MATHIU 14

Johan Baptist Thaiyu

(Mk 6.14-29; Lk 9.7-9)

1Teile süpha kisü Galilee hi Veo Herod nou Jisu zhih hai chouloure. 2Alia puhnou puh kilai taohi paoe, “Hainahai Johan Baptist vuzübaie, puh hai thaiyu shonou hrishu loure: süvanou puh hi haibüyu khupa vah souyu khouko hai bue.”

3Daiolouzü Herod nou raiki Johanye niloure donou kharochi peie, alia puhnou Johanye rainou phuloua hukhahi thoupeie. Puhnou haisü puh thaihou Philip chapfü Herodia donou soubaie. 4Daiolouzü teile lihi Johan Baptist nou Herod hi paoe, “Nenou Herodia ye nalouyu hai zhaimoe!” 5Herod nou puhye southealou nüwe, ana puh nou Jihudimaiye piwe daiolouzü puletao nou Johanye nou rachi paolamai alie tea paoe.

6Ana Herod vei nayu teithe veyu kisü Herodia nah naotupainou maime teitei nghojünou dao-a do soue, alia Herod ye le sousasho peie, 7südonou Herod nou loumaina paihi chi lüpei-a haibüa paoe, “Nenou khoyu talihai peilai tea Enou chi lüpeiwe!”

8Puh pfüvei rozüa puhnou puh hi paoe, “Chu buh haihinou Johan Baptist pei hai khaoh alihi thouloua Eye peio!”

9Veosü levea loure, ana puhnou puh shemaitao hrülai nghojünou chi lüpeiyu vanou, loumaina paivei züpa nasü peire donou puhnou kharochi peire. 10Südonou puhnou maiye hukhahi seiho panou Johan peisü dewure. 11Alia puh peihai khaoh ali hinou poveloua loumaina paihi peire, alia puhnou süsü puh pfühi povepeie. 12Johan rozümainou taveloua puh pfüphaosü potare, alia süsü povure; süthaisü puletao nou taho Jisu hi paongaoe.

Jisu nou Mai Thengouye Vaiyu

(Mk 6.30-44; Lk 9.10-17; Jn 6.1-14)

13Ko haisü chuo Jisu nou choulouyu kisü puhnou buh sühinou sakhao alihi louloua puh lahnou zheihzheihyu buh alihi tare. Ana maisounou ko süsü chouloukhaie, nuhdutao hinou phinou tapoa puhthai fütare. 14Jisu nou zaipehi tapayu kisü maisou alaoye ngaoloure; alia puhnou puletaoye zhuvea sholoua puletao vei sounou maitaoye souveipeie.

15Süzhou koukhesü puh rozümaitao nou puh hi taveloua paoe, “Chuo tei naloure, alia buh haisü zheih zheihyu buh-e. Maisouye nuhtaohi seitawu-a panou lah puletao tousosü hrütouwo.”

16Jisu nou chila peie, “Puletao tayu komoe; lah neletao nou puletao toure donou touso tali peio!”

17Puletao nou puh hi paoe, “Chu Eletao bah hi buyuwo louzü raokhao pho angou ea khah ahaithe baie.”

18Jisu nou paoe, “Sütaosü Ahi poveo.” 19Süthaisü puhnou maisouye poudai phaovahi kou bure donou kharochi peie; alia puhnou raokhao pho angou ea khah ahai taosü poloua rakihi zhuloua hapeie, alia soukholoua raotaosü rozümai taohi peie ea rozümai taonou sütao hai maisouhi peie. 20Mai hrülainou touloua pou phoukhai loure. Süthaisü rozümaitao nou tashu kouhli taosü sülai kiahai phou kodzüloue. 21Alia toulouyu maitao hai naotumai ea nahmaitao chothoumoa mai thengou phae.

Jisu nou Dzü Peihi Tayu

(Mk 6.45-52; Jn 6.15-21)

22Süthaisü puhnou maisouye seita-a bubu kinou puh rozümai taoye panou sakhaohi louloua puh jünou raia panou zai polo dovahi tare. 23Maisouye seitayu thaisü, puh lah veachi paore donou deichi alihi tapare. Koukhe louyu phakisü, Jisu likhei sühi bubaire; 24ana süphaki sü sakhao sü zaipe hinou doushoa dzü-akhühnou pfüpoa bue, daiolouzü teikhainou sünaye hüsai poa buloure.

25Shona teilecho asü ea arou kole phahinou Jisu nou dzüpeinou tapoa puh rozümai taohi tave-e. 26Ana puhnou dzüpeinou tayusü rozümai taonou ngaolouyu kisü pisholoua haibüa paoe, “Haisü rashibaie! alia piyuleloua shusou raoloure.”

27Ana Jisu nou thala-a puletao hi paoe, “Khuveilo! Ebaie; pikhaiso!”

28Süthaisü Pitar nou puh hi paoe, “Mapao, haihai ne vuzüe toulouzü, Eye panou dzüpeinou nehi takou loure donou kharochi peio.”

29Jisu nou chila peie, “Takouwo!” Südonou Pitar nou sakhao hinou tapaloua dzüpeinou tapoa Jisu hi takoue. 30Ana puhnou chihshoyu teikhaiye ngaolouyu kisü, puh hai pisho loure ea dzükhehi leihore. Puhnou, “Mapao, Eye khaipeio!” tea shusoua paoe.

31Thalasou Jisu nou puh bahsü topaloua ea puhye thaikou keloua puh hi paoe, “Oh lü taishoyu mainare, ne daidonou lekiwe?”

32Alia puhai nou sakhao nahi talou louyu kisü teikhai sü khaitare. 33Alia sakhaohi buyu puletao nou puhye kou khurüloua paoe, “Chechenou newo Ramai Nahpoutue!”

Gennesaret hinou Sounou maiye Souvei Peiyu

(Mk 6.53-56)

34Alia puletao nou zai nasü tacho paloua Gennesaret hi velouloure. 35Alia sühi buyu maitao nou Jisu ye shilouyu kisü, puletao nou nuh süna ngheiki buyu nuhtaohi maiye seiho-a panou sounou maiye Jisu hi save-e. 36Puletao nou puh hinou sounou maitaoye panou puhvei sah noukai deikhaio tea khoe; alia süna deilouyu puletao hrülaisü veiloure.

Currently Selected:

MATHIU 14: POUMBSI

Highlight

Copy