LUK 7
7
Jisui Rom am Longpü Hükei Chongphobü Meihüpü
(Mt. 8:5–13)
1Nanglakthüi danshi Jisui peü eyei kempheikü, büpa Kapernaumei dai. 2Halei kho hük shak kü veshan mübü hükei chongphobü üpa kü büpai longi mong hah, büpa tüngei dihen mü nyu. 3Mechem büpai Jisu jung danpa, büpai Jehoda am mübüthü hanei büpa touei shomei büpa kü peiyei büpalei chongphobü meitükshih shei khümei e. 4Mechem jom Jisu touei peipa, jomi büpa kü khümei, “Büpa kü nüngi sheühhenü shangshi nyüpeih, 5mehenangkü büpai jenei nanglak kü longi bamnyeih, hatü hamphong shing Sinagog vephopeyü büpa hih” shei e.
6Hanangkü Jisu jomphong mü dai, shejao büpa shem ngoihen yopailei nyushi kho hük shak kü veshan mübüi büpa touei büpalei küphüthüi ha ehen shom. “Shembüpa, nüng hanghi teyah; mehenangkü ngei keipülei shem dhümei nüng shenshenpü peikahen neshang. 7Hanangkü ngei nüng touei peihenü nechang shei deihpeih. Shejao nüngi shah mon etuh hatü ngelei chongphobü meidaihen hih. 8Mehenangkü ngeiyao ngei phangkü veshanthü tuh-ei vanglem phangkü nyupü shennyak hih. Ngei hük kü, ‘Daituh’ shei ejü büpa dainyeih, hatü hükpa kü, ‘Heihkei’ shei ejü büpa heihkünyeih, hatü ngelei chongphobü kü, ‘Ha düktuh’ shei ejü chongphobüi ha düknyeih” shei eteke.
9Jisui ha danei thama, hatü büpa phei müpü khongnyü philei yaakei leitü, “Ngei amphong kü enyeih, Israelei dangkao hapakei hinglempü shennyak ne-eeangpih” shei büpai e. 10Mechem shompüthü leiyei shem ngoijapa, hapa chongphobüyü meidaitü nyu.
Jisui Vaümnyü Hükei Ha Yangpü
11Hapheikü müshi#Lai haneilei “Nyihphei” shei eehen. büpai Nain shei epü jila hükei dai, hatü büpalei nanglomthü hatü khongnyü longpü hük büpa mü dai. 12Büpa mechem hapa jila pephang ngoipa, vaümnyü hükei halom dipü mahng paiyei daijaei heü, hatü pinnyü mü hapa jila kübü khongnyü longpü müshi nyu. 13Mechem Shembüpai pinnyü eepa, büpai pinnyü kü mong nemei-i deih, hatü pinnyü kü, “Tethep” shei e. 14Hapheikü büpa heih-ei mahngshung kü dük, hatü hapa paipüthü yaong. Büpai, “Nethepa, ngei nüng kü enyeih, paotuh!” shei e. 15Hapa didaipü shennyak paoei uotü shah ehen pang, hatü Jisui pinnyü kü büpa nyokei shuoh.
16Jom peü nyempai madai, hatü jomi Kahvang müknyinshekhangei, “Jen touei thibü longpü hük vamteke” hatü “Kahvangi laophülei nanglak yanghen peiteke” shei e. 17Büpa nang hapa shahjang Judea kempülei hatü shinpü kahmük peülei yanei dai.
Johan Baptükbüi Phongmokbüthü Shompü
(Mt. 11:2–19)
18Johanei nanglomthüi hathü douthü jung büpa kü ejateke. Hanangkü Johani büpalei nanglom nyi nyükei, 19büpai Shembüpa kü, “Peikahen nyupeyü nüng hi, nevaijü hami lebü hük omdanhenang?” shei phehen jiji shom. 20Mechem jiji büpa touei peipa, jijinyi-i büpa kü, “Johan Baptükbüi, ‘Peikahen nyupeyü nüng hi, nevaijü hami lebü hük omdanhenang?’ shei nüng kü phehen henji shompeih” shei e. 21Hahepak kü jiüshi Jisui dinlem longi, chamhilem, hatü mang laangi yeppüthü, hatü mükphüngdaipüthü kü mük aphüei nanglakthü longi meihüei nyu. 22Hanangkü büpai phongmokbüthü kü, “Leituh, hatü ammi mehe ee, hatü dan ha Johan kü eyeishuoh: Mükphüngpüthüi eenyüke, lakhopüthü kamnyüke, ngombüthü meidainyüke, aangdaipüthüi dannyüke, didaipüthü yangei leishihnyüke, taopathü kü shahjangmei chongvennyüke. 23Üpai ngei kü huluh neshuoh, büpa moihiman” shei e.
24Mechem Johanei phongmokbüthü leidaipa, Jisui khongnyü kü Johan nang ehen chongpang: “Ammi jahpanei mehe kü veinüng shanya? Vanglüki pingu aülaühüpü veinüng hiang? 25Shejema mehe kü veinüng shanya? Hanei ami ow meipü owpü kü veinüng hiang? Veituh, ow meipü owpüthü hatü nyiushemmei kü nyupüthüyü ongshemei nyüke. 26Shejema ammi mehe kü veinüng shanya? Thibü hük kü veinüng dainyu je? Hih, ngei am kü enyeih, thibü mao longpü hih. 27Hapayü büpa nang nyangpeih:
Veituh, ngei nüng shekü ngelei shahjang kobü shomnyeih;
büpai nüng shekü nüngei lem temhen.”
28Hingmei, ngei am kü enyeih, nyüi paipü moi khongkü Johan Baptükbü mü longpü nenyu, shejao vangsho ongching kü peü mü maanpübayü büpa mao longpüba vaihen.
29(Nanglakthü peü, lat thaipüthüao omshi mechem Jisulei shah danpa, jomi Kahvangü shahhing shei nying; mehenangkü jomphongü Johan baptükpai baptükteke. 30Shejao Pharisee hatü shahkung nyuhbüthüi laophü nangkü Kahvangei mükhong yaktük; mehenangkü jomphongü Johani bapnetük).
31“Mepa mü ngei hapa denhivan shennyakthü sheteiphenhen, hatü jomphong mehe lenya? 32Jomphongü hashihthü bhei leihshingei uotü hüki hük kü nyüktü hapakei eteipükei nyüke:
‘Hami am kü liping vüng,
shejao ammi oei nephauktei;
hami mahng kesho lok, shejao ammi mahng nethep.’ ”
33Mehenangkü Johan Baptükbü-ü hah-ao nehah, yiüao neyingi pei, hatü ammi, “Büpa kü kahshih nyüke shei enyüke. 34Shennyak Ha hah-ei yingei pei, hatü ammi, ‘Hahnempa, yiü chokpa, lat thaibüthü hatü mangthülei mongjempa kü veituh’ shei enyüke. 35Shejao pinnyülei hapeüthüi kihikonü dahshakhüteke.”
Jisu Pharisee am Simonei Shemei
36Pharisee am khongkü hüki Jisu kü büpa mü hahyinghen nyük; hanangkü büpa hapa Pharisee amei shemei peiyei nükdü touei uo. 37Mechem hapa jila kü nyupü mang yangnyu nyupü nyüha hüki Jisu Pharisee am hükei shemei hahyingnyüke shei danpa, pinnyüi vong meipü meli shong hük maei shihtü koei pei. 38Pinnyüi büpalei dokphei kü la tüngei thepei yaong, hatü pinnyülei mükphi-i büpalei la shiehü, hatü pinnyülei sho-i ha thitei ühü. Hapheikü pinnyüi büpalei la kü jüptü meli phuteke.
39Mechem büpa kü nyükpü Pharisee shennyaki ha eepa, büpai laophü nyingi, “Hapa shennyakü thibü vailangmeyü üpai büpa kü hongnya, hatü mekeipü nyühai büpa kü hongnya, büpai ha nyinghen vaipeih; mehenangkü pinnyü-ü mang shennyak” shei ehah.
40Jisui büpa kü, “Simon, ngei nüng kü ehen lemhük nyüpeih” shei e.
“Eshih Nyuhbü” shei büpai e.
41“Shennyak nyi-i pa hük leipü lop luei nyu. Hüki kho nga, hatü hüki pinyipüan. 42Jijipheni hapa lop shemhen neshiüi nyu; hanangkü shembüi hapa lop neshemhah-i hapa hang shotük. Henyi khongkü üpai nyeishi büpa kü bamhen?”
43“Ngei deihshuohjü, hang nyeishi shemhen nyupübai” shei Simoni jangei e. “Nüngi jiüshi eteke” shei Jisui e.
44Hapheikü büpai hapa nyüha philei yaakei leitü Simon kü e, “Nüngi hapa nyüha eenyüla? Nüngi ngelei la phuhen yung meheyao neshuoh, shejao pinnyüi laophülei mükphi-i ngelei la shiehütü pinnyülei sho-i thitnyüke. 45Nüngi ngei kü chemao nejüp, shejao hapa nyühai ngei shühinüng ngelei la kü jüppü mangdoh. 46Nüngi ngelei shangjing kü maingai nephu, shejao pinnyüi ngelei la kü vong meipü meli-i phunyüke. 47Hanangkü ngei nüng kü enyeih, pinnyülei mang longi nyupü tükteke; mehenangkü pinnyüi bampü longi huteke. Shejao üpa kü maani mang tük, büpai maani bamnyeih.”
48Hapheikü Jisui pinnyü kü, “Nüngei mang tükteke” shei e.
49Lebü yenthüi jom nyingnyingi, “Mang dangkao tükpeyü büpa üpaang?” shei eteihen pang.
50Jisui ha nyüha kü, “Nüng hinglempai nüng yangteke; chingmei kü leituh” shei e.
Currently Selected:
LUK 7: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
