MATHIU 22
22
Nemnyansiet Kuhhôan Nginthakthô
(Luk 14.15-24)
1Jisu ma nginthakthô wienkep lahmejô mihnyan heh demnâng jabmînwah. 2“Rangkhethung Hahsông pa arerãngrãng. Rekthenâng lowang wathema ate chharãng nemnyansiet kuhhôan khoakhêm wah. 3Lowang pumma nemnyansiet thinnâng hokrãng bisuntah mihnyan heh roorãng ate haaheh chienchhoan wah, phumma ere mihnyan heh ahok hunwak ho. 4Phumma Lowang pumma ate haa ahan hehnâng nginthôko lahma chienchhoan wah: Atema aroh thôkoh en ngama ngatwah, ‘Ngama phhekchhah heh lâta khoakhemtek, ngama leepongdong pemin lâjoattek, ngale chentôpa phangtang lâta khoakhemtek. Nemnyansiet kuhhôan thinko phhekchhah rãng hûren!’ 5Rohkomin bitangtah mihnyan hehma nâletha thangma mâmâ moatlem nâng choanwak wah: wathepa ate pitnâng katwah, ahan wathepa ate duken nâng katwah, 6Ahan hehma bisun hokte haaheh lolahma buh awat relahma ritphewah. 7Phumma Lowang pa nyahrãng rinkhah wah; ngale ate haa ritphete mihnyan heh ritphe letma thin hahdaang pa wenma rokphe en ngama ate sipâhi heh chienchhoan wah. 8Erediko Lowang pumma ate haa ahan heh khôanroo lahma thinnâng ngatwah, ‘Ngama phhekchhah heh lâta khoakhemtek, rohkomin ngama bisuntek mihnyan hehma arepa chhahrãng punwakmah. 9Erohwah noknyu lemdongnâng chhoan letma nema chentô mihnyan chohmîn eken a ereheh phangtang roohuren.’ 10Ephumma haaheh chhoan lahma thinma noknyu lemdongnâng chentô chohmîn eka ereheh phangtang chhih asen mihnyan khoakthe siethok wah; ephumma nemnyansiet kuhhôan humpa mihnyan ma mênchong dângwah.
11“Lowang pumma humkhen nâng wãng lahma mihnyan khôanhutah hehnâng sokwângko nemnyansiet kuhhôankhet lekep thangma hûlahma chohkhe wah. 12Phumma Lowang pumma atenâng ngatwah, ‘lemruchha, nemnyansiet kuhhôankhet lekep thangma chenroh jienhu eroa?’ ngama thôngphâ wah. Phumma ere mihnyan pumma chenmin dânthangmah. 13Erediko lowang pumma ate haaheh nâng ngatwah, ‘Ate dek ada heh khhek letma rangsâ wah rangnyek khenko petphekat en. Ereko ate pâchupkek lahma seplahma chentonga.’ ”
14Jisu ma aroh jekthô wah, “Aroo pa ajah rooeka, rohkomin arenpa amãnchha ren eka.”
Thãkhokoh junma Chhien
(Mak 12.13-17; Luk 20.20-26)
15Farasi heh chhoan lahma Jisu atedede jabkhab junko bukrit thukrãng buthi hôanwah. 16Erediko Farasi hehma thin dijunte ngale Hirot mihnyan hehwah khuthe Jisu tânâng chienkat wah, thinma Jisu nâng ngatwah, “Hethôte, nima jet nanga toangtang ko thôte. Ngale hennâng min adong arin roak atoak weihmoh, erediko mihnyan hehma manga hango, ngamemin lesoang thangma hethô eko, nangma mihnyan hehnâng Joban nginpa toangtangma phoangthôkoh eko. 17Nangma chenroh thonghun eko erepa ninâng thôkoh tanhi? Nima Roman Chofa nâng thãkho takoh ele takohmih a?”
18Thinma achhih themawa wak ekapa Jisu ma jetlahma, thinnâng ngatwah, “Ahuhkhoanglep heh! Nema nga chenrãngma thethuk huneha? 19Thãkho kohthin janngun pa nganâng khesok tanha!”
Ephumma thinma Jisu nâng janngun kohhokwah, 20Ngale Jisu ma thinnâng chhienwah, “Arepa hen thhenphanga, ngale arepa henmîn raangeka?”
21Thinma, “Chofa thhenphãng ngale atemîn raangeka” ngama dânthâng wah. Ephumma Jisu ma thinnâng ngatwah, “Eroh medang ako Chofa thiakpa Chofa nâng koh en, ngale Joban thiakpa Joban nâng koh en.”
22Ere mihnyan hehma Jisu nginpa tat lahma bârit rewah; ngale thinma Jisu phethien lahma ngakchhoan wah.
Aritwah Ngakhîn rãngma Chhien
(Mak 12.18-27; Luk 20.27-40)
23Erejâjâ ko, Saduki khuthe Jisu tânâng hûlahma mihnyan pa riichoanwah ngakhinmah ngama ngathok wah. 24Thinma ngatwah, “Hethôte, Mosa ma ngatwah, delawa wathe chha machhama merii ako, atema phethien eka janthoinyu pa ate naa pumma chhachhat rãngma ngakkepmin, phumma ere wanii pumma chhaeka pa rit retahwa chha ngama ngatmin. 25Phumma rekthenâng chhepho waengit dângwah. Phumma khhepho thôan pumma dihiak keplahma chha machhama ritwah. Phumma ate tangnyu pa naako phethien kohwah. 26Phumma medemwa pemin erohjô ritwah, ere diwah pemin erohjô ritwah, ngale chhepho waengitlat eroh thôanrit wah. 27Athôanko dihiaknyu pemin ritwah. 28Phumma chenthu ritte heh ngakhîn jâko, atea hen tangnyu dângmin a? chenrãngma ngako chhepho waengitlat ma ate kepwah.”
29Jisu ma thinnâng dânthâng wah, “Nea nyahrãng athe! Nema Joban nyapraang pa lejet junko arepa jetmet! ngale Joban chaan pemin nema jetmet. 30Chenthu ritte heh mengakhin tahko, thin a rangkhethung wah ngintatte heh rãngrãng dângmin ngale dihiak delamin lekepmîn tumin. 31Aritte heh ngakhîn junma Joban ma nenâng thôkohthen pa nema mathat chohweihne? Joban ma ngatwah, 32‘Nga a Abraham Joban, Isak Joban, ngale Jakob Joban.’ Atea ahînte heh Joban, aritte heh Joban dangmah.”
33Chenthu loangchhang pumma erepa chohtat phumma, Jisu ma hethôeka junko thin bârit rewakwah.
Joban wah Hôkum Adongthôan
(Mak 12.28-34; Luk 10.25-28)
34Jisu ma Saduki heh jienchhiak pa Farasi hehma tatlahma, thin aroamma chohmîn wah, 35Thinkhuchhang wah Niemarang hethôte wathema Jisu bukritthuk rãng atenâng ngin chhienwah. 36Atema chhienwah, “Hethôte, Mosa Niem wah chenpa adongthôan a?”
37Jisu ma dânthâng wah, “ ‘Nang Teso Joban nâng nanghung nangrñ phangtang kohlohma hun o, ngale nangju amoangmin phangtang koh o, erediko nangchaan phangtang kohlohma hun o.’ 38Are hôkum pa adongthôan ngale alemthôan hôkum. 39Are dikowah wanthe nyahrãng alemli thôan hôkum pa arepa: ‘Nangdede nâng hunriieko rãngrãng mihhan nângmin eroh hun o.’ 40Mosa Niem phangtang nâng ngale mõng hehma hethôeka heh are hôkum junko tuta jôba hethôeka.”
Misaia Junma Chhien
(Mak 12.35-37; Luk 20.41-44)
41Farasi khuthe aroamma khôan poatko Jisu ma thinnâng thôngphâ wah, 42Nema Misaia junma chenroh thonghun eken a? Atea hen Chhuchha a?
“Atea Devit Chhuchha” ngama thinma dânthâng wah.
43Jisu ma thinnâng chhienwah, “Eroh medang ako,” Devit ma Misaia nâng ‘Teso’ ngama roorãng Juma chenrãng chienwah a? Devit ma ngatwah,
44‘Teso ma nga Teso nâng ngaeka:
Ngama nangran heh nang daphâ khenko mathien thienkoh are nga dekchahko tongo.’
45Phumma, Devit ma atenâng ‘Teso,’ ngama meroo ako, Misaia pa Devit Chhuchha chenroh jiendângmin a?”
46Henmemin Jisu nâng chenjô jiendân thangho, ngale erejâ phumma henmemin Jisu nâng chenni nginjô chinchhien tuho.
Currently Selected:
MATHIU 22: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
