MARK 1

Johan Baptist nou Ko Paodouyu

(Mt 3.1-12; Lk 3.1-18; Jn 1.19-28)

1Haihai Ramai Nahpoutu, Jisu Khrista vei Ko Avei nae. 2Ko haihai Isaiah rachi paolawo nou rükhai touyu büa paloure:

“Zhukhaio, Enou Achipaoh paomainaye ne ludu souda

peire donou nejünou rai-a seive peilai;

3Rekounou mailinou shawe:

‘Mapao vei ludu sü soudakhaio;

puh ludu sü souzüpeio!’ ”

Johan Baptist nou Ko Paodouyu

4Südonou rekounou Johan Baptist nou mah khailu peire le dayu vei dzükhao dayu nasü paodoupoa vere. 5Alia Judea teidei hinou ea Jerusalem nuhdu hinou mai alaosou Johan hinou ko keire donou tave. Alia puletao nou mah paopa-a puhnou puletaoye Jordan Rei hinou dzükhao dapeie.

6Johan hai racho mainou souyu sahnü nou banouwe, alia souhee khyakho nou puh khyahi khopfüe, alia puh touso sü rekou khahzü ea laivoudzüe. 7Puhnou maikhemai hi paodoue, “Athainou vere mai sünasü Ajünou dupusho hie. Enou nakou puh phikharai pheipayu koute-a Eye donou khamoe. 8Enou neletaoye dzünou dzükhao dapeie, ana puhnou neletaoye Rako Mashi hinou dzükhao dapeilai.”

Jisu vei Dzükhao-ada ea Athao

(Mt 3.13—4.11; Lk 3.21-22; 4.1-13)

9Teile sütao kisü Jisu nou Galilee teidei hi Nazareth hinou taveloua Jordan rei hinou ve Johan ye panou dzükhao dapeie. 10Alia Jisu nou dzü hinou tapalou bükhaie, puhnou raki sü houkhaitoua Rakonou khao büa puh pei hi kou taoyu ngaoe. 11Alia rakinou pai alinou haibüa shakoue, “Nehai Enou leshi shoyu Anah Poutue. Enou nehi sü rukhare.”

12Alia Rakonou thalasou puhye rekou satare, 13sühinou puh sü Saitan nou thao-a teithe raidai bue. Rekhaonatao-a sühi bue, ana rakivamainou tave puhye soukha peie.

Jisu nou Khah Phoumai Adaiye Kulouyu

(Mt 4.12-22; Lk 4.14-15; 5.1-11)

14Johanye niloua hukhahi thouyu thaisü, Jisu nou Galilee hi taveloua Ramai Vedei vei ko avei nasü paodoue, 15alia haibüa paoe, “Teile sü vetere, alia Ramai Vedei sü ngheiteire! Ledalo ea ko avei nasü louchelo!”

16Alia Jisu nou Galilee zaipe hinou ta-a bu phaki, puhnou khah phoumai ahai, Simon ea puh thaihou Andrew nou khahbe poa khah phouyu ngaoloue. 17Alia Jisu nou puhaihi paoe, “Athai fülo ea Enou nehaiye panou maiye phoumai soulai.” 18Sübü hinou puhai nou khahbe sü thaowu-a puhthai fütare.

19Puhnou takho koukhaie Zebedee nahpoutu Jems hai Johan chinahaiye kou ngaoloue. Puhaisü puhaivei sakhao hinou puhai vei khahbe payu rü-a bue. 20Jisu nou puhai chinaye ngaolou loukhaie, puhaiye kuloure; alia puhai nou puhai puo Zebedeeye zho kuyu kilaitaoye koa sakhao hi thaowu-a puhthai fütare.

Rashinou Louyu Mailiye Souvei Peiyu

(Lk 4.31-37)

21Jisu nou puh rozümaitaoye koa Kapernahum nuhdu hi taloure, alia süthaibü Soteithe zhousü puhnou rathobuh hi talouloua doupei tare. 22Alia puletaosü puhnou doupeiyu sü chouloua khupa shore, daiolouzü puh nou razhai dou-apeimai bümoa soulousü zü bumai alibüa puletaoye doupeie.

23Alia sübü hinou sheemoyu rako nou louyu mai ali rathobuh hi talouloua shusoua shapare, 24“Nazareth hi Jisu, nenou Ehye koa dai soure bue? Ne Ehye souhare donou vewu? Ne thaohsa touyu Enou süwe, ne hai Ramai vei Mashio süe!”

25Ana Jisu nou puhye züa paoe, “Ngasou buwo, alia puh hinou tapawo!”

26Alia sheemoyu rako nanou mai naye sü souveasho peiwu-a ea pairaosoua puh hinou tapare. 27Mai hrülainou khupa sholoua alinou lihi haibüa noua paoe, “Haihai daie? Haihai süthoa doupeiyu tyaliwu? Daiolouzü puhnou soulousü zünou pu koa sheemoyu rakotaohi koutea kharochi peiwe, alia puletao nou puh chi züwe!”

28Alia südonou thalasou puh zhih sü Galilee teidei teitei hisü sürao tare.

Simon Nai ea Sounoumai taoliye Souvei Peiyu

(Mt 8.14-17; Lk 4.38-41)

29Jisu ea puh rozümaitao nou Jems ea Johan ye koa rathobuh süna hinou tapaloua thalasou Simon ea Andrew kihi tare. 30Süpha kisü Pitar nai-paisü rakee-a züphao nou züa bue, alia Jisu nou sühi veloubükhaie, puletao nou puh souvanou Jisu hi paongaoe. 31Alia Jisu nou puh hi takouloua puh bahnou kou puhye sülashupeie. Sübühinou rakee nasü veiloure, alia puhnou tashuloua puletao kuvah soupeie.

32Süzhou koukhe teinghi loutayu thai, maikhe mainou sounoumai ea rashi louyumai hrülaiye Jisu hi savere. 33Alia nuhdu sühi maikhemai hrülaisü kijü hinou tave dzüa buloure. 34Alia puhnou soutyali nou soua buyu maitaoye souveipeie, alia rashitao ye hupapeie. Puhnou rashitao ye panou chilia paobae, daiolouzü puh hai thaoh-e touyu puletao nou süe.

Jisu nou Galilee hinou Ko Paodouyu

(Lk 4.42-44)

35Thainaisho shohna teithetaomo kinou, Jisu nou ki sühinou tashuloua zheihzheihyu buh alihi tare, alia sühinou puh nou veachi paoa bue. 36Ana Simon ea puh samaitao nou puhye phoupoa tare, 37alia puletao nou puhye ngaoloukhaie puh hi paoe, “Mai hrülainou neye phoua bure.”

38Ana Jisu nou puletao hi chila peie, “Eletao buh haina pehaohi buyu kukhe nuhdu taohi talaikhe. E sütaohi-a ko paodoure bue, daiolouzü südonou Esü vebaie.”

39Südonou puhnou rathobuhtao hinou ko paodoupoa ea rashitaoye hupa-a Galilee buh teitei tasühaopoa tae.

Loukhaora Soumai Aliye Souvei Peiyu

(Mt 8.1-4; Lk 5.12-16)

40Alia loukhaora soumai alinou Jisu hi taveloua ea kou khou khüloua puh hinou khoe, “Nenou aetou louzü, Eye nenou souvei peilou süe.”

41Jisu hai leshi zhuvea nou phoupeiloure, alia puh bah sü topaloua puhye deiloua paoe, “E aetoue, sheelouwo!” 42Alia sübü hinou loukhaora sou nasü veiloure ea mai nasü sheeloure. 43Süthaisü Jisu nou mai sünaye tukhatsü peiwu-a thalasou puhye seitawure, 44alia haibüa puh hi paopeie, “Keilo, haivanou maitali hia paokhaiso. Ana nelah napaomai hi taho ngaokhaio, alia puhye panou neye zhukhaio; süthaisü ne hai veiloure touyu lapeire donou Moses nou kharochi peikhai touyu thaifüa posheela khaio.”

45Ana mai honanou taho buh liki ko süsü paorarou tare. Cheche vuzünou puhnou alaosou paoyu donou Jisu sü nuhdu hi dua taloulou shire, ana puh sü zheihzheihyu buhtao hinou ho butare, alia maikhemai sü buh liki hinou puh hi taveloure.

Currently Selected:

MARK 1: POUMBSI

Highlight

Copy