LIPOH 47
47
1Hütsüpü Josef-nü amungrü nyüh münga nüpü Farao yang wücho. Abinü yocho, “Uwa ko I mungrüti Kanan lanü arüh san ko kanglungrü ko arüh kohro apüm hipü roko. Arüh ade Goshen la lile.” 2Hütsüpü abinü amungrüti tsü abi te shirüsohcho. 3Yangthsabanü arüh te tsingdhingcho, “Nührü tu nguchiro?” Arühnü lalingcho, “Ihrü jümürü kyo ihrü san nyahrüe.” 4“Kanan lih la yangkong dirachonü san tsuyongchah mühle, hütsünü ihrü nührü lih la linung rore. Yanglilüm ihrü Goshen la linung mülajüng.” 5Farao-nü Josef te yocho, “Ade nüu ko nü mungrüti rochiko, 6Ijip lih tsü arüh yoe. Goshen ngah alih asu-ula tsü arüh lisohng. Ko arüh yola nguchi kohrü khürü zehkhang, I kanglungrü xükümsohng.”
7Hütsüpü Josef-nü au Jakob noro Farao shirüsohcho. Jakob-nü yangthsaba müwajücho 8ko yangthsabanü abi te tsingdhingcho, “Nüh kang khütoio?”
9Jakob-nü lalingcho, “I akang rümchi lirocho kang thsih khüdupü sangre. I jümürüti kang asheng rümchichote müjangdhingde, I akanglü akhikyah ko chongcha du.” 10Jakob-nü yangthsaba khyang aza amüwa jüpü tsicho. 11Hütsüta Josef-nü au ko amungrüti tsü yangthsabanü mülacho kyo Rameses yangdi shündhün Ijip la alih atsaubala lisohcho. 12Josef-nü au, amungrüti ko au kukhirü atümung achangba chii tsuyongnung chixicho.
Yangkong
13Yangkong tsü dirachonü khüdesü tsuyongnung müngucho ko Ijiprü ko Kanan-rü akongchonü re müzeh kangcho. 14Arühnü fürü icho thsi tsü khyübülungcho ko Josef-nü Farao kulang hiwücho. 15Khode Ijip ko Kanan la thsi apüm pehkhangcho, Ijiprünü ro Josef te yocho, “Ihrü khyang tsuyongnung jüng! Ihrü tüsüsoh. Lango nguchijüng! Ihrü thsi apüm thümko.”
16Josef-nü lalingcho, “Nührü thsi apüm thümchokhang, nührü kanglungrü hirung ko hütsü mülih Ihnü tsuyongnung jünung.” 17Achotsü arühnü Josef yang arüh kanglungrü hirocho ko arüh kuri, san, miza, misü ko gadu ngang tsü abinü tsuyongnung jücho. Hütsü kang arüh kanglungrü mülih abinü arüh khyang tsuyongnung chixicho.
18Kang khüu tsü arühnü ro abi te yocho, “Adirü, ihrünü nüte mürahmütsanung, ihrü thsi apüm thümko ko ihrü kanglungrü apüm nüyo kangko. Adelü ihrü fü ko alih chah khu apa tu mühle. 19Ihrü tüsüsoh! Lango nguchijüng! Ihrü luh tüpehsoh. Tsuyongnung jüng ko ihrü ko ihrü lih khyüng. Ihrü yangthsaba yuhrü thsanung, ko ihrü lih abi yo thsanung. Ihrü akang linung fürü jüng ko ihrü luh la chisinung majüh jüng.”
20Josef-nü yangthsaba khyang Ijip la alih apüm lihjücho. Ijiprü müipi arüh lih inungthsa kangcho, tunüo yangkong tsü diracho; ko alih apüm yangthsaba yo kangcho. 21Josef-nü Ijiprü khüulangnü khüulang chii ayurü kangsohcho. 22Abinü mühlihba tsü bebürü lih du thsacho. Arüh khyang yangthsabanü arüh akang lisohnung arüh nohlüm jüchonü bebürünü arüh lih inung müdhsütahcho. 23Josef-nü müyurü te yocho, “Adelü Ihnü nührü ko nührü lih yangthsaba khyang lihjücho nührünü müdhele. Hila nührü luh la chisinung majüh lile. 24Maxade nührünü yangthsaba khyang nohlüm münga la khüdu jüng. Anyingcho tsü nührünü majüh ko nührübürü ko nührü kukhi nengdang bichieng.”
25Arühnü yocho, “Adirü, nühnü ihrü akang khümchoko; nühnü ihrü müiko ko ihrü yangthsaba yuhrü kangnung.” 26Hütsüta nohlüm münga la khüdu yangthsaba khyang jünung tsü Ijip la yuzeng Josef-nü külüpcho. Hiba yuzeng chünye yingcheh bichire. Bebürü lih du tsü Farao kuthsi mükangcho.
Jakob-nü Achangkathsa Kihchicho
27Hütsüta Israelrü tsü Ijip la Goshen ngah la alirü kang ko sucheh licho. 28Ijip la Jakob kang dhüredhünyeh lide, abi kang 147 azirü thsacho. 29#Lip 49.29-32; 50.6Abi asünung becho chii rode, abinü atsudhre Josef dsinü yocho, “I phüm pohki nü kheh tohyohchüng ko nühnü Ime Ijip la müdhrürangnungepü yuchüm. 30Iurü lichola I merangsohnyüre; hütsüeko Ijip lanü Ih hiwü arüh dhrürangchola Ih dhrürang. Josef-nü lalingcho, Nühnü yocho kyo Ihnü nguchinung.”
31Jakob-nü yocho, “Nühnü nguchinungepü yuchüm.” Josef-nü yuchümcho, ko Jakob-nü achongnong chahnü anengsejücho.
Currently Selected:
LIPOH 47: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
