MARK 10
10
Awdep Yanpü Nang Jisui Epü
(Mt. 19:1–12; Lk. 16:18)
1Jisui hapa shing tuhtü Jordan homei Judea kahmükei heih. Shao khongnyü büpa shonei thai, hatü büpalei vanglem kei büpai shao hathü kü nyuh.
2Pharisee am hanei peiyei jomi büpa kü dokei, “Baha hüki laophülei nyüha mü yanhen shahkungi mongpü vaila?” shei phe. 3Büpai jom kü, “Mosai am kü mehe shahkung shuohpa?” shei e.
4Jomphongi, “Yanhen lai nyangtü pinnyü mü yanhen Mosai epeih” shei e.
5Shejao Jisui jomphong kü e, “Am mong ahshi vaanpü nangkü büpai am kü ha shahkung nyangpeih. 6Shejao kahbhao mebü Kahvangi nyüha hatü baha shei lingpeih. 7Ha vaipü nangkü baha hüki laophülei nyü hatü pa tuhphongtü laophülei nyüha mü mongjemei nyunyeih, 8hatü jijiyü phai hük leihen. Hanangkü jiji hajük kü nyi nevai, shejao hük mon. 9Hanangkü Kahvangi mehe jemhü, shennyaki ha teyantük.”
10Mechem jomphong shemei nyupa, nanglomthüi shao büpa kü ha jung phe. 11Büpai hathü kü e, “Üpai laophülei nyüha mü yanei lebü nyüha mü shem yemnya, büpai pinnyü mü mükbongjuyungnyüke; 12hatü üpai laophülei baha mü yanei lebü baha mü shem yemnya, pinnyüi büpa mü mükbongjuyungnyüke.”
Jisui Maanpü Hashihthü Moihimanpü
(Mt. 19:13–15; Lk. 18:15–17)
13Büpai laki honghühen shingvaishi shennyakthüi maanpü hashihthü büpa touei müei pei; hatü nanglomthüi hathü kü loh. 14Shejao mechem Jisui ha eepa, büpai jomphong kü mongshih-ei, “Maanpü hashihthü ngei touei peihütuh; jom kü tekhüamshuoh; mehenangkü Kahvang ongchingü hathü keipülei hih. 15Hingmei ngei am kü enyeih, maanpü hashih hük kei leitü üami Kahvang ongching neyahhenshang, halei neshüaokpih” shei e, 16hatü büpai maanpü hashihthü kü laki khaaitü büpalei laki shüngei moihimanshuoh.
Shemmeipa Hük
(Mt. 19:16–30; Lk. 18:18–30)
17Jisu yen daihen layaong shingkü shennyak hük mokei heih-ei aümei shatü büpa kü, “Nyuhbü meipü, vanyangyem mükjüp danghen shingvaishi ngei mehe dükhenang?” shei phe.
18Jisui büpa kü, “Mehekei nüngi ngei kü meipü shei nyüknya? Kahvang mü lenei üpayao meipü neshiü. 19Nüngi ha shahkung nyingei nyüke: Nüngi tejü; nüngi mükbongjuyung tedük; nüngi tegüh, nüngi shahshem denpü teshuoh; nüngi te-ühing; anyü hatü ampa kü dhüm shuohtuh” shei e.
20“Nyuhbü, ngei hashih mebü hathü peü dükei heihpeih” shei büpai e. 21Jisui büpa kü bamei veitü, “Nüng lemhüki taoei nyüke; daituh, nüng angpü lemphü yutü ha lop taopathü kü shuohtuh, hatü nüngei mop vangsholei nyuhen; hapheikü huoi, ngei phei mükei” shei e. 22Mechem hapa shennyaki ha danpa, büpa dhe yim, hatü mongshangei lüdai; mehenangkü büpa mop longi nyuteke.
23Hapheikü Jisui shinei veitü büpalei nanglomthü kü, “Shemmeithü Kahvang ongchingei shühenü meshük douwong vaihen!” shei e. 24Nanglomthüi hathü shah kü thama. Shejao Jisui shao jomphong kü, “Hapeüthü, Kahvang ongchingei shühen meshük wongpüang! 25Shemmeipa hük Kahvang ongchingei shülei meyü ut hük nyiammet sha kü shomei daipü-üng yopüba” shei e.
26Ha shah kü nanglomthü longi thamaei hüki hük mü, “Shejema, üpa yangaokhenang?” shei etei. 27Jisui jomphong kü khangei veitü, “Hangku shingvaishi hayü neaokbenüng, shejao Kahvang shingvaishi nevai; Kahvang shingvaishi dou peü aokbenüng hih” shei e.
28Peteri büpa kü, “Veituh, hamphongi lemphü tuhphongtü nüng phei müpeih” shei e. 29Jisui, “Hingmei ngei am kü enyeih, üpai ngelei men hatü shahjangmei nangkü bükhishem, jeihinaüthü, nyahinaüthü, nyü nevaijü pa, hapeüthü nevaijü kahthü tuhphong, jomi ha den kao kho lomei, 30shemthü, jeihinaüthü, nyahinaüthü, nyü, hapeüthü, hatü kahthü mü shüveidoideiyao omshi hapa den kü danghen, hatü ngoikahen den kü vanyangyem danghen. 31Shejao shongpüthü longshi shing shompü vaihen, hatü shompüthü shongpü vaidaihen” shei e.
Jempabü Jisui Büpa Dihen hatü Yangei Leihen Epü
(Mt. 20:17–19; Lk. 18:31–34)
32Shaang jomphong Jerusalemei aongpü lemei kamei nyu, hatü Jisu-ü jom shekü kamei nyu; nanglomthü thama, hatü jom phei müpüthü nyemteke. Shao büpai anpünyi hayaoha khaatei dei, hatü büpa kü mehe vamhen ha jomphong kü ehen chongpang. 33“Veituh, jenphongü Jerusalemei aongnyu khih, hatü Shennyak Ha ngongpathü hatü shahkung nyuhbüthü kü lanei shuohhen, hatü jomi büpa jühen shingvaishi nyonghühen; hapheikü jomi kung amei lak kü lanei shuohhen; 34Jomi büpa kü yaühen, yu-opi shaohen, bheihen, hatü jühen; hatü nyih jem pheikü büpa yangei leikahen.”
Jakob hi Johan Nyi-i Yüpü
(Mt. 20:20–28)
35Zebedeelei cheha Jakob hi Johan nyi büpa touei heih-ei büpa kü, “Nyuhbü, henji nyi-i mehe yühenshang ha nüngi dükshih” shei e.
36“Ngei anji kü mehe dükhahhünya?” shei phe. 37Jijinyi-i büpa kü, “Nüngei müknyinshekhang kü henji hük nüngei lakdah philei, hük laknyong philei uohen hanshih” shei e.
38Shejao Jisui jiji kü, “Anjinyi-i mehe yünya ha anji-i nenyingang. Anji-i ngei yingpü yungshong yingaokhen je, nevaijü ngei mepa baptükpai baptükhen hapakei anji-i baptükaokhen je?” shei jangei e.
39Jijinyi-i, “Aokhen hih” shei jang. Hahepak kü Jisui jiji kü, “Ngei yingpü yungshong anji-i yinghen; ngei mepa baptükpai baptük, hapai anjiyao baptükhen; 40shejao ngelei laknyong hatü lakdah philei uohenü ngei shuohhen nevai, shejao hapayü üam shing temei nyu hathü shing hih” shei jangei e.
41Mechem nanglom jom ani ha jung danpa, jomi Jakob hi Johan nyi kü mongshih. 42Hanangkü Jisui jomphong kü nyüktü, “Kung amiyü nanglakthüi üpa kü jomei vanglem lembü shei nyingnya, büpai jom shak kü ong vainyeih, hatü longpüthüyü jom shak kü ong vainyeih. 43Shejao amphong khongü hapakei nevai; amphong khongkü üpai longpü vaihünya, büpayü ammei chongphobü leihen vongbong, 44hatü amphong khongkü üpai shongpü vaihünya, büpa peüei aa vaihen vongbong. 45Mehenangkü Shennyak Ha chongphohahhen shingvaishi nevai, shejao chongphohen hatü longi angei leihen shingvaishi laophülei yangnyu shuohnüng yiüpeih” shei e.
Jisui Mükphüngpa Bartimas Meihüpü
(Mt. 20:29–34; Lk. 18:35–43)
46Jomphong Jerikolei heih. Büpa, büpalei nanglomthü hatü khongnyüi Jeriko leipü daishingkü Timaeuslei cheha mükphüngdaipü yühahjaiyingpü Bartimas lemkungei uoshi nyu. 47Mechem büpai hapayü Nazareth am Jisu khih shei danpa, büpai lenei, “Jisu, David Ha, ngei kü phahjishih!” shei e. 48Longshi shingi büpa kü nenmü nyutuh shei e, shejao büpai nyeinya wongmü lenei, “David Ha, ngei kü phahjishih!” shei e.
49Jisu shenei yaongtü, “Büpa hatouei nyükei deikei” shei e, hatü jomi büpa nyükei deiyei büpa kü, “Mongmeituh, yaongtuh, büpai nüng kü nyüknyüke” shei e. 50Hanangkü büpai ashak nyiukei shükphongtü büpa yaongei Jisu touei heih.
51Jisui büpa kü, “Ngei nüng kü mehe dükhahhünya?” shei phe. Mükphüngpai büpa kü, “Nyuhbü, ngei eehüangke” shei e.
52Jisui büpa kü, “Leituh, nüng hinglempai nüng meidaiteke” shei e. Chemjalak kü büpalei mük ee-aok, hatü Jisu phei mü.
Currently Selected:
MARK 10: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
