NÜCHEHCHO 6

1Ko Abüdongba-nü Mosa te yocho, “Ade Ihnü yangthsaba chah tu nguchinang nühnü ngunung. I müyurü tsisohnung Ihnü abi khingnung. Ajüje abinü abi lih lanü arüh tsisohnungthsa Ihnü abi khingnung.”

Tsingrangba-nü Mosa Dsicho

2 # Lip 17.1; 28.3; 35.11; Nüch 3.13-15 Tsingrangba-nü Mosa te chota yocho, “Ih Abüdongba. 3Ihnü Abraham, Isak ko Jakob-rü te Akohba Tsingrang roh-i mishako, ta Ihnü Ipu jangjang arüh khyang I Amüsa neng mümüdhesoh. 4Ihnü arüh te arüh shirü thsa liyaba Kanan lih tsü arüh khyang jünungepü azengtaba külüpko. 5Ade Ijiprünü Israelrü ayurü kangsohcho, ko arüh rühchicho Ihnü yuchiko, ko Ihnü azengtacho lümchehko. 6Hütsüeko Israelrü te hita young, ‘Ih Abüdongba; Ihnü nührü Ijiprü kheh la ayurü suro lanü khümchonung ko lehchehnung. Ihnü arüh adrünungnü khingchinung Ih akohba kheh dhimüsunung ko Ihnü nührü khümchonung. 7Ihnü nührü Ipu nyitsarü kangsohnung ko Ih nührü Tsingrang kangnung. Ko Ihnü nührü Ijiprü ayurü suro lanü nüchehde, nührünü Ih nührü Tsingrang Abüdongba epü müdhenung. 8Ihnü Abraham, Isak ko Jakob-rü te nyengchoba lih lang nührü noronung; ko hütsü nührü yo thsanung Ihnü nührü khyang jünung. Ih Abüdongba.’” 9Mosa-nü hi Israelrü te yocho, ta arühnü mühnyicho, tunüo arüh khura ayurü kangsohchonü arüh alongdi müli kangpehcho.

10Hütsüde Abüdongba-nü Mosa te yocho, 11“Wüng ko Farao te Israelrü abi lih pehjüsohng pü young.”

12Ta Mosa-nü lalingcho, “Israelrünü mii Ite mühnyikhang, I roh-i amüxüpchehrü te khüta Farao-nü nyinung?”

13 Abüdongba-nü Mosa e Aron nyüh te yocho, “Israelrü ko Ijip yangthsaba te Ijip lanü Israelrü nüchehnung nühjü khyang Ihnü yuzeng jükoding.”

Mosa Ko Aron Nyüh Jümü

14Jakob tsurü aukhuba Reuben tsurü müyü licho: Hanok, Pallu, Hezron ko Karmi; arüh neng tsünü arüh jümü hung ngusohre. 15Simon tsurü dhüroh licho: Jemuel, Jamin, Ohad, Jakhin, Zohar ko Kanan-larü tsurü Shaul; arüh neng tsünü arüh jümü hung ngusohre. 16#Khi 3.17-20; 26.57-58; 1 Roh 6.16-19Levi tsurü asang licho: Gershon, Kohat ko Merari; arüh neng tsünü arüh jümü hung ngusohre. Levi kang 137 licho. 17Gershon tsurü anyüh licho: Libni ko Shimei ko arüh chahnü trahchocho adrong licho. 18Kohat tsurü müyü licho; Amram, Izhar, Hebron ko Uziel. Kohat kang 133 licho. 19Merari tsurü anyüh licho: Mahli ko Mushi. Levi hung ko arüh chahnü trahchocho tsü hiri licho.

20Amram-nü au ani Jokebed khyücho, ko abükyünü Aron e Mosa nyüh nümüsucho. Amram kang 137 licho. 21Izhar tsurü asang licho: Kora, Nefeg ko Zikri. 22Uziel-sü atsurü asang licho: Mishael, Elzafan ko Sithri.

23Aron-nü Aminadab tsulatpü ko Nashon nirü Elisheba khyücho: Abükyünü Nadab, Abihu, Eleazar ko Ithamar nümüsucho. 24Kora tsurü asang licho: Assir, Elkana ko Abiasaf; arüh tsü Kora trah changsho jümürü kangcho. 25Aron tsurü Eleazar-nü Putiel tsulatpü khyücho ko abükyünü Finehas nümüsucho. Hiri tsü Levi trah la tsutputi michah athahti licho.

26Aron e Mosa nyüh tsü khüdupi Abüdongba-nü, “Ijip lanü Israel nüchehng” pü yoba nyüh tsü thsacho. 27Farao te Israelrü müthehchüng pü yoba nyitsarü tsü hinyi licho.

Aron Ko Mosa Nyüh te Yuzeng Jücho

28Ijip la Abüdongba-nü Mosa te chota 29yocho, “Ih Abüdongba. Ihnü nüte yocho apüm Farao te young.”

30Ta Mosa-nü yocho, “Ih amüxüpcheh-epü nühnü müdhele; khüta Farao-nü Ite nyinung.”

Currently Selected:

NÜCHEHCHO 6: SANGBSI

Highlight

Copy