KAHBHAO 25

Abrahami Keturah mü Shem Yempü

1Abrahami lebü nyüha hük Keturah shei menpü yah. 2Pinnyüi Zimran, Jokshan, Medan, Midian, Ishbak hatü Shuah hathü büh. 3Jokshanü Sheba hatü Dedan nyilei chepa nyu. Dedanei hapeüthüyü Asshurim, Letushim, hatü Leummim hathü nyu. 4Midianei hapeüthüyü Ephah, Epher, Hanokh, Abida hatü Eldaah hathü nyu. Hathü kemei Keturahlei hühihathü nyu. 5Abrahami büpai angpü peü Isak kü shuoh. 6Shejao Abrahami büpalei yiükphüthüi bühpü hapeüthü kü büpai yemmü nyushiüng thintho mon shuohtü Isak toueipü yanei jom peü heong kahmükei shomtük.

Abraham Dipü

7Abrahami peüshep bong 175 nyu. 8Abraham viüei meishi behe leiyei den luei nyutü di. 9Cheha Isak hi Ishmael nyi-i büpa Hit am Zoharlei cheha Ephronei kah Mamre yopailei nyupü yaongdungei büpalei mahng vü. 10Hapa kah-ü Abrahami Hit am leipü shak. Halei Abrahamao chenyüha Sarah mü mahng vü. 11Abraham dipheikü Kahvangi Isak kü moihiman; büpa hahepak kü Beerlahai-roi shei epü shingei nyu.

Ishmaelei Hühihathü

12Hapayü Sarahlei aa lanyü Ijip am Hagar-i bühpü Abrahamei ha Ishmaelei hühihathü nyüke. 13Hathüyü Ishmaelei hapeüthü bühpü aimü nyangpü nyüke: Nebaioth, Ishmaelei hashongpa, Kedar, Adbeel, Mibsam, 14Mishma, Dumah, Maasa, 15Hadad, Tema, Jetur, Naphish hatü Kedemah. 16Hathüyü Ishmaelei hapeüthü jom anpünyi jomei ching hatü baümtap vepü ai nyangpü nyüke. 17Ishmael yangnyu den bong 137 nyutü di. 18Ishmaelei hühihathü Havilah hatü Shur nyi aa kü Ijip kü heongphi Assyrialei heihpü lemei nyu. Jomü Abrahamei lebü hühihathü mü veshangei nyu.

Esau hi Jakob Nyi Bühpü

19Hapayü Abrahamei cheha Isakei hühihathü: Abrahamü Isakei chepa nyu, 20hatü Isak bong pinyi nyushi Paddan-Aram leipü Aram am Bethuelei yiükha, Labanei chenaü Rebekah mü shem yem. 21Isaki chenyüha Rebekah shing Shembüpa kü phop; mehenangkü pinnyü nyülan vaishi nyu, hatü Kahvangi büpai phoppü kü jangei Rebekah büm nekongi lei. 22Pinnyüi hapeü nyi peetei koshi nyu, hatü büh shekü vom mongei naü nyi deteke, hatü pinnyüi, “Ngei keyü hapakei mehekei vamnya?” shei e. Hanangkü pinnyüi Shembüpa kü phehen dai. 23Shembüpai pinnyü kü e:

“Nüngei vomei jat nyi nyüke,

nüngi bühpü jat nyi laolao yanhen;

Hükü hükpa mü wong kohpüba,

chejei-i chenaü chongphohen.”

24Mechem hapeü anghen hepak ngoipa, pinnyülei vom mongei yeshang nyi peetei nyuteke. 25Shongpübayü hakpüh-i, hatü büm kü ashak kei mum kohshi nyu; hanangkü büpa kü Esau#Esau lappü, “Mum kohpü;” büpa Edom sheiyao nyüknyeih, ha lappai, “Hakla” shei enyüke. shei men. 26Nyipabü kü naü-eepa chejeilei la-ong kü wongshongi düktü bühteke, hatü büpa kü Jakob#Jakob lappü, “Büpai laong kü düknyeih” shei epü nyüke. shei men. Rebekah-i henyi bühpü hepak kü Isak bong pejem nyuteke.

Esau-i Behepa Hean Yutükpü

27Naü nyi nethe lei, hatü Esau-ü phaühihao kü daiyei sikari shennyak meipü lei, shejao Jakobü nenmü shemei nyuhamteke. 28Esau-i jüpü phaüyem hahpü lümpü nangkü Isaki Esau kü bam, shejao Rebekah-i Jakob kü bam.

29Nyih hük Jakobi phai müpei cheüei nyu; Esau-i sikari shapü aeiyei aong. 30Büpai Jakob kü, “Ngei aeiyei hih; hanangkü hapa hakpüh-i müptükpü phai maani yahshih” shei e. (Hanangkü büpa kü Edom shei nyükpeih.)

31Jakobi, “Shuohshah, shejao nüngi shongei ngei kü behepa hean yushih” shei e.

32Esau-i, “Ngei dihen khih, behepa hean mehe nadang nyüpa?” shei e.

33Jakobi, “Shongpüba kü nüngi ngei kü behepa hean shuohnyeih shei lahtuh” shei e. Esau-i Jakob kü, “Behepa hean shuohtüknyeih” shei lah. 34Hapheikü Jakobi büpa kü aan hanei hatü phai maani shuoh. Büpai ha hahtü yaongei lüdai. Hapakei Esau-i büpalei behepa hean yutük.

Currently Selected:

KAHBHAO 25: PHOMBSI

Highlight

Copy