann Zwif abandonn koutim zot bann zanset e aret viv anba Lalwa Bondye. 2I ti osi ganny lord pour profann tanp Zerizalenm e dedye li anver Zeous Olenpyen, bondye Grek. Kanta tanp ki lo montanny Garizim, i ava ganny dedye anver Zeous, bondye lospitalite. Zabitan sa rezyon ki ti'n demann sa.
3Sa bann mezir ti tre dir e ensiportab pour popilasyon antye. 4Annefe, tanp ti'n vin en landrwa ranpli avek toudsort aksyon imoral: Bann non-Zwif ti menm anmize e fer aksyon seksyel avek bann prostitye dan bann lakour sakre. Anplis, zot ti anmenn dan tanp, bann keksoz ki lalwa i defann. 5Lotel ti kouver avek bann lofrann degoutan ki Lalwa ti enterdi. 6Lepep ti napa drwa obzerv saba, ni bann lafet dapre koutim zot zanset, ni menm dir ki zot Zwif.
7Tou le mwan, bann Zwif ti forse partisip dan selebrasyon avek repa rityel pour lanniverser lerwa. A lokazyon lafet Dionisos, zot ti forse met kouronn lalyann e fer laprosesyon an loner sa bondye. 8Lo sizesyon bann zabitan lavil Ptolemais, en lalwa ti ganny pibliye: Bann lavil Grek ki pros avek Zide i devre adopte menm politik anver bann Zwif e obliz zot partisip dan sa bann repa rityel. 9Bann ki ti refize adopte bann koutim Grek, ti devre ganny touye. Ti fasil alor, prevwar maler ki ti pe al tonm lo zot.
10Konmsa ki de fanm ti ganny arete akoz zot ti'n sirkonsi zot zanfan. Zot ti ganny parade atraver lavil avek zot pti baba anpandan avek zot tete. Apre, zot ti ganny anmennen lo miray e zet anba.
11Ti annan en group Zwif ki ti'n rasanble sekretman dan en kavern pre avek lavil pour selebre saba. Serten dimoun ti denons zot avek Filip. Zot tou, zot ti ganny brile ansanm. Par respe pour sa zour tre sen, zot ti refize defann zot lekor.
Sinifikasyon Sa bann Soufrans
12Mon demann bann lekter pour pa les zot ganny dekouraze par sa bann maler. Plito, war sa bann soufrans koman en leson pour disiplin nou pep, pa pou detrir zot. 13Annefe, i en siny gran labonte kan bann ki revolte i ganny pini toudswit, olye fer zot esper tro lontan. 14Me pour lezot nasyon, Senyer i pran pasyans avan pini zot, ziska ki zot in komet plis pese posib. Me avek nou, i pa azir dan sa fason. 15I pa les nou ariv ziska lo dernyen moman, pour li pini nou. 16Alor, i pa zanmen priv nou son labonte. Menm si i disiplin nou avek lasoufrans, i pa zanmen abandonn nou.
17Sa ki mon'n dir i servi zis koman en rapel. Nou bezwen kontinyen avek nou zistwar.
Martir Eleazar
18Eleazar, en vye zonm byen respekte parmi bann skrib, ti ganny forse ouver son labous pour fer li manz lavyann pork#6.18 War Lev 11.7-8.. 19I ti prefere mor dan loner, plito ki viv dan laont: I ti kras sa morso lavyann e mont li menm lo sa siplis larou. 20I ti kras sa ki ti dan son labous koman en dimoun kouraze i devre fer: Refize manz keksoz ki Lalwa i enterdi, menm pour lanmour son lavi.
21Bann ki ti prezid sa bann repa sakrifisyel ki Lalwa i enterdi, ti konn Eleazar depi lontan. Zot ti pran li alekar, e konsey li anmenn son lavyann ki i kapab manze, e ki li menm i'n prepare. I ti ava zis fer sanblan manz lavyann ki lerwa in ordonnen. 22Si i ti fer konmsa, i ti ava evit lanmor e ganny trete avek bonte, gras a sa lanmitye ki egziste ant zot depi lontan.
23Me Eleazar, koman en vyeyar ki ti annan bokou loner, ti pran en desizyon nob ki fer loner son seve blan ek son kondwit egzanpler. Annefe, depi son lanfans, in viv dan lobeisans Lalwa sen ki Bondye in etabli. Alor, i ti demande ki zot anvoy li deswit dan lemonn lanmor. 24I ti dir, “En zonm dan mon laz pa kapab fer ipokrit. Bann zennzan ava krwar ki a laz 90 an, mon'n deside swiv en larelizyon etranze. 25Akoz mon move legzanp, zot ava osi les zot ganny tronpe. Mwan, mon ava viv ankor en pti pe letan anplis. Me mon ava fini mon vye zour dan laont ek dezoner. 26Menm si pour lemoman mon ava evit pinisyon zonm, vivan oubyen mor, mon pa pou sape dan lanmen Bondye Toupwisan.
27Alor, mon'n pare pour mor aprezan, e montre ki mon diny mon vye laz. 28Konmsa, mon ava les en legzanp avek lazenes: Mon ava'n montre zot koman swazir volonterman en lanmor nob par respe pour Lalwa Bondye.”
Apre sa bann parol, i ti mars dwrat kot siplis larou. 29Sa bann ki ti pe anmenn li, ti deswit sanz zot mannyer fer anver li: Pa tro lontan avan, zot ti bon anver li. Aprezan zot pe mal azir anver li, akoz zot ti pran son parol koman parol en fou. 30Zis avan i ti mor anba bann kou, i ti dir avek en gran soupir, “Senyer! Ou ki konn tou! Menm si mon ti ava kapab sov lanmor, mon pe sibir sa soufrans terib anba sa bann kou kriyel lo mon lekor. Me dan mon lespri, mon soufer avek lazwa, akoz mon annan respe pour ou.”
31Konmsa ki Eleazar ti mor. Son lanmor ti en legzanp, en kouraz remarkab pour bann zenn, ensi ki pour son nasyon antye.
Currently Selected:
2 Makabe 6: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.