MATHIU 7
7
Mihnâng Atheloat
(Luk 6.37-38,41,42)
1“Mihnâng athe neklo en, erohkoba Joban memin nenâng athe lomahhèn, 2Nema mihnâng chenroh athe loeken a, ererãngrãng Joban memin nenâng athe elohèn. Ngale nema mihnâng chenroh hôanjôan eken a, ererãngrãng Joban memin nenâng ehôan ejôan hèn. 3Nedede mit wah janchhup lebeng kherii thangma, nepho anaa mitwah mitchhup pa chenrãngma lepkhe eken a? 4Nedede mitwah janchhup pa thienletma nepho anaa nâng, ‘nangmit wah mitchhup pa rephekoh e’ ngama chenroh jiennga eken a? 5Ahuhkhoanglep heh! khebengko nemit wah janchhup pa bengre pherii mêngen, erediko ba nema nepho anaa mitwah mitchhup pa senthemthem kheletma eta rephekoh en.
6“Asâthôan sêmmak pa hu hehnâng nekkoh - thinma ngakkek ba ere hèn. Ngale wak mathahko kem nekphekoh - thinma dakhenko ewoatnek a.
Tha en, Lem en, Kâsekko Rahkõngen
(Luk 11.9-13)
7“Tha en, eko nema echoh en, lem en, eko nema echohkhe en; kâsekko rahkõngen, eko nenâng kâsek pa elaang kohhèn. 8Henhen ma thaeka, erehehma echoh a, alemte hehma echoh khea, ngale henhenma kâsekko rahkõng eka hehnâng kâsekpa elaangkoh a? 9Ne-khuwah henma komin, mâmâ chhama phhekchhah thâko longkohte tongen a? 10Roh akole atema ngah thâko pû ekoh en a? 11Mihnyan chhih nema tumin mâmâ chhako asenli kohpa jet eken. Rangkhethung wah tôngte ne Wa Joban mejã tanga atewah thâte hehnâng asenlipa kohrãng chentô bâmjet eka!
12“Mihnâng nerãng chenroh moatthuk hun eken a, ererãngrãng nememin mihrãng eroh mokoh en: Arepa Mosa Niemarang ngale Mõng hehma hethô wah ngin.
Lemkit
(Luk 13.24)
13“Lemkit pumma khoam en, chenrãngma ngako khomah lemnâng katlem pa lemdong, ngale ere lempa khoamrãng ala, ngale eko khôamte pa ajah. 14Roh-komin khopô chohthin lemkhôpa lemkit, ngale ereko khôampa alat, ngale eko khôamte mihnyan pa mãnchha.
Bãng ngale Bãngri
(Luk 6.43,44)
15“Mongmõang hehwah jetletma dangen; thin a ne tânâng tokkhoh pa saak rãngrãng, rohkomin thin rinkhen pa wunwah soanchhih rãngrãng ehûra. 16Nema thin moatlem junma ejetlo waken. Suhche bukwah anguri jienhong rimah, ngale suhbukwah phukri jienhong rimah. 17Bãngsen pumma risen ehongria, ngale bãngchhih pumma richhih ehongria. 18Bãngsen pumma richhih jienhong rimah, ngale bãngchhih pumma risen jienhong rimah. 19Penri risen lehongri bãngpa joatphe lahma wennâng thhekmin.. 20Mongmõang heh thin moatlem junko ejetlo waken.
Ngama Ne Jetmah
(Luk 13.25-27)
21“Teso, Teso, ngama nganâng roote chentôpa rangkhethung nâng leta wãngmin, rangkhethung wah tôngte Joban ma huneka moatlem moatte heh loloba tâwâng min. 22Chenthu metloatjâ rangwo mehû theko, ajahthem mihnyan ma nganâng aroh enga hang, Teso, Teso, nangmînko nima Joban ngin phoangthôtih, ngale nangmînko nima juchhihmin junlotih, patritli moatlemmin motih! 23Ephumma ngama thinnâng edânthang ang, ‘ngama ne jetmah, nea mihnyan chhih, ngatâwah taangchhoan en!’
Humhôante Wanii Thakthô
(Luk 6.47-49)
24“Erohwah henhenma nga nginpa tatlahma kepeka, ere mihnyan pa chhin achhiak, ate humpa longrã khohnâng hôante rãngrãng. 25Pôngdong patdong ngale jodông thunma ere humko ethin a, rohkomin ere humpa tarunjâ mah, chenrãngma ngako ere humpa longrã khohnâng hoaneka.
26“Rohkomin henhenma nga nginpa tatlahma lekep dangeka, ere mihnyan pa aba, ate humpa phihchha khohnâng hôante rãngrãng. 27Pôngdong patdong ma thinko ngale jodôngma lûmhokko ere humpa runjâ erea. Phumma ere hum runjâpa chentô cheili dângmin a.”
Jisu Chaan
28Chenthu Jisu ma erengin heh thôkoh diko, mihnyan hehma atema hethôeka nginpa tatlahma bârit rewah. 29Atea niemarang hethôte heh rãngrãng ledang; chaan demnâng hethô wah.
Currently Selected:
MATHIU 7: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
