ZEFANIA 3
3
Jerusalem Amünyi ko Akhümcho
1Jerusalem, achangba, abürü nyitsarü nyüpmüsehba yangdi, ahohah! 2Abinü Abüdongba te yocho mühnyirü ko thsingyucho mükhyüchore. Abüdongba chah mülonglang mahkhang Abi arüku müching. 3Abi adirüti tsü kangdi kyo rengre; abi yukharü tsü nyangnyü khüu chii arühlungrü mii müpehjüba amünyo rangfü kyole. 4Azikehrü tsü longmülangba ko akihyochürü; bebürünü Amüsa tsü münyijüre ko arühbürü tsanung phi Tsingrangba yuzeng khyümüla bichire. 5Ta Abüdongba tsü yangdila lile; Abinü khodesü amüthsalang münguchire. Nyangnyü mükhu müyurü khyang mütiphehpü yuje hirojüre. Ta amümüsarünü mütozah amütsa nguchire ko müshahre.
6 Abüdongba-nü yore, “Ihnü alimih apüm wohpehko; Ihnü arüh yangditi thsangnyangjücho ko arüh tbü ko roshengvi khülusohko. Yangdi tsishoko; yanglong adeng, süsü mühle. 7Hütsükhang, I müyurünü I jengreng drünung ko I thsingyucho nyinung ko I docho arühnü khodesü münbüchünungepü Ihnü lümcho. Ta tunyah müli amüngu roh-i arühnü amütsa du bichicho.
8“Abüdongba-nü yocho, “Ying, Ihnü yuchoti mülangjüba nengdang ying. I rihlong zii arüh khyang müdhesohnung yuchoti ko yangditi nübülungnung Ihnü dhrongchehko. I rihlong michangnü lihküp changjünung.
9“Hütsüde Ihnü yuchoti thsamülajünung, ko I chah khu aparü tsingrang te müdangkhidangnangsohnung. Arüh atümungnü Iyu nyinung. 10Ashula liba Ethiopia la tsipitsiza liba I nyitsarünü I khyang amübü hirojünung. 11Hütsütade, nührü I müyurünü Ih nyümcho nengdang müshahsohnung. Amüthseh ko ahongzi atümung Ihnü khyümüinung ko I Amüsa khang chah nührünü khodesü Ih nyüm müyanung. 12Hütsüla alonglüm ko aküna nyitsarü I arüku yangchirü lisohnung. 13#Mis 14.5Amütrüh Israelrü sütesü amütsa münguchinung, arahkheh müchonung, mahkhang kihyochünung mümüküpnung. Arüh süsü müdrüpü müwajü khümcho linung.”
Akünyang Khi
14Israelrü, akünyangnü züde khi thsaang!
Jerusalem! Nü lasih apümnü künyang!
15 Abüdongba-nü nü akhingchi changkajüko;
Abinü nü rorüh apüm khyükhujüko.
Abüdongba Israel Tsingrang nührü te lile;
adelü tu adrünung mühle.
16“Zion yangdi, tüdrü!
Nü kheh tükyah pü arühnü
Jerusalem te yonung nyümong role.
17 Abüdongba Tsingrang nührü te lile;
Abi ziinü akoh jüre.
Abüdongba-nü nü chah künyangnung,
ko Abi amüila nü khyang akang asi jünung.
18Nyitsarünü thsütila künyangcho kyo
Abinü nü khyanglangnü khi thsanung ko künyangnung.”
Abüdongba-nü yore,
“Ihnü nührü chokehchola ko ashah khyümüijüko.
19Bekhyah tsü tsehle!
Nüh sehchirü Ihnü khingchinung,
Jahloh-hilohrü khümchonung
ko yangpirü noronung.
Arüh ashah khyünü adhichi kangsohnung,
ko lihküprünü arüh senung.
20Bekhyah tsü tsehle!
Tsisho liba müyurü Ihnü noronung;
limih la Ihnü nüh anengkhong kangsohnung
ko nüh thali müwajünung.”
Abüdongba-nü choko.
Currently Selected:
ZEFANIA 3: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
