LUK 17
17
Mang Peihen Nang
(Mt. 18:6–7, 21–22; Mk. 9:42)
1Jisui büpalei nanglakthü kü e, “Shennyakthü mang thahhühen douthü peishasha, shejao üpa homei ha peihenshang onyükei! 2Hathü khongkü maanpü hük mang thahhü leimeyü üng kü yaongba shentü yungching ilangmongei hüngdaipü-üng büpa shing meipüba. 3Amphong nyingkü lituh.” “Nüngei jeihinaüi mang thahjema, büpa kü loheishuoh, büpai mong lepküjema mang tükeishuoh. 4Hatü büpai nüng khüei nyih kü mang nyetpa thahtü, büpa nüng touei peiyei, ‘Ngei mong leptih’ shei nyetpa ephüjema mang tükeishuoh.”
Hinglempü
5Phongshanthüi Shembüpa kü “Hamphong kü hinglempü nyeishi longhüshih” shei e. 6Shembüpai jomphong kü, “Amphong kü hinglempü haoyangvang shük dangkao nyujema, ammi hapa ngupai pü kü, ‘Nüng bhiyei daiyei yungchingei kohtuh’ shei eshuohjü ammi epü kü bangkahen hih” shei jangei e.
Chongphobü Hükei Dou
7Ammei chongphobü shaangüng kahlei han hokei nyupü nevaijü mi yomei nyupü leiküjü amphong khongkü üpai, “Hatouei heih-ei nükdülei uotuh” shei ehen? 8Ammi büpa kü, “Ngei shing bhaong howtuh, hatü bhaonghow ow temtü ngei hahying shingkü nemnotuh; haphei küang nüng hahyingtuh” shei ehen. 9Chongphobüi büpalei dou dükpü kü nüngi menvih shuohnyu hiang? 10Hanangkü amphongiyao mechem am kü dükhen kangpü peü dükkemhen, hamphongü yahlak neshiüpü chongphobüthü; hami dükhen jiüpü dou mon düktih shei etuh.
Jisui Ngombü An Meihüpü
11Jerusalemei dailem kü Jisui Samaria hatü Galil nyi aa kübü kahmük homei dai. 12Büpa ching hükei shüshingkü ngombü jom an büpa mü pong. Jom taishi yaongtü, 13jomi nyükei, “Jisu, Shembüpa, ham kü phahjishih!” shei e. 14Mechem büpai hathü eepa, büpai jomphong kü, “Amphong daiyei ngongpathü kü hueishuoh” shei e. 15Hapheikü jomphong khongkü hüki mechem büpa meidaiteke shei veiaokpa, büpai ngeüwong anei Kahvang men vih-ei nyokei lei. 16Büpai Jisulei la tüngei aümei shatü büpa kü menvih shuoh. Büpayü Samaria am nyuteke.
17Hahepak kü Jisui büpa kü, “Am an meihüpü nevai je? Shejao lebü shü melei daipa? 18Hapa Kung shennyak mü lenei jomphong hükao nyokei leiyei Kahvang kü menvih neshuohnyu je?” shei phe. 19Hapheikü büpai büpa kü, “Yaongtuh, hatü leituh; nüng hinglempai nüng meidaiteke” shei e.
Kahvang Ongching Peipü
(Mt. 24:23–28, 37–41)
20Chem Jisu kü Pharisee ami Kahvang ongching mechem peikahen shei phe, hatü büpai jangei, “Kahvang ongchingü müki eebenüng douthü kei nepeinyih; 21nevaijü shennyakthüi, ‘Veituh, ha hammü nyüke!’ nevaijü, ‘Antolei nyüke!’ shei ne-ehen; mehenangkü Kahvang ongchingü amphong mü nyüke” shei e.
22Hapheikü büpai nanglomthü kü e, “Amphongi Shennyak Halei nyihthü khongkü hük dangkao eehüei ongyanghen nyih ngoikünyüke, hatü ammi ha ne-eepih. 23Jomi am kü, ‘Veituh antolei!’ nevaijü, ‘Hammü veituh!’ shei ephahen. Am tedai; am ha kü changei tedai. 24Mehenangkü klang nyepei phumshang jung hük kübü jung hükei vangngai khangpü keiha Shennyak Ha büpalei nyih kü nyuhen. 25Shejao ha shekü büpai shangpong longi homei daihen, hatü hapa denhivani büpa yaktükhen. 26Noahlei nyihthü kü nyupü keiha, Shennyak Halei nyihthü kao nyukahen. 27Noah jahas mongei mangshü thahshi hatü yungnyübüng peiyei jom peü mangmah thahshi jom hah-ei yingei yiükyah lashomei nyuteke.”
28Lotei nyihthü kü hapakei nyupeih: Jom hah-ei yingei, shakei yuei, sheileililaei shem veyei nyupeih, 29shejao Loti Sodom tuhtü daipü nyih vangsho leipü awvang hatü awkaong meli vüei aw bah-ei jom peü mahdaipeih. 30Hapa keiha Shennyakei Ha shakei vampü nyih nyukahen. 31Hapa nyih kü adokei nyupü shennyaki shem mongei tuhpü dou yahnüng teshü; hapa keiha kahlei nyupüthüi nyokei telei. 32Lotei chenyüha deih-ei dangtuh. 33Üami laophülei yangnyu yangei tuhhen khenya mahhen, shejao üami laophülei yangnyu mahtüknya yangei tuhhen. 34Ngei am kü enyeih, ha ya nyi lüngei nyuhen, hük yahlangtü hük tuhhen. 35Nyüha nyi chemi hah shüei nyuhen, hük yahlangtü hük tuhhen. 36Nyi kahlei nyuhen, hük mülanghen, hükpa tuhphonghen.
37Hahepak kü jomi büpa kü, “Melei, Shembüpa?” shei phe. Büpai jomphong kü, “Melei mahng nyu, halei langdathü thaiyei nyuhen” shei e.
Currently Selected:
LUK 17: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
