LUK 4
4
Jisu Hungtôan
(Mt 4.1-11; Mak 1.12,13)
1Jisu Jordan wah Asâthôanju menchoang ngakwâng wah, ngale Juma sehahkho nâng sietchhoan wah, 2Enâng juchhihma jâroakbelii hungtôan wah. Ere sanpoatko atema chennimin phhekchhahho, phumma chenthu erepa râdiko ate rêmritwah.
3Juchhih ma atenâng ngatwah, “Nanga Joban Chha medang oko, are long hehnâng bankênrãng litjârãng chien o.”
4Phumma Jisu ma dânthâng wah, “Joban nyapraangma ngaeka, ‘Mihnyan nyuchha pa phhekchhah loloma hîn ajô dangmah.’ ”
5Erediko juchhihma wanthe thechoang khonâng sietwên lahma dekkhîn nyekko hahtokkhoh wah chentô hahsông heh atenâng khesokwah. 6Ngale juchhih ma atenâng ngatwah, “Ngama are chentôpa nangnâng kohlihma lowang rãngrãng epênthuk e,” “Are chentôpa nganâng lâkoh thang, ngale ngama hennânghun ekanga ereko ngama areheh phangtang takoh ang. 7Phumma, nangma nganâng rangmesoam hangko, areheh phangtang nangrãng dângmin.”
8Jisu ma dânthâng wah, “Joban nyapraangma ngaeka, ‘Teso nang Joban nâng lolo soam o, ngale atelolo toak asân o!’ ”
9Erediko juchhih ma Jeroselem wah Rangsoamhum wah choangthôan ko sietwên lahma atenâng ngatwah, “Nanga Joban Chha medang oko, nangdede arekowah jâriikao. 10Chenrãngma ngako, Joban nyapraangma ngaeka, ‘Joban ma rangkhethung wah ate ngintatte hehnâng nang tângloatrãng echien a.’ 11Erediko aroh ngalahma memin tonga, ‘thinma thindekko nang etãngloho, erohwah nangda pa longko lebuhrii edango.’ ”
12Phumma Jisu ma dânthâng wah, “Joban nyapraangma aroh ngaeka, ‘Nang Teso Joban hung nektoan.’ ”
13Chenthu juchhihma Jisu nâng rongrup ngema hungtôan diko, atema Jisu chhutherãng thinphewah.
Jisu ma Ate Moatlem Galili nâng Bengmoat
(Mt 4.12-17; Mak 1.14,15)
14Erediko Jisu Galili nâng ngakkatwah, ngale Asâthôanju chaanpa ate demko dângwah. Ate nginpa erekowah diaktang nâng khêmtatwah. 15Atema Sanagog hehnâng phoanghethô rewah, ngale anga ngama atenâng rôwah.
Jisu Nazarat nâng Thãsê
(Mt 13.53-58; Mak 6.1-6)
16Erediko ate dong alotah Nazarat hahnâng Jisu katwah, ngale jahan rangwowah rãngrãng Pientông jâko Sanagog nâng hokwah. Atema Joban nyapraang weihrãng tôanchepwah 17atenâng mõng Isaia titab pa chohkoh wah. Atema nyapraang tenpa jânlahma are raang ekapa chohkhe wah,
18Teso Jupa ngakhohko tonga,
chenrãngma ngako atema tangchhih hehnâng Joban nginkongsen pa thôkoh rãng ren ehang.
Ngale phâtek khennâng khhekrii lahma tôngte hehnâng thinlaangphe nginpa thôkoh rãng ren ehang ngale mitdoak hehma jienkhe;
ngale mihkhennâng chêmte heh loatsiet
19Ngale Teso ma ate mihnyan heh pepâng sanpoat pa lânamtha ngama thôkoh rãng ren ehang.”
20Jisu ma nyapraangpa tenlahma erekowah moatlem chohsokte ko ngakkoh lahma tôngthinko tôngwah. Sanagog wah chentô mihnyan hehma atenâng sokwah, 21ngale atema thinnâng ngatwah, “Ngama are Joban nyapraang weih ekangpa nema lâtattet, erohwah are raang ekapa thejâ toangtang lâdangtah.”
22Thin chentôma Jisu nâng senchoh wah ngale Jisu ma jabkhabsen jabpa tat lahma bârit rewah. Thinma ngatwah, “Atea Josep chha ledangne?”
23Jisu ma thinnâng ngatwah, “Ngama ajet are nginthakthô pa nema nganâng engaha, ‘doktor, nangdede mesietriio.’ Ngale ngama ajet nema nganâng Kaparnam nâng chenroh molohma tattih a ererãngrãng nenok nehah nângmin mo o ngama echienha. 24Jisu ma thinnâng ngatwah, Ngama nenâng arepa thôkoh eka,” “Mõng hehnâng thinnok ahah wah hehma putedâlem mah. 25Nga nginko jetat tanha: Arepa toangtang ngin, Ilija mõng sanpoatko Isrial nâng janthoinyu heh jahmõang dângwah, chenthu rangpâ pârem khathe ranglepat dangtah poatko Isrial diaktang remdong remlahma dângwah. 26Rohkomin Ilija Isrial diakwah mihnyan heh tânâng lechien chhoanwah, Sidon diakwah Zarepha hahko sôngte janthoinyu tânâng loloba chienkatwah. 27Ngale mõng Ilija sanpoatko Isrial nâng ajahthem mihnyan heh angêm khoanchet chohlahma chêmlahma dângwah; rohkomin wanthejô senho, Sirien jat Naman loloba angêm khoanchet kowah sênwah.”
28Chenthu Sanagog wah mihnyan hehma arepa tatphumma thin rinkhah wah. 29Mihnyan hehma toanchep lahma hahdaang kowah sietphe chhoanwah, ngale thinhah wah hahhokho choangthôan ko sietwênwah. Thinma ere kakho pumma Jisu jâthinkat rãng phungwah, 30Rohkomin mihnyan heh mongtung pumma Jisu loatkhoam chhoanwah.
Mihnyan Wathenâng Juchhih Lup
(Mak 1.21-28)
31Erediko Jisu Galili wah Kaparnam hahnâng katwah, ngale enângmin Pientông jâko mihnyan hehnâng hethô wah. 32Jisu ma hethôpa khelahma thin phangtang bârit rewah, chenrãngma ngako atema chaan demnâng hethô wah. 33Sanagog khenko juchhih luplahma mihwa wathe dângwah; atema chaanmõang hôngrakwah, 34“O! Nazarat wah Jisu, nangma ninâng chennire hun ehia? Nanga ako ni chhihsietrãng hûeroa? Nanga hen a erepa ngama jet e: Nanga Joban wah Asâthôan nginmatte!”
35Jisu ma juko ngatwah, “Kihtong lohma mihnyan kowah loatchhoan o!” juchhih ma mihnyan pa thinmako loangsietthien lahma atenâng lihân chenjô maksak lehoan thangma loatchhoan wah.
36Mihnyan heh phangtang barii lahma wathema wathe nâng jabmînwah, “Are heh chenni jabeka? Are mihnyan pumma chaan demnâng jablahma juchhihko ngatko, juchhih pa loatchhoan eka!” 37Ngale Jisu nginpa ere diakko phangtang nâng khemchoh tatwah.
Jisu ma Jahmõang Mihnyan Mesiet
(Mt 8.14-17; Mak 1.29-34)
38Jisu Sanagog wah loatchhoan lahma Simon humnâng wângwah. Simon tangnyu nyongpa nyahrãng chaankhun lahma dângwah, ngale thinma Jisu nâng ate ngin pa thôkoh wah. 39Jisu wãng lahma khunte jupthin tâko chepwãng lahma khoanchetko atewah loatchhoan o ngama ngatwah. Phumma khoanchet pa atewah loatchhoan wah, ngale lemlienma toansat lahma thinnâng khoakhêm wah.
40Sanlup diko mâmâ jatjat khoanchetma chêmte heh thin lemruchha hehma Jisu tânâng siethokwah; Chentônâng Jisu ma ate dekma sahlo lahma phangtang mesietwah. 41“Nanga Joban Chha!,” ngama raklahma melâng mihnyan wah juchhih loatchhoan wah.
Jisu ma juchhih hehnâng chennimin jab aja thuk ho, chenrãngma ngako thinma atea Misaia ngama jetwah.
Jisu ma Sanagog nâng Joban Nginthô
(Mak 1.35-39)
42Rangwo phumma Jisu erehah kowah loatchhoan lahma mihnyan henjô aho thenâng chhoanwah. Phumma mihnyan hehma ate phoanglêmwah, ngale chenthu thinma chohlem phumma, thindem wah lechhoanthuk turãng thônghûnwah. 43Jisu ma thinnâng ngatwah, “Ngama hahhan hehnângmin Joban Hahsông Nginkongsen pa phoangthô kohmin, are rãngma jôba Joban ma nga chienkat ehang.”
44Ngale atema erediak kowah Sanagog phangtang nâng Joban nginpa phoangthô kohwah.
Currently Selected:
LUK 4: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
