LIPOH 37
37
Josef ko Amungrüti
1Jakob-nü mütozah au liba Kanan limih la du licho, 2ko Jakob kukhi yukheh tsü hiroh-i.
Josef tsü kang dhüredhünyeh dhrezarü khüdu licho ko abinü au ashamlarü Bilha e Zilpa nyüh tsurüti yola san ko miza nyahcho. Abinü amungrünü nguchi amütsa nguchicho yusi au te yo licho.
3Jakob-nü atsurü aparü atümung tenü Josef müicho, tunüo abi tsü abi ashilang surocho. Abinü bongri-fükhüm abi khyang xüjücho. 4Khode amungrünü aunü arüh tenü abi alaa müicho müdhecho, arühnü ani te tsü yu mii akyühde müchota abi thrünyicho.
5Romang khüdu Josef-nü melang khüdu melangcho ko hütsü arüh te yode, arühnü abi alaa thrünyicho. 6Abinü yocho, “Ihnü hita melangko. 7Ihsa atümung luh la mabhong bhong licho, ko I mabhong tsü müchongkhüti shemüsu yacho; hütsüde nührü mabhongti tsünü Iyo mabhong tsü mükangmüla yapü hütsüchah mükhukehcho.”
8Hütsüde amungrütinü yocho, “Hütsü khu nüh yangthsaba kangpü ihrü michah yangthsanungepü lümrü mah-o?” Hütsüta amelang ko abinü arüh nengdang yocho khu tsünü arühnü abi alaa thrünyicho.
9Hütsüpü Josef-nü melang apa khüdu melangcho amungrü te yocho, “Dhing, Ihnü nyü ko chonu ngucho, ko chenghi dhürekhehnü I chah mükhukeh ngucho.”
10Abinü melang tsü autesü yocho ko aunü abi yübücho: “Melang hi tu khütario? Nütpa ihjü ko nü mungrütinü ro nüte mükhukehnung nühnü lümrü mah-o?” 11#R. Ngu 7.9Josef amungrütinü abi nahmohcho, ta aunü khiyu hi alüm la yohpücho.
Josef Icho ko Ijip lang Notsicho
12Nyümong khüdu Josef amungrü Shekem lang au san nyahnung wüpü lide 13Jakob-nü Josef te yocho, “Nü mungrü san xükümnung Shekem lang wü lile, ko hütsülang Ihnü nüh wüsohnyüre.”
Josef-nü lalingcho, “Ih rungnüm lile.”
14Aunü yocho, “Wüng ko nü mungrü ko santi khümcho tsa mülinang dhingpü lung Ite young.” Hütsüta aunü abi Hebron Ngah lanü wüsohcho.
15Josef tsü Shekem chihpü arüh yangchi rachide nyüh khüdunü abi ngu abi te yocho, “Nüh tu yangchiro?”
16Abinü yocho, “San nyahrü I mungrü yangchire. Arüh khüde rachirünang mümüdheo?”
17Nyitsarüba tsünü yocho, “Arüh hilanü tsipehko. Arüh Dothan lang wünungepü arüh chotacho Ihnü yuchiko.” Achotsü Josef-nü amungrü khanglang iiwücho ko arüh Dothan la shirücho.
18Arühnü abi ashulanü ngucho ko abi ro müchie, arühnü abi müpsehnung arah külüpcho. 19Arühnü khüdunü khüdu te yocho, “Melang melangbong tsü tsehle. 20Rung, Ihsanü abi müpsehnung ko abi me tsü yongroh khüdula pehnung. Ko Ihsanü abi rangmü kanglungrünü mükahsehkopü yonung. Hütsüpü abi melang tsü tu kangnang dhingdhingnung.”
21Reuben-nü hi yuchi abinü Josef khümchonyücho. Abinü yocho, “Ihsanü abi mümüpsehnung ko 22yongroh la tsü dhiyohchonung, ta abi chah kheh tüthah.” Hi abinü abi khümcho au yanglang thali tsisohnung khyanglangnü yocho. 23Ko khode Josef amungrü rochicho, arühnü abi bongri-fükhüm tsü khohchehjücho. 24Hütsüpü arühnü abi nowü yongroh akung khüdula dhiyohchücho.
25Arüh yangtsu yade, arühnü Ishmaelrü Gilead lanü Ijip lang shitsehrü rochi ngucho. Arüh ut tsü sehyahba, moi ko axümlichi hicho. 26Juda-nü abi mungnirü te yocho, “Ihsanü Ihsa nirü rang müpsepehchonü Ihsa tu müjingchonung! 27Ihsanü abi hiri Ishmaelrü te inung. Abi chah Ihsa kheh müthahnung; tunüo abi Ihsa nirü, Ihsabürü shuh ko shüh lile.” 28#R. Ngu 7.9Hütsü arühnü nyengchocho ko khode Midian-rü shithsabhülehrü tsü lahkhu tsicho, arühnü yongroh la tsünü Josef tphahcheh Ishmaelrü te taripi mükyü ngang icho ko arühnü abi Ijip lang notsicho.
29Khode Reuben yongroh lang tsü rocho ko hütsüla Josef müngucho, abinü alongrichonü ajengki rehnahcho. 30Abinü anirü yanglang ro yocho, “Azaba tsü hütsüla mühle! Ihnü tu nguchinung?”
31Hütsüde arühnü miza khüdu müpsehcho ko hütsü shüh la Josef fükhüm dhsangcho. 32Arühnü fükhüm tsü arüh au yanglang hiwü yocho, “Ihrünü hi nguchoe. Hi nü tsurü fükhüm mah-o?”
33Abinü hütsü dhingcheh yocho, “Ho, hi abi yoe! Rangmü kanglungrü khürünü abi mükahsehko. I tsurü Josef zangzang rehnapü linung.” 34Jakob-nü alongrichonü ajengki rohnahcho ko müyahshü müpipü bekhyah asheng meshücho. 35Atsurüti ko atsularüti atümungnü ro abi kihchocho, ta abi müci mükyang yocho, “Ihnü asülih chii I tsurü meshü wünung.” Hütsüta abinü mütozah atsudhre Josef meshücho.
36Hütsütade Ijip la, Midian-rünü Josef tsü Farao pohki adirü khüdu, yangthsaba kuh la anyahrü yola anüchiba Potifar khyang icho.
Currently Selected:
LIPOH 37: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.
