LIPOH 39

Josef Ko Potifar Nitpü

1Ade Ishmaelrünü Josef Ijip lang nowücho ko Farao pohki adirü khüdu, yangthsaba kuh la thsazirü anüchiba Potifar khyang icho. 2Abüdongba Josef te zehcho ko abi khyang kohsohcho. Abi Ijiprü abüdongba kuh la licho#R. Ngu 7.9 3ko abi te Abüdongba zeh abinü nguchicho apüm la akoh ngusohrepü müdhecho. 4Potifar-nü abi chah longlangcho ko abi dikehrü kangsohcho; ko abi kuh la lüpcho michah abi adhingyehrü kangsohcho. 5Hütsütinü, Josef khyanglangnü Abüdongba-nü Ijip-ba kukhi la alicho ko luh la licho lüpchola müwajücho. 6Potifar-nü abi licho lüpcho Josef khyang müshosohcho ko abinü yangtsuba chah khu apa tu nengdangsü mülümxücho. Josef tsü trungdrong atsa ko adhingnung atsa thsacho, 7ko azachah lipü Potifar nitpünü Josef mürüpcho ko abükyü te mükhongnung tsingdhingcho. 8Abinü hütsü dhsongli abükyü te yocho, “Dhing, Ih lichonü hiba kuh la I büdongbanü tu lirünang mii mümüdhe. Abi kangcho lüpcho Ih müshosohre. 9Hiba kuh la I tenü adiu sü mühle. Abinü nü chah khu lüpcho I khyang jüko. Khang Ihnü khüta hitari amünyi nguchi Tsingrangba nyüm nguchinung?” 10Josef te nyümong mükhu abükyünü kihchinye abinü mühnyicho.

11Ta nyümong khüdu Josef kuh la anguchi nguchinung züdude, kulirü süsü hütsüla mülicho. 12Abükyünü abi fükhümnü rangpü yocho, “Ro Ite yüpm.” Ta abinü afükhüm mii abükyü kheh la pehjüpü kuhbete tsicheh tsicho. 13Ta khode abi fükhüm pehjüpü kuh lanü shangcheh tsicho, 14abükyünü kulirüti dsinü yocho, “Hi dhing! I niinü noroba Ibrirü hinü Ihsa mükhimüngure. Abinü I yüpjilang ro Ite khing thsangnyangnung müküpcho, ta Ihnü zühde khongcho. 15Ihnü khongchonü abinü afükhüm mii pehjüpü shangcheh tsiko.”

16Abükyünü abi fükhüm tsü anii kulang müro yingcheh yohpücho. 17Hütsüpü abi te atikehcho tsü yocho: “Nühnü noroba Ibrirü ayurü tsünü I yüpjilang ro Ih mükhimünguko. 18Ta Ihnü khongcho khu afükhüm mii pehjü shangyoh tsicho.”

19Josef abüdongba tsü dee rihlong chürocho 20ko Josef rangnü yangthsaba arangyoh kuh la khangticho, ko abi hütsüla licho. 21Ta Abüdongba Josef te zehcho ko abi müwajücho, hütsünü arangyohrü nyahbanü abi chah longlangcho.#R. Ngu 7.9 22Abinü Josef tsü arangyohrü apüm dhingyehsohcho ko akhangtikuh la nguchinguyang apüm michah anüchirü kangsohcho. 23Josef-nü dhingyehba lüpcho tsü anyahbanü dhingnung tu mülümxücho, tunüo Abüdongba Josef te zehcho ko abinü nguchicho lüpchola müwajücho.

Currently Selected:

LIPOH 39: SANGBSI

Highlight

Copy