ZEKARIA 2
2
Akihsing Müngucheh
1Ihnü nyüh khüdu akheh la akihsing bipü müngucheh khüdu ngucho. 2Ihnü tsingcho, “Nüh khüde würo?”
Abinü lalingcho, “Jerusalem kidhingnung, athsenglang ko adilang khütoinang dhingnung.”
3Hütsüde Ite chota yaba ninglang riwüba tsü shehkhucho, ko apa riwürü khüdu abi shirünung rocho. 4Akhuba tsünü akhüu te yocho, “Jerusalem la nyitsarü ko kanglungrü drongranunge ko arüh mütbütilongnungepü shangwü akihsing biba dhrezaba te tsü young. 5Yangdi khümchonung apu tsü michang tbü kangnung ko hütsüla abi ahechi apüm linungepü Abüdongba-nü yore.”
Yangtsirü Thalinung Dsicho
6 Abüdongba-nü müyurü te yocho, “Ihnü apümlang nührü tsishosohcho. 7Ta ade, nührü yangtsirü, Babylon lanü tsichehng ko Jerusalem lang thalieng. 8Khürünü nührü chah khehthakhang Iyo thsidi chah thahpüre.”
Hütsüeko Akohbong Abüdongba-nü Abi müyurü kengchorü yuchoti yang hiba yusi te Ih müthehcho: 9“Abüdongba apunü nührü nyüm yanung ko, khüdupi nührü yurü thsaba nyitsarünü nührü kengcho khyünung.”
Hi tikehde, Akohbong Abüdongba-nü Ih müthehchoepü atümungnü müdhenung. 10Abüdongba-nü yocho, “Jerusalemrü, akünyangnü khi thsaang! Ih nührü yola linung rore!”
11Hütsüde yucho adrong Abüdongba yang ronung ko Abi nyitsarü kangnung. Abi nührü yola linung, ko Abinü Ih nührü yang müthehchoepü nührünü müdhenung. 12Thali Juda tsü Abi Amüsa lih la Abüdongba yo atsauba kangnung, ko Jerusalem tsü apüm yola abinü müiba yangdi kangnung.
13Atümungnü Abüdongba bete sahmüthsa lieng, tunüo Abi Amüsa alichahnü rore.
Currently Selected:
ZEKARIA 2: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
