KAHBHAO 15

Kahvangi Abram mü Vangteipü

1Hapheikü Shembüpalei shah Abram touei manghkhang hük kü peiyei, “Nüng tenyem, Abram, ngeiyü nüngei inyüshung, nüngei laklei longi nyüpeih” shei eteke. 2Shejao Abrami, “Oh Shembüpa Kahvang, nüngi ngei kü mehe yahphahen? Mehenangkü ngeiyü hapeü neshiü, hatü ngelei mükjüpü Damaska am Eliezer-i yahhen je?” shei e. 3Hatü Abrami, “Nüngi ngei kü hapeü neyahpha, hatü ngelei shemei bühpü aa-i ngelei mükjüp yahhen khih” shei e. 4Shejao Shembüpalei shah büpa touei peiyei, “Hapa shennyakü nüngei mükjüp nevaihen, shejao nüngei büm kübü hapeü-üng nüngei mükjüp vaihen” shei e. 5Büpai büpa kü chingshelei ngaiyei, “Vangsholei ngangei veituh, hatü nüngi ieaokülashang lithathü ietuh” shei e. Hapheikü büpai, “Hapa keiha nüngei hühihathü nyuhen” shei e. 6Abrami Kahvang kü hinglem, hatü Kahvangi büpa kü hingshangpü shennyak shei ieyeilem.

7Hapheikü büpai büpa kü, “Ngeiyü nüng kü hapa kahdok shuohhen shingvaishi Babylonia kahmük Ur leipü nüng müei daipü Shembüpa” shei e. 8Shejao büpai, “Oh Shembüpa, ngei hapa kahdok yah-aokhen shei ngei mekei nyingaokhen?” shei phe. 9Shembüpai büpa kü, “Ngei touei bong jem lomdaipü mohoh hük, yum hük, hatü mi hük mü athuba hatü khakhi ouha hükbaong deikei” shei e. 10Abrami hathü peü deiyei nyi nyi anei vettü hükkeikei dangteiyei haü, shejao büpai outhü payü nekaktük. 11Hahepak kü hapa phai kü alang laongteke, shejao Abrami ha changtük.

12Vanghe shüdaiyaki Abrami mükhet ngoiyei shidai, hatü büpa touei nyemshi nyakei pei. 13Shembüpai büpa kü, “Nüngei hühihathü kung kahdokei daiyei benhayaha vaiyei nyuhen, hatü aa vaiyei bong 400 thahshi shüveipü ponghah-ei nyuhen ha nyingtuh. 14Shejao jom aa vaishi chongphopü jat kü ngei hanghi shuohhen, hatü hapheikü jom mophimo longi kotü vamei daihen. 15Shejao nüng payü chingmei kü den luei nyutü diyei vühen. 16Den alipabü kü nüngei hühihathü hatouei nyokei leihen; mehenangkü Amor amei mang shao-üng maei mangaong” shei e.

17Mechem vanghe shüei nyakpa, dük keiha aw hük awlom kohshi vamei haüpü phai aa kü peih-ei dai. 18Ha nyih Shembüpai Abraham mü vangpüshuwpü hük ling, hatü büpa kü, “Nüngei hühihathü kü hapa kahdok Ijip yungyen kübü Euphrates yung thahshi, 19hatü Ken, Kenizz, Kadmon, 20Hit, Perizz, Rephaim, 21Amor, Kanan, Girgash, hatü Jebus amei kahdok shuohnyeih” shei e.

Currently Selected:

KAHBHAO 15: PHOMBSI

Highlight

Copy