ZEKARIA 7
7
Laayü Kongcho Mülangjücho
1Darius yangthsapü kang müyüu, choo düku (Kislev choo) amüyüu nyümong, Abüdongba-nü I khyang yusi hi jücho.
2Bethelrünü Sharezer ko Rezemelek ko arüh nyitsarü Akohba Abüdongba Amübükuh lang amüwa chingnung 3ko bebürü ko azikehrü te hi tsingdhingnung müthehcho: “Amübükuh thsangnyangcho nengdang, kang hitoi Ihsanü nguchi rocho roh-i, choo müngau tsü Ihsanü mütozah kongnung do?”
4Ih yang roba Abüdongba yusi tsü hi. 5Abinü yocho, “Arühnü kang nyühre choo amüngau ko dhünyeh-ula kongnü me traba tsü I jengrengjo nguchicho mah pü alih la müyurü ko bebürü te young. 6Ko arühnü tsuba ko yongba tsü, arüh longnyüpnung nengdang du thsacho.”
7Jerusalem rii jode ko arüh yangdi mükang lijengcho du mah, ta adesü kihjing lahpi ko nyüzüdu lang azong jingdümpi nyitsarünü jeng li bekhyah, Abüdongba-nü müngulang azikehrü khu yocho.
Yocho mühnyicho Khu Yangtsinung Kangcho
8 Abüdongba-nü Zekaria khyang yusi hi jücho: 9“Akhudinü I nyitsarü khyang yuzeng hi jücho: ‘Yuje yu khaang, palu jünirü te amüi ko yanglilüm ngung. 10Chomirü, mürürü, shirü mahkhang ailümrü tüsehchi; ko sünü lasiking la ajünirü nyüm rah tükülüp.’
11“Ta I müyurütinü mühnyinung hongzire. Arühnü arüh lasiking khangtire ko arüh lasiking lung roh-i müküpre. 12Tunüo papade Ihnü azikehrü khu müthehba adoba tsü arühnü mühnyire, Ih dee wahpehko. 13Ihnü yode arühnü mühnyichonü, arühnü kihchide Ihnü mülalingcho. 14Tsingxinyübong roh-i arüh limih palang linung Ihnü fopehcho. Hiba alih asu hi süsü mülipü naying pehjücho.”
Currently Selected:
ZEKARIA 7: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
