LIPOH 44

Shing Chahcho

1Josef-nü abi kuh la khehthsithsaba te hita thülacho: “Arühnü khütoi kohnang arüh bhathsajüng. 2Ko achangba bha la tsü apu thsi ko I taripi shing tsü yohjüng.” Achotsü abinü yocho kyo nguchicho. 3Ko nyangnyü khüu mütoh amungrü tsü arüh gadu chahnü tsisohcho. 4Ko arüh yangdi lanü shusheng mütsie Josef-nü khehthsithsaba te tsü yocho, “Zah arüh iiwüng. Khode nühnü arüh iiphünang arüh te young. Tuepü nührünü atsa tsü amütsanü roliro? 5Tuepü nührünü I büdongba taripi shing fühcho? Abi hütsülanü yongre, ko müchehmülohnungsü hütsü bichire. Nührünü hi dira thsameh nguchiko.”

6Khode abinü wü arüh iiphücho, yu hiri tsü yocho. 7Arühnü abi te yocho, “Adirü, nühnü yoba tsü tu khuo? Ihrünü hütsüta münguchi pü ihrünü yuchümre. 8Ihrü bha la zehcho thsi mii Kanan lanü nüh yang hirocho nühnü müdhele. Khang khütapü nü büdongba kuh lanü hon mahkhang taripi fühnung? 9Adirü, ihrü khürü khela hütsü zehkhang, abi tsü süsohng ko ihrü anyingchoti tsü nü yurü kangnung.”

10Abinü yocho, “Nührünü yocho kyo thsaang; ta shing khyüba du tsü I yurü kangnung ko nührü aparülü tsinung kohnung.” 11Hütsüpü arühnü zah arüh bha müdongcho ko arühnü palu bha lehchehcho. 12Josef khehthsithsabanü aziba chahnü dikeh achangba chii khütang müzah zangdhingcho ko shing tsü Benjamin bha la zehcho. 13Amungrü awahchonü arüh jengki rohnahcho ko arüh gadu chah bha zangkehpü yangdi lang tsü thalicho.

14Khode Juda e anirü thali Josef kuh yang rocho, hütsü yingcheh abi kuh la licho. Arühnü ajingte mükhukehcho, 15ko Josef-nü yocho, “Nührünü hi tu nguchicho? I roh-i nyitsarü khüdunü zii-thsadhing rangchehrepü nührünü mümüdhe ang?”

16Juda-nü lalingcho, “Adirü, Ihrünü tu yonung? Ihrünü khüta ritanung? Ihrünü khüta alanglangepü yonung? Tsingrangba-nü ihrü mülang mishajüko. Adelü shing rangchehba nyitsarü du tsü mah, ta ihrü atümung nü yurü kangba due.”

17Josef-nü yocho, “Hütsüta mah! Hütsüta khodesü müthsanung! Sü bha la shing zehcho, abi du tsü I yurü thsanung. Nührü anyingchotilü nührü au yanglang atbachila thali wüng.”

Juda-nü Benjamin Shulüm Kihchicho

18Juda-nü Josef yang küdu yocho, “Adirü, yanglilüm nüte chotanung mülaang. Ite nü zii tüchüro; nüh Farao apu kyo lile. 19Adirü, nühnü ihrü te ‘Nüu mülio mahkhang nührü ani apa mülio’ pü tsingdhingcho. 20Ihrünü yocho, ‘Ihrü au dee shipü lile ko abi ashilang nümüsucho ihrü ani achangba khüdu lile. Azaba amung tsü süko ko atpa chahnü adelü abi due; hütsünü aunü khura müire.’ 21Adirü, nühnü abi dhingdhingnung abi hila norung pü yocho, 22ta ihrünü nüte azaba tsünü au müpehjüchehnung, tunüo au tsü sopehnungepü yocho. 23Hütsüde nühnü yocho, ‘Nührünü nührü ani achangba tsü münorokhang ihrü nü yanglang thali türo pü yocho.’

24“Khode ihrü uwa yanglang thali wücho ihrünü abi te nühnü yocho roh-i yocho. 25Ko abinü adesü wü fürü aza lieng pü ihrü te yode, ihrünü yocho, 26‘Ihrü nirü achangba tsü müzehde ihrü münüyohnunge ko ihrünü müwünung. Ihrü nirü achangba tsü nüpü du wünung.’ 27Hütsüde uwa-nü ihrü te yocho, ‘I nitpü Rachel-nü I khyang azarü anyüh du nümüsujücho nührünü müdhele. 28Khüdu chahpehko. Abi rangmü kanglungrünü rehnah tsupü linung, tunüo ade yingcheh Ihnü abi müngure. 29Ade nührünü hi mii I tenü notsipü abi chah lango tikehkhang, Ih ashirü tsü alongrichonü sopehnung.’

30“Ko ade, adirü,” “Ihnü azaba tsü münüko uwa yanglang wükhang, I yola azaba tsü müzeh pü nguyeng abi sünung. 31Abi akang tsü azaba chah ngakeh lile, ko abi khura ashirü tsü ihrünü wahsohba tsünü abi sünung. 32Ihnü uwa te azaba nengdang tsü I akangnü khangko. Ihnü azaba tsü münüli rokhang, I kang ayung hiba bha tsü I chah khang pü yoko. 33Hütsüeko adirü, azaba mülih Ih hila ayurü thsa lisohng, ko abi tsü amungrü yola wüsohng. 34Azaba tsü müzehpü Ih khüta uwa yanglang thalinung? Ihnü uwa chah hiba bhamüling tikehsohnunglü mürang.”

Currently Selected:

LIPOH 44: SANGBSI

Highlight

Copy