LUK 16

Haa Chhih Thakthô

1Jisu ma ate dijunte hehnâng ngatwah, “Rekthenâng techhuwa wathe nâng atehaa pumma ate thiak aman heh sûare kolahma dângwah. Phumma techhu wako nanghaa pumma nangngun heh mahto nâng phoangmah metphekoh eho ngama thôkoh wah, 2Ephumma humkhen nâng roolahma atenâng ngatwah, ‘Ngama nang nginpa chenchohtat ekanga? Nangma ngangun chentô thientoh a ereheh phangtang kephûro, chenrãngma ngako nanga ngangun thiente ledangtumin.’ 3Haa pumma atedede nâng ngatritwah, ‘Nga tângte pumma ngakaam wah junloatmin lâdangthang. Ngama chenre tumin a? Ngama hahthut kaammin tamomek, ngale mihwah chutphhek chhahrãngmin rêsê. 4Ngama chenni moatmin a erepa ngama jet ang! Chenthu nga kaamwah mejek tekko, ngalemruchha hehma thinhumnâng eroo hang.’ 5Ephumma haa pumma ate tângtewa wah thãpê kepte heh phangtang khôanroo lahma thinnâng thôngphâ wah. Atema khebeng wahko thôngphâ wah, ‘Nangma nga tângte wako thãpê chentô pêlohma tongoa?’ 6Atema dânthâng wah, ‘Oliv tien châthe litat pêlekma tonghang,’ phumma haa pumma atenâng thôkoh wah, ‘tongo, ngale roakbangâ raango.’ 7Erediko atema ahan wathe nâng chhienwah, ‘nangma chentô pêlohma tongoa?’ ‘Ngama chhah hahjatthe din pêlekma tongang,’ ngama dânthâng wah. Haa pumma ngatwah, ‘nang nyapkha pa anã, nangma châeset din raango.’ 8Erediko haachhih pumma nyahrãng buthithi lahma moatdi ate tângtewa pumma atenâng rôwah; eroh jôba Joban wenphiak nâng tôngte mihnyan heh noma are hahtokkhoh kowah tôngte mihnyan chhih hehma ajah chhihmo eka.”

9Ngale Jisu ma ngatwah, “Ngama nenâng thôkoh eka: Hahtokkhoh kowah ne ngun akem le too achhah heh lemruchha pekrãng kepen, chenthu nema eroh memotetko, nea roantang roanjêng humnâng eroohen. 10Henhen-ma amãnchha pa senthemthem toangtangma jiensem eka erepumma ajah pemin toangtangma ejiensem a; Henhenma amãnchha pa toangtangma lejiensem dangeka erehehma ajah pemin toangtangma lejien semmin. 11Nema are hahtokkhoh kowah chhahkhem heh toangtangma lejiensem medang enko, rangkhethung wah toangtang chhahkhem heh jãtang chenroh ejiensemthuk a? 12Ngale mihhan thiakpa nangma toangtangma lesem medang oko, nangthiakpa henma nangnâng ekohhoa?

13“Henmin tângte waniihaa tajien dangmah; ererãngrãng haa pumma watheko chhihchoh erea, ngale watheko sênchoh erea, ba wathe nginkepkep edanga ngale wathe nginlekep edanga. Nema Joban le ngun waniinii jienroam khoakhem met.”

Jisu ma Jabwah Nginkhab

(Mt 11.12,13; 5.31,32; Mak 10.11,12)

14Chenthu Farasi hehma erengin heh tatphumma thinma Jisu nâng dûmmek wah, chenrãngma ngako thinma ngun nâng hunwah. 15Jisu ma thinnâng ngatwah, “Nea nededema mihnyan heh mitsokko toangtang rãngrãng dangrii eken, rohkomin nehung pa Joban ma ajet. Chenrãngma ngako chenre pa mihnyan rãngma nyahrãng alemli thôan dangeka erepa Joban rãngma sekhota.

16“Mosa Niemarang le Mõng hehma raangwah heh Jon baptis sanpoat tôko lolo mihnyan hehma kepwah; phumma chenthu Joban Hahsông Nginkongsen pa hongthô phumma chentô mihnyan heh Joban Hahsông Nginkongsen lemkhôko anga nga jienhokrãng latriieka. 17Rohkomin Joban jabkhabwah mitchhuptô wanthe mahjâ noma rangle hah ba eta mahjâa.

18“Henma komin ate tangnyu pa chiakphe lahma tangnyu ahan methekep ako atea ere dihiaknyu demko kaamchhih lâmotah; ngale henma komin achiakphe retah dihiaknyu pa kepeka ere kepte pumma dihiaknyu demko kaamchhih moeka.

Techhuwa ngale Lazaras

19“Rekthenâng techhuwa wathema nyahrãng thãchaan khet akhu heh kep ngale rangwo roakweih chenmin lethoam thangma songtong lahma dângwah. 20Ngale tangchhihwa ate mînpa Lazaras ngamemin wathe dângwah, Lazaras sekko mâlolo dângwah, ngale Lazaras pa techhuwa kâsekthong ko chîsiethok wah, 21Techhuwa pumma jâphe eka chempha heh echoh toanchhah ang ngama dâlem lahma chîhokwah. Ngale hu hehmemin hûlahma ate mâ hehnâng thhelima liapdek hokwah. 22Tangchhihwa pa ritdiko rangkhethung wah Joban ngintatte hehma sietwên lahma rangkhethung wah kuhhôan thinnâng Abraham tâko tôngwâng thukwah. Techhuwa pemin riilahma ate mangpa bînkatwah. 23Ngale ritthin thenâng,#16.23: ritthin thenâng: rit amah thenâng. ate nyahrãng chêmchoh lahma dângwah, ngale atema sûwên tahpa Abraham tâko Lazaras tonglahma taangmõang nâng khewên wah. 24Ephumma atema rakroo wênwah, ‘Wa Abraham! nganâng mammînchen hang, ngale Lazaras chienkat mêngro, ate deksupa jonâng rumkat lahma nga thheliko jokihma chenkihthhên katmênghang, chenrãngma ngako nga are wenkhhenko nyahrãng chêmrii ekang!’ 25Rohkomin Abraham ma dânthâng wah, ‘Thatthong hun tan, echha, hahtokkhoh wah nang roandông poatko nangnâng chentô sensenlipa phangtang kohtih, phumma Lazaras ma chentô achhih chhihlipa chohtah a. Rohkomin atea anâng khuhah nâhah tongeka, nanga chêmchoh lohma tongeko. 26Ngale nãngtungko jông lûmõang tonga, erohwah are thekowah nang tânângmin jiendanka mahra, ngale nangtong eko thekowahmin anâng henjô jiendanwãng mahren.’ 27Techhuwa pumma ngatwah, eroh medang ako ‘Ewa Abraham, ngama nangnâng rosep eki, Lazaras pa ngawa humnâng ngakchien katmêngo, 28Nganaa paangmih Wabangâ tonga. Lazaras wãng lahma thinnâng chenthô mêngkoh a, erohkoba thinmin are chêmchohtheko leka edangwak ra.’ 29Abraham ma ngatwah, ‘Nangnaa hehnâng thôkoh rãng Mosa ngale mõng hehma raangwah heh tonga; thinma chenni ngaeka erepa nangnaa hehma chentat a.’ 30Techhuwa pumma dânthâng wah, ‘Ewa Abraham! erepumma lolo thôkoh pa lemah, Hen komin ritwah ngaksat lahma thinnâng lethôkoh kako thinpap wah hung lelitmin.’ 31Rohkomin Abraham ma ngatwah, ‘Thinma Mosa ngale mõng hehma raangwah hehnâng lepute kako, rit wahjô ngaksat lahma methôkoh akomin thinma lepute min.’ ”

Currently Selected:

LUK 16: NOKTBSI

Highlight

Copy