MATHIU 7

Kukhemaiye Chikuyu

(Lk 6.37-38,41-42)

1“Neletaoye chi kumore donou maiye chikuso, 2daiolouzü neletao nou maiye chikuyu zhaibüa neletaoye chikulai, alia neletao nou maiye douyu sünanou neletaoye doulai. 3Südonou lah ne nghithouhi houngh louyu nasü popare romoa daidonou ne thaihou jürai nghithouhi louyu houngh nasü zhuwe? 4Kabüa nenou, ne thaihou jüraihi, ‘Eye panou ne nghithou hinou houngh popalouwo,’ tea khuvei-a paoloulai? 5Aveikho souwo! Raia lah ne nghithou hinou houngh nasü popalouwo, alia süthainou nenou ne thaihou jürai nghithou hi louyu houngh nasü popaloure donou sheetoua ngaolai.

6“Sheeyu na nasü seitao hi peiso; peilouzü puletao nou reiveloua neletaoye dushulai. Neletao vei sana muhtei nasü votao nghojü hi polai khaiwuso; laikhai louzü puletao nou sütaosü phinou taina-a bailai.

Khowo, Phouwo, Khouwo

(Lk 11.9-13)

7“Khokhaio, alia süsü neletao hi peilai, phoukhaio, alia neletao nou ngaoloulai; houkhaio, alia süsü neletao hi houthou peilai. 8Daiolouzü khoyumai talinou ngaolouwe, alia phouyumai talinou ngaolouwe, alia khou-a buyu puh hisü houthou peilai. 9Neletao hrohi puomaitao thaohnou puh nahpoutu nou raokhao khoyuki chuhnou peilai? 10Moa puhnou khah kholouzü, nghounou puh hi peilaiwu? 11Südonou shi-a buyu neletao koute-a nele nahmaitaohi avei nakhemai peilou sülouzü, kazhou koute koua rakibu neletao Puonou puh hinou khoyu maitao hisü avei nataonou peilai!

12“Südonou neletao nou maikhe maiye panou neletao hi soupei nüyu nasü, neletao-a süzhaibüa puletao hi soupeikhaio; daiolouzü haisü razhai ea rachi paolamaitao vei doupeiyu nasüe.

Romü Taihyuna

(Lk 13.24)

13“Romü taihyuna hinou taloulo; daiolouzü ha-kare buh hi loure romü nasü kaa-a kaae ea ludu nasü talae, alia sühi talouyu maisü poushoe. 14Ana ahrihi loure romü nasü taih-a taih-e ea ludu süsü tateie, alia süna ngaolouyu maisü chie.

Süübe ea Sünavei Thou

(Lk 6.43-44)

15“Madayu rachi paolamai taoye leikei-a zhulo; puletao sü vakounou zhukhaie zhaotu zhaibüa neletao hi velai, ana puletao lekhe hiwo louzü chechenou khushoyu nüsei bübaie. 16Neletao nou puletao vah hinou puletaoye süloulai. Shube vanou darkha shishilou moe, alia shu hinou doushi shimoe. 17Südonou süübe avei talinou rashi avei shiwe, alia süübe shinanou rashi ashi shiwe. 18Süübe avei nanou rashi ashi shilou hoe, ea süübe ashina nou rashi avei shilou hoe. 19Rashi avei shimoyu süübe taliye sü vilaiwu-a meihi polaithouwu baiwe. 20Südonou neletao nou madayu rachi paolamaiye puletao vah hinou süloulai.

Ewo Neletaoye Sükhaimoe

(Lk 13.25-27)

21“Mapao, Mapao, tea Eye kuyu mai hrülainou raki Vedei hi velou laimoe, ana rakibu Apuo leli souyu mainou velou bailai. 22Chikuyu Teithe kisü mai alaonou Ahi paolai, ‘Mapao, Mapao! Nezhih hinou Ehnou rachi paolapa mowu, alia nezhih hinou rashitaoye hulai pamowu, alia nezhih hinou khupa vah lao soumowu?’ 23Süthaisü Enou puletao hi paolai, ‘Ewo neletaoye sükhai moe; vahshi souyu maitao, neletao Ahinou tawo!’

Tsü Veiyu ea Voyu Kisoumai Ahai

(Lk 6.47-49)

24“Südonou Achipaotao chouloua züloumai talihai chuhdu vanou ki soukhai touyu tsü veiyu mai sünaye kheihaoe. 25Alia teinou rükouloua dzünou duve loure, alia teikhainou hüveloua ki sünaye ve hüsho loure. Ana ki sünanou kaotamoe, daiolouzü sünasü chuhdu vanou soukhaitoue.

26“Ana Achipaotao chouloua züloumo maitaosü vünai phaonou ki souyu avomai sünaye kheihaoe. 27Alia teinou rükouloua dzünou duve loure, alia teikhainou hüveloua ki sünaye ve hüsho loure ea ki sünasü kaotare, alia ki nasü kaoshisho loure!”

Jisu vei Soulousü Zü

28Alia Jisu nou chi haitao paocheyu kisü, maisousü puhnou doupeiyu chipaotao vanou khupa loure, 29daiolouzü puhnou razhai dou-apeimai bümoa soulousü zü bumai alibüa puletaoye doupeie.

Currently Selected:

MATHIU 7: POUMBSI

Highlight

Copy