LUK 22
22
Jisu Lelatnâng Ranchep
(Mt 26.1-5; Mak 14.1,2; Jhn 11.45-53)
1Wichhi lesak pheban phhek lokuh pa thângnemnem dângwah, arepa Adankhoam lokuh ngamemin ngaeka. 2Soam aroakte adong ngale Niemarang hethôte heh mihnyan heh ranchei dângwah, ngale erohwah thinma Jisu ahuhchha ma ritphe rãng themawa wah.
Jisu Chênseng Rãng Juda Nyoak
(Mt 26.14-16; Mak 14.10,11)
3Erediko Jisu dijunte echhi wanii kowah wathe nâng juchhih lupwah, ate mînpa Juda Iskarot dângwah. 4Ere diphumma Juda soam aroakte adong ngale Rangsoamhum bemte adong heh tânâng wãng lahma atema thin demnâng Jisu chênsâng ngin thômîn wah. 5Thin nyahrãng khuhah lahma ngun koh e ngama ngatwah. 6Juda thin nginko nyoak lahma mihnâng hennâng min lejetrii thangma thindeknâng Jisu loatthukrãng sanpoatsen lêmsokwah.
Jisu ma Adankhoam Lokuh Phhekchhah chhahrãng Khoakhêm
(Mt 26.17-25; Mak 14.12-21; Jhn 13.21-30)
7Wichhi lesak pheban phhek lokuh poatko Adankhoam Lokuhrãng saak joatjâ rangwo pa hokwah. 8Jisu ma Piter ngale Jon ninâng are ngin heh thôko lahma chienwênwah: “Wãngletma nãngkhuma chhahrãng Adankhoam lokuh phhekchhah pa khoakhem wãngen.”
9“Nangma chenriang nâng khoakhêmrãng hun ekoa?” ngama thinma atenâng chienwah.
10Atema dânthâng wah, “Ne hahdaangko wângko, jo hènlahma mihwa echohmin hèn. Phumma ate lupwãng eka humko junlup wãngen, 11ngale ere hum tângte wako thôkoh en: ‘Hethôte ma nangnâng chhien eho, chenko ngadijunte ngale ngama Adankhoam lokuh phhekchhah chhahmin a?’ 12Atema lemtokdâng ko nyahrãng khoakhem lahma thewanthe ekhesok hèn, eretheko nema chentôpa khoakhem lahma echohkhe en.”
13Thinma wãng lahma Jisu ma chenroh thôkohtah a ererãngrãng chohkhe wah, ephumma thinma Adankhoam lokuh phhekchhah pa eretheko khoakhêm wah.
Teso Phhekchhah
(Mt 26.26-30; Mak 14.22-26; 1 Kor 11.23-25)
14Sanpoat hokphumma, Jisu ma moattat chhoante heh demko khoangko tôngwângwah. 15Jisu ma thinnâng ngatwah, “Ngama chêmchoh mako are Adankhoam lokuh phhekchhah pa nedemnâng nyahrãng roamchhah hun ekang! 16Chenrãngma ngako ngama nenâng thôkoh eka, Joban Hahsông moatlem pa phangtang mata tamo, ngama are phhekchhah pa lethechhah tumin.”
17Jisu ma bâti toanlahma Joban nâng dangkoh a ngat rangsoam lahma ngatwah, “Arepa thaha ngale nekhuma phenjok en. 18Ngama nenâng thôkoh eka, ade phumma Joban Hahsông pa makakako ngama are penriti kowah lethejok tumin.”
19Erediko atema bankên chhupthe toanlahma Joban nâng dangkoh a ngat rangsoam lahma chhupsietwah, ngale thinnâng kohlahma ngatwah, “Arepa ngaphoang, nekhurãng koh ekang. Arepa nema nganâng chhemhunrãng mo en.” 20Ererãngrãngjô, rangjâ phhekchhah chhah diko atema aroh ngalahma thinnâng bâti kohwah, “Are bâti kowah ngahei demko Joban wah toamnyan semlahma tonga, are ngahei pa nekhurãng hongeka.#22.20: wanwanthe ma arepa ngaphoang ngama ngatdiko Jisu jabkhab raangmah vars 19 le 20 phangtang nâng raangmah.
21“Rohkomin sûtan en! Nga chênsângte pa ngademko are khoangko johtong lahma tonga! 22Mihnyan Chhapa Joban ma chenroh themawa eka eroh eriia, rohkomin are nga chênsengte mihnyan rãngma chentô chhih dângmin a!”
23Nãngkhuwah are moattepa hendângmin a ngama, thindede thôngphâ mînwah.
Adongthôan Dâng junma Chhiakmîn
24Dijunte heh wah henpa adongthôan dângmin a ngama chhiakmîn wah. 25Jisu ma thinnâng ngatwah, “Joban lejette mihnyan heh lowang hehma thin mihnyan heh khohko leng achaanrii lahma pên eka, ngale thôte jabte hehma nia ‘Mihnyan nâng chohsokte’ ngama ngarii eka. 26Rohkomin nekhu eroh ledangmin; erenoma, nekhuchhang wah adongthôan pa letathôan rãngrãng dângmin, ngale lemsênte khhepho thôan pa haa rãngrãng dângmin. 27Henpa adongthôan a, phhekchhah chhahrãng tôngte pele akhoamkhêmte pa? Phhekchhah chhahrãng tôngte pa adongthôan eta dangthêm a. Rohkomin nga a nekhu chhangko khoamkhêmte rãngrãng dangekang.
28“Ngama chêmchoh poatko nekhu nga demnâng johtongtha; 29ngale rangkhethung wah nga Wama nganâng chenroh pênthuk ehanga, ererãngrãng ngamemin nenâng pênthuk eka. 30Nga Hahsông theko nemin ngademko aroamma ejoh jokphhek chhahha, ngale nemin Lowang tôngthinko tongletma echhi kunii Isrial heh epên en.
Piter ma Jisu Jetmek ngama ngat pa Jisu ma khemama Jetwah
(Mt 26.31-35; Mak 14.27-31; Jhn 13.36-38)
31“Simon, Simon! Tattan! juchhihma ne phangtang hungtoanrãng chaan lâchohtah, pitmoatte ma chhahphathoak kowah chhahsek heh rângrenthien arãngrãng mihnyansen hehmin mihnyan chhih heh demwah renthienmin. 32Simon, rohkomin ne putedâlem pa nekchen chhihjâ eken ngama rangsoam koh eka. Ngale chenthu nanga ngatânâng mengak huthoko nangpho anaa heh hung dongsiet o.”
33Piter ma dânthâng wah, “Teso, nga nangdemnâng phâtek nângmin tajoh wãngrâng, ngale ritmin tajohriie!”
34Jisu ma ngatwah, “Piter, ngama nangnâng thôkoh eki, thejâ rangpen nangma nga jetmahhang ngama ditrem lenga koko wo lewênmin.”
Ngun, Tõng akhak, ngale Deng
35Erediko Jisu ma ate dijunte hehnâng chhienwah, “Chenthu ngama nekhu, ngun, tõng akhak, ngale dapheng lekep thangma chienchhoantah ko nekhuma chennâng thoamtet a?”
“Chenni nângmin thoamho,” ngama thinma dânthâng wah.
36Ngale Jisu ma ngatwah, “Adephumma, henhen nâng ngun akem ngale tõng akhak tonghèn a ereheh nema kepen; ngale henhen nâng dãng ahoa nememin ne chhemchong heh sengletma dengri en. 37Joban nyapraangma ngaeka pa ngama nenâng thôkoh a, ‘Atemin kaamchhih moatte heh demnâng johdangthuk eka’ ngama ngaeka pa toangtang dângwângmin, chenrãngma ngako ngarãng chenni raangtah a ereheh toangtang dangwãng era.”
38Dijunte hehma ngatwah, “Sûtan! Teso! areko dãng wannii tonga!”
“Erepa lâletah!”#22.38: Erepa lâletah; ba Arepa letah. ngama ate dânthâng wah.
Jisu ma Oliv Hahhokho ko Rangsoam
(Mt 26.36-46; Mak 14.32-42)
39Jisu ere hahdaang kowah loatchhoan lahma jâhanwah rãngrãngjô Oliv hahhoko wãng lahma rangsoam wângwah; ngale dijunte hehmin ate demko johwângwah. 40Jisu eretheko hukhoam lahma ate dijunte hehnâng ngatwah, “Achhih nâng nekchen jârii ekenma nemin rangsoam en,”
41Erediko thin tâwah amãnchha taangchhoan lahma dakuhtho lahma rangsoam wah. 42Atema ngatwah, “Ewa, nangma mehun oko are ngawah chêmchei pa rephe kohhang. Rohkomin ngama hun ekang junko dangmah, nangma chenroh hun eko erejunko chendanga.” 43Rangkhethung wah Joban ngintatte kalahma atenâng chaan chohkoh katwah. 44Nyahrãng chêmrii lahma rang chaansoam wah; ate ranglêmti pa hei jenwah rãngrãng hahko jâjenwah.#22.44: wanwanthe nâng vars 43-44 pa aho
45Rangsoam wah toanchep lahma ate dijunte heh tânâng katwah, phumma juplek lahma khekat wah, ngale nyahrãng hungchhih rekmah dângwah. 46Atema thinnâng ngatwah, “Chenrãngma juplek eken a? Toansat en, ngale achhih ma hungtôanko nekchen jârii ekenma rangsoam en.”
Jisu Loatkhhek
(Mt 26.47-56; Mak 14.43-50; Jhn 18.3-11)
47Jisu ma ngin thôthuko echhi wanii dijunte kowah wathe ate mînpa Juda ma lemsen lahma mihnyan heh jahmõang hokwah. Juda khoamwãng lahma Jisu nâng chupjok wah. 48Phumma Jisu ma ngatwah, “Juda, nangma chuplohma Mihnyan Chhapa chênsãng ekoa?”
49Chenthu Jisu demwah dijunte hehma erekowah chenni dangeka erepa khelahma thinma Jisu nâng ngatwah, “Teso, nimemin nidãng ma doak ea?” 50Ngale thinkhuchhang kowah wathema soam aroakte dong haa nâng doaklahma ate nâ jâdoakwah.
51Rohkomin Jisu ma ngatwah, “Thânga, are tôko chendanga!” Phumma Jisu ma erewa nâko sahlo lahma mesiet kohwah.
52Erediko soam aroakte adong, ngale Rangsoamhum bemte, erediko erethe kowah ate loatkhhek rãng hokte khhepho phannang hehnâng ngatwah, “Nga a mihngoan rãngrãng dãng apah kepletma nga loatkhhek rãng hûeren a? 53Nga roantang nedemko Rangsoamhum nâng dângko, nema lokhhek mahtha. Rohkomin athângheh nema moat sanpoat, ngale rangnyek ma pên sanpoat.”
Piter ma Jisu Jetmek ngat
(Mt 26.57,58,69-75; Mak 14.53,54,66-72; Jhn 18.12-18,25-27)
54Erediko thinma Jisu khhek lahma soam aroakte adongthôan humnâng sietwênwah; ngale Piter taangtaang manko danglahma junkhoam wah. 55Hum thakho nyahrãng mongtangko wen thhekwah, ngale erekowah wentûmlit tôngte heh demnâng Piter min johtông wah. 56Chenthu dihiaknya haa wathema wenko tonglahma khe phumma, atenâng nyahrãng thongthong sûlahma ngatwah, “Are mihnyan pemin Jisu demko dângwah!”
57Rohkomin Piter ma dangmek ngatwah, “Dihiaknyu, nangma chenni ngaeko erepa ngama jetmek!”
58Eredi chuthe ritko mihwa wathema Piter lepkhe lahma ngatwah, “Nangmin Jisu dijunte heh demwah jôba!”
Piter ma dânthâng wah, “Mihwa, nga a thin demwah dangmek!”
59Ngale koantathetô diko mihhan wathema nangmin Jisu demwah jôba ngama nyahrãng chaanloatwah, “Chêmtungmaang thin aho, are mihnyan pemin Jisu demwah jôba, chenrãngma ngako atemin Galili jat!”
60Rohkomin Piter ma dânthâng wah, “Mihwa, nangma chenni jab eko arepa ngama jetmek!”
Lemlienma, atema jabthu thuko wo hôngwênwah. 61Teso ma litphong lahma Piter nâng thongthong ngiaksok katwah, ngale erepoatko Teso ma atenâng ngatah pa Piter ma thônghun wah, “Thejâ rangpen wowên mako, nangma nga jetmahhang ngama lôrem enga hang.” 62Piter loatchhoan lahma nyahrãng sepchhoanwah.
Jisu nâng jôjêm ngale Awat
(Mt 26.67,68; Mak 14.65)
63Jisu bêmte mihnyan hehma atenâng jõjêm lahma wat rewah. 64Ngale thinma mit doapkhhek lahma atenâng chhienwah, “Henmawat eho? That jettan!” 65Ngale ahan jabkhab chhih hehmin atenâng jôjêm lahma ngatwah.
Jisu Jews heh Khhepho heh tânâng siethok
(Mt 26.59-66; Mak 14.55-64; Jhn 18.19-24)
66Eredijâ rangkhahko, khhepho phannang heh, soam aroakte adong heh, ngale Niemarang hethôte heh chohmînwah, ngale ngoang awang heh tâko Jisu siethokwah. 67Thinma ngatwah, “Ninâng thôkohhi, Nanga Misaia ne?”
Atema dânthâng wah, “Ngama nenâng methôkoh akomin nema nganâng pute mahha; 68ngale ngama nenâng ngin wah methongpha komin nema dânthang mahha. 69Rohkomin ade phumma Mihnyan Chhapa Achaanthôan Joban dekchahko etonga.”
70Thin phangtangma ngatwah, “Eroh medang oko nanga Joban Chhane?”
Atema danthâng, “Nema Joban Chha ngama lâpun ngatha.”
71Ngale thinma ngatwah, “Nima lihân hâkhi lemtumih! Atema chenni jabeka arepa nidedema lâchoh tattih!”
Currently Selected:
LUK 22: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.
