1 Makabe 16
16
Zan I Sas Sendebis
1Zan, garson Simon ti monte, sorti Gezer. I ti rakont son papa sa ki Sendebis ti'n fer. 2Alor, Simon ti apel son de lene garson, Zida ek Zan. I ti dir zot, “Mon bann frer, mwan ek lafanmir mon papa, nou'n konbat bann lennmi Izrael depi nou zenes ziska ozordi. Bann zafer ti dan nou lanmen e nou'n arive delivre Izrael plizyer fwa. 3Aprezan, mon'n vye. Me zot, avek sekour lesyel, zot in vin adilt. Pran mon plas ek plas mon frer. Ale! Al lager pour nou nasyon, e sekour sorti dan lesyel ava avek zot.”
4Alor, Zan ti swazir dan pei 20,000 solda apye ek kavalri. Zot ti sorti kont Sendebis. Zot ti pas lannwit Modin. 5Byen granmaten, zot ti avans dan laplenn. En gran larme solda apye ti vin zwenn zot. Sa de larme ti separe par en pti larivyer. 6Zan ek son larme ti pozisyonn zot vizavi lennmi. I ti remarke ki son bann solda ti per pour travers larivyer. Alor, i ti travers an premye. Ler son troup ti war sa, zot ti travers larivyer deryer li.
7Apre, i ti diviz son larme e pozisyonn son kavalri dan milye troup apye, akoz ti annan bokou kavalri lennmi. 8Zot ti soufle bann tronpet pour donn sinyal latak. Sendebis ek son larme ti ganny bate. En kantite ti ganny blese e tonbe; leres ti sov dan fortifikasyon Kedronn.
9Zida, frer Zan, ti'n ganny blese, me Zan ti pourswiv Sendebis ziska Kedronn, lavil ki Sendebis ti'n rekonstri. 10Serten ti al kasyet dan bann tour dan laplenn Asdod e Zan ti met dife dan sa lavil; lennmi ti perdi 2,000 zonm. Answit, Zan ti retourn Zide sen e sof.
Simon I Ganny Asasinen
11Ptoleme, garson Aboubos, ti'n ganny apwente gouverner laplenn Zeriko. I ti posed bokou larzan ek lor, 12akoz i ti zann Gran-Pret Simon. 13I ti'n vin orgeye e i ti anvi pran kontrol pei antye. I ti konmans fer plan pour elimin Simon ek son bann garson.
14Simon ti pe vizit bann lavil dan pei, pour li konn zot bann bezwen. I ti ariv Zeriko avek son bann garson Zida ek Matatyas, dan lannen 177#16.14 Savedir an Fevriye lannen 134 avan Zezi-Kri., onzyenm mwan, ki mwan Sebat.
15Garson Aboubos ti resevwar zot dan en pti fortifikasyon ki ti apel Dok, ki i ti'n fer konstri. I ti prepar en gran repa pour zot. Me i ti'n kasyet bann zonm dan fortifikasyon. 16Kan Simon ek son bann garson ti'n byen bwar, Ptoleme ek son bann zonm ti leve e pran zot zarm. Zot ti sot lo Simon dan lasal kot zot ti pe manze. Zot ti touy li, son de garson, e serten parmi son bann serviter. 17Par sa gran akt traizon, Ptoleme ti rann dimal pour dibyen.
Zan I Siksed Simon
18Apre, Ptoleme ti ekri en rapor lo sa ki i ti'n fer e anvoy kot lerwa Antyokis avek en mesaz. I ti demann li bann troup an ranfor, pour ed li pran bann lavil ek pei pour lerwa. 19I ti anvoy lezot zonm Gezer pour touy Zan. I ti anvoy let kot bann zofisye larme pour zot zwenn avek li. I ti promet zot larzan, lor ek kado. 20I ti osi anvoy troup pour pran posesyon Zerizalenm ek montanny sanktyer.
21Me en dimoun ti tay devan pour raport avek Zan ki ti Gezer, ki son papa ek son bann frer ti'n ganny asasinen. I ti azoute, “Ptoleme in anvoy bann zonm pour touy ou osi.”
22Sa nouvel ti sok Zan. I ti atrap sa bann zonm ki ti'n vin pour touy li e i ti masakre zot.
23Leres bann aksyon Zan, son bann konba ek lezot brav aksyon, bann miray fortifikasyon ki i'n konstri, tou sa ki i ti antreprann 24in ganny ekri depi letan ki i ti ranplas son papa koman Gran-Pret.
Currently Selected:
1 Makabe 16: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.