LUK 10

Jisu ma Roakengit - Wanii Chienchhoan

1Erediko Teso ma ahan roakengit wanii moattat chhoante mihnyan heh rênwah#10.1: roakengit-wanii; wanwanthe ma 70 ngama raangeka. ngale ate chhoanthin hahdaang hehnâng ngale chentô thenâng ate mako wanii waniima chienchhoanlâ wah. 2Jisu ma thinnâng ngatwah, “Chhah munchoan pa jahmõang tonga, phumma ereheh khôankhenrãng moatlem moatte pa amãnchha. Erohwah chhah munchoan tângte wako, ate chhah munchoan heh khôankhenrãng moatlem moatte chenchien katra ngama rangsoam en. 3Chhoan en! ngama soanchhang nâng saak rãngrãng chienchhoan eka. 4Ngunmin nekkepen, ngale tõng akhak, erediko daphângmin nekkepen; erediko mihnâng phoangranjab rãng lemnâng nekchepen. 5Chenthu ne mihhum khennâng melupwãng tetko, khebengko, ‘Are humko Joban ma rangkohmin ngama rânjab en.’ 6Phumma ere humko mêmo - nâng hunte mihnyan mesong ako, nema rangsoam koh eken pa ere humko chentonga; mêmo nâng hunte mihnyan ledang medang ako erepa ngakkep re en. 7Ere humko tongen, ngale thinma nenâng chenni jokphhek chhahthuk ehèn a erepa jokphhek chhah en, chenrãngma ngako moatlem moatte hehnâng thin dekbi pa kohmin. Humthe wah humthenâng nekphoang chhoan en. 8Chenthu komin nea sumhahnâng chhoanko metangroo hènko, nenâng chenni koh ehèn a arepa jokphhek chhah en, 9ere sumhah kowah khoanchette heh sensiet re en, ngale erekowah mihnyan hehnâng, ‘Joban Hahsông pa netânâng lânam hutha’ ngama thôkoh en. 10Rohkomin chenthu ne sumhahnâng chhoanko letangroo medang hènko, noknyu lemdongnâng chhoan letma ngaen, 11‘Ne hah wah nida nâng bum khep ekapa nima ne lelatnâng finekthien eki. Rohkomin thonghun en Joban Hahsông pa netânâng namhûtha!’ 12Ngama nenâng linlin thôkoh eka, khope rênjâ rangwo ko Joban ma ere sumhahko mînchen noma Sodom nângba mînchen pa ajah ekhesok a!!

Hunglelit Hahdaang

(Mt 11.20-24)

13“Korajin, nangrãngma chentô cheili dângmin a! Batsida, nangrãng memin chentô cheili dângmin a! Ne tânâng patritli moatlem motekpa Tair ngale Sidon nâng moat nomako, papwah hunglittih ngama jetthukrãng, enângwah mihnyan heh chenthu thuma bosta khetpa kep ngale bumma thinkhoko phuhrii chenre tah! 14Ju khope rênjâ rangwo ko Joban ma nenâng khesok noma Tair ngale Sidon nângba mînchen pa ajah ekhesok a. 15Ngale Kaparnam! nangmin rangkhethung nâng lânleproh chôangritwâng huntoh a? nanga pap wendô dongkhohko ejâsietkat e!”

16Jisu ma ate dijunte hehnâng ngatwah, “Henhenma ne ngintat ehèn a, erepa nga ngintat ehang; henhenma ne letangroo dang ehèn a, arepa ngamin tangroo mahhang; ngale henhenma nga letangroo dang ehanga arepa nga chienkatte pemin tangroomah.”

Roakengit-Wanii Moattat Chhoante heh Ngakhok

17Roakengit - wanii moattat chhoante#10.17: 72 wanwanthe nâng 70 pa tonga (vars 1 ko tasûe). mihnyan heh nyahrãng khuhah nâhah ngakhok wah. Thinma ngatwah, “Teso,” “Nima nangmînko juchhih hehnâng ngatko thinma ni nginkep ehi!”

18Jisu ma thinnâng dânthâng wah, “Ngama rangwah joak rangdãng khiapda rãngrãng jâka lahma khetek. 19Tat en! Ngama nenâng chaan koheka, erohwah nema pû ngale gusirong khohnângmin takhoam en, ngale chentô Ran heh tâjien Chaanmin koheka, ngale nenâng chenni mejô letâmin. 20Rohkomin juchhih hehma ne ngin kepdi nekroan en; erenoma ne mînpa rangkhethung nâng raangdiba roanrii en.”

Jisu Khuhah

(Mt 11.25-27; 13.16,17)

21Ere sanpoatko Asâthôanju demnâng Jisu nyahrãng khuhahwah#10.21: Asâthôanju ma; wanwanthe ma Asâthôanju ngama raangeka; ahan hehma ate Ju khennâng ngama raangeka. ngale atema ngatwah, “Wa, rangkhethung ngale hahtokkhoh Teso! Ngama nangnâng dangkoh a ngaeki, chenrãngma ngako, nangma jet ajien hehnâng lekhesok thangma huhriem tohpa nokba hehnâng khesok eko. Linlinjô Wa erohpa nanghung junko dangeka.

22“Ewama nganâng chentôpa lâkoh thang. Henmemin Chhapa hen a arepa jetmah, Wama loloba jeteka, ngale henmemin Wapa hen a arepa jetmah, Chhama loloba jeteka, ngale hennâng Chhama jetthukrãng ren eka ereheh meba jeteka.”

23Erediko Jisu ma dijunte heh ngeko ngiaksûkat lahma thinnâng lolo ngatwah, “Nema are kheken heh chohkhe pa nea chentô khengraangsên a! 24Ngama nenâng linlin thôkoh eka nema chenni kheken a erepa ajahthem mõngama ngale lowang hehmemin chohkhe huneka, rohkomin thinma chohkhemah, ngale nema chentat eken a erepa chohtat huneka, rohkomin thinma chohtatmah.”

Samaritan Mihnyansen Thakthô

25Niemarang hethôte wathe hûlahma Jisu ngin nâng bukritthuk hunwah. Atema Jisu nâng thôngphâ wah, “Hethôte,” “Ngama roantang roanjêng khope chohrãng chenni moatmin a?”

26Jisu ma atenâng dânthâng wah, “Joban nyapraang nâng chenroh ngaeka? Nangma Joban nyapraangpa chenroh rângweih oa?”

27Mihwa pumma dânthâng wah, “ ‘Nang Teso Joban nâng nanghung nangrin phangtang kohlohma hun, ngale nangju phangtang koh o, erediko nangchaan phangtang kohlohma hun o’; ngale ‘Nang tok akhung wah mihnyan hehnângmin nang dedeko hunriieko rãngrãng hun o.’ ”

28Jisu ma dânthâng wah; “Nangma toangtang lâjabtoh,” “Nangma eroh memo oko roantang roanjêng khope echoh o.”

29Rohkomin Niemarang hethôte pa atedede toangtang ngatrit hunlahma, atema Jisu nâng ngatwah, “Ngatok ngakhung wah mihnyan heh hen a?”

30Jisu ma atenâng dânthâng wah, “Rekthenâng mihnyan wathe Jeroselem wah Jeriko nâng katwah, phumma ahuhte ma khum lahma ate khet akhu heh chiensiet lahma atenâng watlahma riinemnem phethien wah. 31Phumma erelem pumma soam aroakte wathe kalahma dângwah; chenthu atema mihma wattah mihnyan pa khephumma lemhan ngenâng kekhôam chhoanwah. 32Erelem pummejô soam aroakte hehnâng chohsokte Livi kalahma mihma watlahma phethientah mihnyan pa chohkhe wah, phumma atemin lemhan ngenâng kekhôam chhoanwah. 33Phumma Samaritan mihnyan erelem pummejô kalahma mihma watlahma phethientah mihnyan tâko hokkatwah, phumma atema ere mihnyan pa khelahma nyahrãng hungchhih ngale mînchenwah. 34Mihwa tâko kalahma tienma hutkohwah, ngale angurtima mâ heh chatko lahma khhekkoh wah; erediko atema mihwa pa ate mokkhohko chhangthuk lahma mihhum khennâng sietwên lahma sokare wah. 35Eredijâko atema janngun phanii loattoan lahma humkhen wah kaammoatte mihnyanko kohwah. Ngale ‘Senthemthem sûare mêngo,’ ngama atenâng ngatthien wah, ngale chenthu nga arelem pumma mengak kathangko, nangma ate sokare ko chentô mettoh heh engakthum e.’”

36Ngale Jisu ma athôanko thôkoh wah, “Nang junko, ere warem mihnyan kowah chen pumma ahuhte hehma watthientah mihnyanko ate tok akhung rãngrãng danglahma suare tah a?”

37Niemarang hethôte pumma dânthâng wah, “Atenâng mînchente pumma.”

Jisu ma dânthâng wah, “Nangmin chhoan lohma eroh mochhoan o.”

Martha Ngale Mariam tânâng Jisu Chohmînhok

38Jisu le ate dijunte heh thinlemnâng wângthuko, hahdaang wanthenâng lepkhoam lahma Martha ma ate humnâng tãngroowah. 39Martha demnâng atenaa Mariam ngama dângwah, phumma Mariam pa Teso dathongko ate ngin jetat lahma tôngwah. 40Martha ma chentô moatlempa ate loloma moat phumma hungkêwah, ephumma wãng lahma ngatwah, “Teso, nangma thonghun mohne, nganaa pumma chentô moatlem heh nganâng lolo mothuk ehang, atenâng thômêngkoh nganâng chenchoh moka mênghang!”

41Teso ma dânthâng wah, “Martha, Martha! Nanga ajahthem moatlem hehrãng sekmah patrii ekoa, 42wanthe loloba nyahrãng alemli thôan tonga. Phumma Mariam ma erepa lâpunrentah, ngale erepa ate ngewah leta toanchhoan min.”

Currently Selected:

LUK 10: NOKTBSI

Highlight

Copy