MATHIU 12

Joban Pientôngjâ rãngma Nginchhien

(Mak 2.23-28; Luk 6.1-5)

1Ere sanpoat kowah chentô letaangko, Jisu Pientông jâko chhah thongma dânkhoam wah. Ate dijunte heh rêmrii lahma chhahri kowah punphhek wah. 2Farasi hehma erepa lepkhe lahma, thinma Jisu nâng ngatwah, “Sûtan, nang dijunte hehma, Pientông jâko lemoli pa moeka, arepa nãngniem junko dangmah!”

3Jisu ma dânthâng wah, “Devit ngale ate mihnyan heh rêmrit poatko Devit ma chenni retah a erepa nema mathat weihne? 4Joban humnâng wãng lahma, ate ngale ate mihnyan hehma Joban nâng kohtah Joban phhekchhah pa tôanchhah wah, phumma erepa Niem junko soam aroak tema loloba tâphhek chhahthin dângwah. 5Roh akole nema Mosa Niem nâng chohweih hone, Pientông rangwo roakweih rangsoamhum wah soam aroakte hehma Pientông rangwo Niem tahwak pa, rohkomin thin a themah? 6Ngama nenâng thôkoh eka, rangsoamhum noma dong ako tonga. 7Joban nyapraangma ngaeka, ‘ngama ngem angah ma soamroak hunmek, mînchen ba hunkãng.’ Arepa nema linlin jetno meko, lethe mihnyan hehnâng nema lesekham minwah; 8Chenrãngma ngako Mihnyan Chhapa Pientông rangwo rãng memin Teso.”

Wathe Dekkò Mihnyan

(Mak 3.1-6; Luk 6.6-11)

9Jisu erethe kowah loatchhoan lahma Sanagog nâng wângwah, 10Enâng wathe dekkò mihnyan dângwah. Ngale eko mihnyan khuthema Jisu nâng athe lolahma sekhâmhun dângwah, ephumma thinma Jisu nâng chhienwah, “Pientông jâko nãng Niem junko khoanchette tamesiet ele?”

11Jisu ma dânthâng wah, “Nekhuwah wathema saak lâpemtet, phumma arepa Pientông jâko jonglunâng mejârii ako, chenni rêmin a? atema erepa letoan sietka minne? 12Mihnyan nyuchha pa saak noma bâmbâm adong! Erohwah nãng Niem junkomin Pientông jâko mihnyan nyuchha nâng chohsok rãng tãngmahhi.” 13Erediko Jisu ma dekkò wako ngatwah, “nang dekpa chen o”

Atema dekpa chênwah, ephumma dekpa deksente heh rãngrãng ngaksênwah. 14Ere diphumma Farasi heh chhoan lahma Jisu ritphe rãng themawa wakwah.

Joban ma Aren Haa

15Jisu ma ate khûm apânrãng themawa pa tatlahma, ate erethe kowah loatchhoan wah; ngale mihnyan heh jahmõang ate dijun wakwah. Ngale chentô khun atamte hehmin atema mesietwah. 16Ngale atema ngajunma nekphoangthô en ngama ngatwah. 17Atema are moeka pa Mõng Isaia ma Joban ngin jabtah pa toangtang dângwãng rãngma moatwah:

18“ngama rentek ngahaa pa ana,

ngama Atenâng hun ekang,

ngale ate demnâng nga rinme ekang.

Ngama nga Ju ate seknâng echienkat ang,

Ngale chentô diak akanko ngama metloat Nginpa atema ephoang thôkoh a.

19Atea lephoang chhiakmînmin, ngale lephoang rak akakmin,

erediko noknyu lemdong hehnângmin henmejô ate jab letatmin.

20Atea boan anaa heh demnâng min noapnene,

ngale wentitdô rãngrãng dôeka wenpa lemut thukmin.

Toangtang pumma mata tajien atema letôanmin,

21Ngale Atenâng chentô mihnyan nyuchha ma edâlem a.”

Jisu ngale Bilzibul

(Mak 3.20-30; Luk 11.14-23)

22Erediko mihnyan khuthema Jisu tânâng juchhih luplahma mitdoak ngale lejienjab mihnyan siethok wah. Jisu ma ere mihnyan pa sênsietwah, erediko atema jienjab wah ngale jienkhe wah. 23Jisu ma ere moatpa khelahma, mihnyan heh bârit rewah. Thinma chhienwah, “Atea Devit chha danga?”

24Farasi hehma erepa tatlahma, thinma dânthâng wah, “Atema juchhih junlo ekapa thin pênte bilzibul ma Atenâng chaankoh lahma junlo eka.”

25Thin hungwah thonghun ekapa Jisu ma jetlo lahma thinnâng ngatwah, “Hendiak komin thindede tungko phanmîn lahma, thindede memênmîn ako, ere diakpa leta rongmin. Ngale hen hahdaang komin, ba, hen humkâ komin thin tungko phanmîn lahma, thindede memênmîn ako, arepa aphanjâ erea. 26Erohwah, joak hahsông komin khuthema khuthe demko memênmîn ako, thin a mâmâ khukhu dangeka, ngale sitsiak ephanjâa! 27Nema ngaeken, bilzibul ma nganâng chaankoh lahma ngama juchhih junlo ekang, eroh medang ako, ne dijunte hehnâng henma ereheh junloat chaankoh eka? Ne dijunte hehma moeka moatlem junko ne athe ngama jetloeka! 28Dangmah, arepa bilzibul ma kohdangmah, Joban Juma nganâng juchhih heh junloat rãng chaankoh ehang, erejunko Joban Hahsông pa nekhu khohnâng râkatha ngama khesok eka.

29“Henmemin lochaanwa humpa chhihsiet lahma ate sêmmak heh tatoan chhoanmah; khebengko lochaan wapa khhekmêng lahmaba ate humpa tâlôngmin.”

30“Hen komin ngarãng ledangte pa, alinlin nga lelatnâng dângte; ngale henma nganâng khôansietko lechohsûte a, erepa alinlin aphânsiette. 31Ngale erohwah ngama nenâng thôkoh eka: mihnyan nâng chenni pap komin ngale jabchhih jabkhah mejab akomin map tâkohmin;#12.31: thinma chenjô mechhihjab akomin; ba thinma Joban lelat nâng mechhihjab ako. rohkomin henhenma Asâthôanju lelatnâng chhihjab eka erehehnâng chenthumin map lekohmin. 32Henma komin Mihnyan Chharãng mechhihjab ako map tâkohmin; rohkomin henma Asâthôanju lelatnâng chhihjab eka erehehnâng map lekohmin, athângheh min, ngale roantang roanjêng komin lekohmin.

Bãng ngale Bãngri

(Luk 6.43-45)

33“Bãngpa bãngsen medang ako, rimin risen eria; nenâng bãngchhih metong hènko, rimin richhih echoh en. Bãngpa ateri junko ejet e. 34Pûchha heh - ne achhih dangletma jabsen chenroh ejien hongjab en a? chenrãngma ngako hungnâng mênchong danglahma ba thunma hongjab eka. 35Mihnyan senma ate hungnâng asentong lahma jabkhabsen hongjabwên era; ngale mihnyan chhih ma ate hungnâng achhih tonglahma jabkhab chhih hôngjabwên era.

36“Ngama nenâng thôkoh eka, metloatjâ rãngwoko chentô mihnyan ma atema chentô jabkhab chhih jabtah a ereheh eloat sietkoh a. 37Ne jabkhab heh nenâng metloatrãng kepmin, ne asenba achhih pa ne jabkhab pumma eloatsiet a.”

Apatritli Moatlem Khesokrãng Chien

(Mak 8.11-12; Luk 11.29-32)

38Erediko Niemarang jette ngale Farasi khuthema hongjab lahma ngatwah, “Hethôte”, “nangma patritli moatlem molohma ninâng khesok hi ngama huneki.”

39Jisu patrii lahma dânthâng wah, “Areroan wah mihnyan heh chentô chhih a, ngale Joban min jetwak mah!” “nganâng patritli moatlem khesokrãng chien eha? khesokmah! Mõng Jona patritli petah pa loloba nerãng patritli moatlem dângmin. 40Chenroh Mõng Jona ngahdong wokkhen nâng ngihrem penrem tongtah a, ererãngrãng jôba, Mihnyan Chha pemin ngihrem penrem hahken khennâng etonga. 41Metloat rangwo jâko, Ninivi wah mihnyan heh ne mathahko toanchep lahma nenâng achhih engahèn, chenrãngma ngako Jona ma Joban nginthô tatlahma thinpap wah hungngaklit wah; ngale ngama nenâng thôkoh eka, Jona noma ajahthem adongpa thejâ ako tonga! 42Khope renjâ rangwo ko, sannyup wah Siba wangcha memin toanchep lahma achhih engahèn, chenrãngma ngako, ate diak hahtaang wah Solomon lowang buthi mongthem senpa herãng hokwah; phumma ngama nenâng thôkoh eka, Solomon nomemin ajahthem adongpa thejâ ako tonga!

Juchhih Ngakhok

(Luk 11.24-26)

43“Chenthu juchhih pa mihnyan wah meloatchhoan tahko, hahran khojêng jêngnâng phoangchhoan lahma ate boantông rãng the rânglem chhoan a. Phumma the lechoh medang ako, 44atedede rângngariia, ‘chenre ngahum kowah loatchhoantek a, ere kojô ngakwang ang’ ephumma chenthu ere humko ngakhokko, humpa sekho, sâpoangpoang ngale tiamtete etongla a. 45Erediko ate ngakchhoan lahma ate noma ajahthem juchhih ahan wanengit lêsiet lahma ere humko ngaksong hûeka. Ere diphumma, ere mihnyan pa khebâng wah noma ajahthem achhih dangeka. Eroh jôba arerôan wah mihnyan chhih hehnângmin dângmin.”

Jisu Nyong ngale Ate Naa heh

(Mak 3.31-35; Luk 8.19-21)

46Jisu mihnyan heh demnâng jabmîn thuko, ate nyong ngale atenaa heh hokwah. Thin a thakhoko cheplahma Jisu demnâng jabmîn hunwakwah. 47Ephum-ma erekowah mihnyan wathema Jisu nâng ngatwah, “Sûtan, nang nyong ngale nangnaa heh thakhoko chepwak eka, ngale nang demnâng jabmîn hunwak eho.”#12.47: wanwanthe ma vars 47 pa raangeka.

48Jisu ma dânthâng wah, “Nga nyong pa hen a? ngale nganaa heh hen a?” 49Erediko ate dijunte hehnâng thhetkat lahma Jisu ma ngatwah, “Sûtan en! nga nyong ngale nganaa heh anã heh! 50Hen-henma rangkhethung wah nga Wa Joban ma huneka ere moatlem heh moeka ere hehba nga pho, nga nya, ngale nga nyong.”

Currently Selected:

MATHIU 12: NOKTBSI

Highlight

Copy