2 Makabe 14
14
Alkim I Koz Kont Zida
(1 Mak 7.1-38)
1Trwa an plitar, Zida ek son bann zonm ti aprann ki Demetriis, garson Selekis ti'n antre dan por Tripoli avek en gran larme ek en laflot bato. 2Dapre sa rapor, i ti'n touy lerwa Antyokis ek Lisyas, son titer e i ti'n pran pei.
3En serten Alkim, Gran-Pret oparavan, ti'n rann li enpir volonterman pandan revolt bann Zwif. I ti realize ki pour li, ti napa sans dan okenn fason retournen, e ki bann Zwif pa ti pou les li ankor apros lotel ki'n ganny konsakre pour Bondye. 4Alor, ver lannen 151#14.4 Savedir lannen 161 avan Zezi-Kri., i ti al kot Demetriis e donn li en kouronn annor, en brans palm ek bann brans pye zoliv, parey i koutim servi dan tanp. Me sa zour, i pa ti fer mansyon rezon son vizit.
5I ti rod en bon lokazyon pour realiz son proze fou: Sa ti arive kan Demetriis ti apel li pour demann li santiman ek lentansyon bann Zwif. Alor, Alkim ti reponn li, 6“Parmi bann Zwif i annan en group ki apel Hasideen#14.6 War 1 Mak 2.42., ki anba Zida Makabe. Zot touzour pre pou fer lager oubyen pour fer lepep revolte. Zot ti anpese ki i annan lape dan rwayonm. 7Akoz zot, mon ti perdi mon fonksyon erediter, setadir Gran-Pret. Pour sa rezon ki mon'n vin isi ozordi.
8Avan tou, mon vreman annan en gran lentere pour lerwa. Me mon osi annan konsiderasyon pour mon bann konpatriyot. Annefe, lafoli bann dimoun ki mon'n fek mansyonnen, in anmenn lasoufrans lo nou pep antye. 9Alor, mon demann son Mazeste fer en lanket detaye lo sa zafer. Ou bon anver tou dimoun. Alor, montre ou labonte pour nou pei ek nou pep ki pe ganny menase par tou kote. 10Annefe, tan ki Zida i vivan, leta pa pou zanmen konnen kisisa lape.”
11Kan Alkim ti'n fini koze, bann zanmi lerwa, ki ti osi kont bann aktivite Zida, ti eksit lakoler Demetriis plis ankor. 12I ti deswit apwent Nikanor, ki ti sef bann ki konbat lo lelefan, gouverner Zide, kot i ti anvoy li. 13I ti donn li lord touy Zida e sas bann ki lo son kote. I ti osi donn lord pour remet Alkim dan son fonksyon Gran-Pret dan tanp ki pli enportan dan lemonn. 14Alor, bann etranze dan Zide ki ti'n sove devan Zida, ti zwenn an gran kantite dan larme Nikanor. Annefe, zot ti pe mazinen ki bann malsans ek maler ki pe esper bann Zwif ava profit zot.
Nikanor I Fer Lape avek Zida
15Bann Zwif ti antann sa nouvel ki Nikanor pe vini, e ki bann etranze ti'n rasanble pour atak zot. Alor, zot ti senm lasann lo zot latet e priy sa Enn ki'n etabli son pep pour touzour e ki touzour pe protez son prop leritaz par bann aksyon merveye. 16Anba komannman Zida, zot sef, zot ti deswit sorti kont lennmi e atak zot dan konba pre avek vilaz Hadasa. 17Simon, frer Zida, ti deza pe konbat Nikanor, me lennmi ti'n ariv tro vit, e i ti bezwen rekile.
18Sepandan, Nikanor ki ti'n antann koz lo kouraz Zida ek son bann solda dan batay pour zot pei, ti ezite pour kontiny lager. 19Alor, i ti anvoy Posidoniis, Teodot ek Matatyas pour fer lape avek Zida.
20Apre ki zot ti'n byen konsider bann propozisyon, Zida ti met son bann zonm okouran lo bann kondisyon. Zot tou, zot ti dakor pour aksepte en lalyans. 21Alor, bann sef ti fikse en zour pour zot zwenn ansanm. En kales lager ti sorti dan sak kote larme e zot ti enstal bann plas pour bann ofisyel. 22Anka ki lennmi ti ava tant en move kou, Zida ti pozisyonn bann zonm arme lo alert dan bann landrwa stratezik. Me rankont ant sa de sef ti pas trankilman.
23Answit, Nikanor ti reste en pe letan Zerizalenm. I pa ti fer nanryen dezagreab. I ti menm ranvoy se zot, bann etranze ki ti'n rasanble otour li. 24I ti gard Zida pre avek li, akoz i ti annan en lanmitye pour li. 25I ti ankouraz Zida pour marye e fond en fanmir. Zida ti marye e i ti konmans en lavi trankil.
Nikanor I Tourn kont Zida
26Me kan Alkim ti remarke ki relasyon Zida ek Nikanor ti tre bon, i ti pran en kopi sa lalyans ki ti'n ganny fer e anmenn kot Demetriis. I ti dir li ki Nikanor ti annan plan kont Leta, akoz in apwent Zida, en tret anver rwayonm, pour vin son sikseser.
27Sa fo lakizasyon par sa zonm fou, ti fer lerwa pran en gran lakoler. I ti ekri Nikanor pour fer li konnen ki i pa aksepte sa lakor avek Zida; ki i ordonn li aret Zida Makabe e anvoy li koman prizonnyen Antyos san tarde.
28Ler i ti ganny sa mesaz, Nikanor ti trouble. I ti sagren ki i ti pou bezwen anil lakor avek en zonm ki pa'n fer nanryen mal. 29Me i pa ti posib opoz desizyon lerwa. Alor, i ti vey en bon lokazyon pour met an plas en stratezi.
30Me Zida Makabe ti remarke ki Nikanor ti fre avek li: I ti mwen zantiy ki labitid. I ti konpran ki sa latitid ti anons problenm. Alor, i ti ralye en kantite son bann zanmi e al kasyet pour li sap Nikanor.
31Kan Nikanor ti realize ki sa zonm ti'n pli malen ki li, i ti al dan tanp ki pli sen omonn, ler bann pret ti pe ofer sakrifis parey labitid. I ti donn lord livre li Zida. 32Me bann pret ti fer serman ki zot pa ti konnen kot sa zonm ti ete. 33Alor, Nikanor ti lev son lanmen drwat ver sanktyer e fer sa serman:
“Si zot pa livre Zida avek mwan koman en prizonnyen, mon pou aplati sa tanp zot Bondye, kraz lotel e met dan sa lanplasman en zoli tanp an loner Dionisos.”
34Apre sa, i ti ale. Me bann pret ti lev lanmen ver lesyel e enplor sa enn ki'n touzour konbat pour nou pep. Zot ti dir, 35“Senyer! Ou pa bezwen nanryen. me ou'n aksepte konstri sa tanp, pour ou manifeste ou prezans parmi nou. 36Senyer! Ou ki posed tou sentete, prezerv pour touzour kont okenn profanasyon, ou tanp ki nou fek pirifye#14.36 War 10.1-8..”
Lanmor Razis
37Parmi bann ansyen Zerizalenm, ti annan en serten zonm apele Razis, ki ti ganny denonse avek Nikanor. I ti en zonm ki ti'n fer bokou dibyen e son bann konpatriyot ki kontan li. Zot ti apel li papa bann Zwif. 38O konmansman larevolt, i ti'n deza ganny akize konmkwa i ti swiv bann koutim Zwif. I ti menm riske son lavi pour defann son bann krwayans.
39Pour montre koman i ti deteste bann Zwif, Nikanor ti anvoy plis ki 500 zonm pour aret Razis. 40Annefe, i ti krwar ki si i ti fer sa zonm disparet, sa ti ava fer bokou ditor bann Zwif.
41Bann zonm ti pre pour pran tour kot Razis ti ete. Zot ti pe defons laport antre dan lakour; lord ti'n fini ganny donnen pour met dife e bril laport. Ler Razis ti war ki i ti'n fini ganny anserkle par tou kote, i ti zet li lo son prop lepe. 42I ti prefere mor avek loner, plito ki tonm dan lanmen bann kriminel e ganny trete avek mepri. Sa ti pou kontrer avek son lorizin nob.
43Me devan danze, i ti rat son kou. Pandan ki bann zonm ti pe fons anndan, avek kouraz, i ti grenp anler lo miray e sot anba dan lafoul. 44Me lafoul ti rekile vitman e Razis ti tonm anba dan sa lespas vid. 45I ti ankor vivan. Ranpli avek kouraz i ti leve. Kouver avek disan ki ti pe devide dan son bann blesir, i ti tay atraver lafoul e anfen, grenp lo en glasi anpant.
46I ti'n deza perdi preski tou son disan. Avek son de lanmen, i ti tir son trip ki i ti balans dan lafoul. I ti mor an priyan Senyer ki Met lavi ek lespri, pour ki i redonn li en zour lavi ek lespri. Konmsa ki Razis ti mor.
Currently Selected:
2 Makabe 14: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.