LUK 17
17
Amünyi
(Mat 18.6-7, 21-22; Mrk 9.42)
1Jisu-nü amonoti te yocho, “Nyitsarü amünyi shitpahsohnung nguchi tsü roriri; ta sü khu hütsüri rosohro, abi nengdang khütoh-i adrünung! 2Hiri azarüti yola khüdu dusü müthikehsohnung tenülü hong la lung arangcheh xohchingpü kihdi la dhiyohchücho abi nengdang atsau. 3#Mat 18.15Hütsüeko nührünü tu nguchiro müzahmükieng!
“Nü jünirünü amünyi shitpahkhang, abi yübüching, ko abinü lasih thsamülakhang, abi khyang mülang pehjüng. 4Abinü nyümong khüdula dhünyehpi nüh nyüm amünyi shitpahkhang, ko hütsü müipi abinü nü yanglang ro, Ih lasih thsamülarepü yokhang, nühnü abi mülang pehjübae.”
Yudsi
5Riwürüti tsünü Abüdongba te yocho, “Ihrü yudsi disohng.”
6Abüdongba-nü lalingcho, “Nührü yudsi xehnyitse toh-i dusü likhang, nührünü hiba singdong te, ‘Nü jangjang aranü rohchehpü kihdi la tsü nü jangjang khyüm’ pü yonung ko hütsünü nührü yu nyinung.
Kulirü Nguchi
7“Adüzünü nührü luh yuthsahrü mahkhang san nyahrü kulirü khüdu lile. Khode abi jangshi lungnang, nühnü abi te, zah ro yangtsung pü yorü mah-o? 8Hütsüta müthsare! Ta nühnü abi te ‘Ih yangtsunung rungnümjüng, ko nü jengki khyüpü Ih müyangtsukade chixieng; hütsüpü nüh yangtsung pü yore.’ 9Yocho nyicho ngang kulirünü nengse ngunung müdekheng. 10Hütsü roh-i, nührünüsü, nührü te yocho apüm nguchipü khanglang hita young, ‘Ihrü amüdekheng kulirüti; ihrü ajehcho nguchi du nguchiko.’ ”
Jisu-nü Nyüh Dhüre Kyangjüre
11Jisu-nü Jerusalem lang züdude, abinü Samaria ko Galil kahla lurü bong tsicho. 12Ko abi yang khüdula züdude, mübhira kehrü nyüh dhüre ro abi shirücho. Arühnü ashula yapü 13züdenü yocho, “Jisu, athsingyurü! Ihrü te müing!”
14 #
Lev 14.1-32
Jisu-nü arüh ngude yocho, “Wüng ko nührü jangjang bebürü khyang dhingsohng.”
Arüh wüyade arüh müsachehkhangcho.#17.14: Müsachehkhangcho: Luk. 5.12 tsü dhing. 15Arüh yola nyüh khüdunü abi kyangcho ngu yuva amülahnü Tsingrangba nengse thalicho. 16Abinü Jisu jingchah mükhukeh anengse jücho. Abi tsü Samariarü thsacho. 17Hütsüde Jisu-nü yocho, “Nyüh dhüre müsachehjücho mahrü do? Aparü dükulü khülo? 18Khütacho yangpirü khüdu hivi dunü thali ro Tsingrangba khyang anengse jünung kangcho?” 19Ko Jisu-nü abi te yocho, “Shemüsung ko wüng; nü yudsinü nüh kyangjüko.”
Tsingrangba Yanglih Roba
(Mat 24.23-28, 37-41)
20Farisirü khürünü Jisu te Tsingrangba Yanglih tsü khode ronungpü tsingdhingcho. Abinü lalingcho, “Tsingrangba Yanglih tsü ngunü mürore. 21Sünüsü, ‘Dhing, hila lile! Mahkhang, hütsüla lile’ pü müyonung; tunüo Tsingrangba yanglih tsü nührü yola lile.”
22Hütsüpü abinü amonoti te yocho, “Nührünü Nyitsarü Tsurü nyümongti yola khüdu ngunyünung bekhyah ronung, ta nührünü hütsü müngunung. 23Ko arühnü nührü te, ‘Hila dhing! Mahkhang, hütsüla dhing’ pü yonung. Ta hütsü dhingnung tüwü. 24Ningmülanü ning khüulang mülachonü khüulang chihcho kyo, Nyitsarü Tsurü abi nyümongla hütsü roh-i linung. 25Ta akhudi abi dee chongchabae ko hiba shang nyitsarünü abi mükhyüchonung. 26#Lip 6.5-8Noa chiichah roh-i Nyitsarü Tsurü nyümong lasü hütsüta linung. 27#Lip 7.6-24Noa Singkong la züdu nyümong yingcheh, ko kihmülüm ro arüh atümung changkhang, arüh atümungnü tsunü ko yongnü ko khingkurü adhrerü xengyangpita licho. 28#Lip 18.20—19.25Lot chiichahsü hütsü roh-i du, arühnü tsu ko yongnü, linü ko iinü, chisi ko kuthsanü licho. 29Ta Lot-nü Sodom pehjü nyümong ninglangnü michang ko shurü michang jüro arüh atümung changjücho. 30Nyitsarü Tsurü mishaba nyümong tsüsü hütsü roh-i linung.
31 #
Mat 24.17-18; Mrk 13.15-16 “Hütsü nyümong sü kumungchah liro abinü arüh kuh la licho kohro khyünung tüjowü; sü luh la yaro abinü kulang thali tüwülung. 32#Lip 19.26Lot nitpü lümchehng! 33#Mat 10.39; 16.25; Mrk 8.35; Luk 9.24; Jhn 12.25Sünü palu akang khümchonyüro hütsü changnung, ta sünü palu akang changnang hütsü khümchonung. 34Ihnü nührü te yore, hütsü romang chongnong khüdu chah nyüh anyüh yüpjonung: khüdu notsinung ko khüdu pehjünung. 35Khingkurü anyüh thsang khüdula fürü thsü yanung: khüdu notsinung ko khüdu pehjünung.” 36Nyüh anyüh luh la yuthsah yanung, khüdu notsinung ko khüdu pehjünung.
37Monotinü abi te tsingdhingcho, “Khüdeo, Abüdongba?”
Jisu-nü lalingcho, “Khüdederü me linang hütsüla hogonti tsübülungre.”
Currently Selected:
LUK 17: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
