LUK 18
18
Meamaipfü ea Chiku-apeimai Ali vanou Nada
1Süthaisü puh rozümaitao nou le khaitamoa teisanou veachi pao-a buzüe touyu doupeire donou Jisu nou puletao hi nada ali paopeie. 2“Nuhdu alihi Ramaiye pimoyu ea maiye tsükhou moyu chiku-apeimai ali bue. 3Alia nuhdu sühisü meamaipfü ali-a bue; alia puhnou puh hi tobai soumoa taveloua, ‘Avei ngaobamai pei hi khüh phoupeio’ tea paoe. 4Teile phajü koutesü puhnou bae; ana thaikhai hinou puh lahnou puh hi paoe, ‘Enou Ramaiye-a pimo moa maiye-a tsükhou mokhaia, 5meamaipfü haipainou Eye souchoro peiyu donou Enou puhkhüh phoupeilai, molouzü puhnou tobai soumoa tave zhazhayu nou Eye souveawuyu shulai!’”
6Alia Mapao nou paoe, “Cheche moyu chiku-apeio nanou paoyusü keikhaio. 7Alia Ramai-a puh hinou kheihea khoa buyu puhvei dopalouyu maitaoye donou khüh phoupeilai mowu? Puhnou puletaoye soukhare hisü shoshosoua bailaiwu? 8Enou neletao hi paowe, puhnou puletaoye donou thala-a khüh phoupeilai. Sütoukhaia Mai Nahpoutu veyu kisü puhnou deiphao hisü lü louche-a buyu maiye ngaolaihi mosa?”
Phariseemai Ali ea Kikha khamai Ali vanou Nada
9Alia puletaowo acheche hinou tawe tea lah puletaoye likhei loucheloua kukhe maiye ngaora-a laiyu maikhemai taohi Jisu nou nada haina-a paopeie. 10“Teile alihi mai ahai veachi paore donou rathoki hi takhe: ali louzü Pharisee maie ea kukhena louzü kikha khamaie.
11“Pharisee maipou sünanou lashuloua puh lahnou haibüa veachi paoe, ‘Oh Ramai, Enou neye showe, daiolouzü Ewo kukhe maitao—maivei pitoumai, chechemomai, naotumaiye soumahyu mai moa kikha khamai haina kumoe. 12Ewo teithecho lihi lüh ahai lühwe, alia Enou ngaolouyu zha kirou hinou ali nehi peiwe.’
13“Ana kikha khamai sünanou puh pahsü rakilo pfülanümoa adou kounou, la-a bue, ana puhnou puh khaosü khouloua paoe, ‘O Ramai, mahmai Eye zhuvea leshipeio!’ 14Enou neletao hi paowe, kukhe maisüna moanou, mai hainawo louzü Ramai nghojünou chi kusheewu-a puh kihi takoure; daiolouzü lah puhye soukuyu mai taye sü sounawulai, alia lahnou natai-a buyu puhye sü souku peilai.”
Jisu nou Nahtumai taoye Hapeiyu
(Mt 19.13-15; Mk 10.13-16)
15Chuo mai kamainou Jisu ye panou puh bahnou nahtumaitao pei hi deipeire donou puletaoye puh hi save; alia rozümaitao nou süsü ngaolouyu kisü puletaoye züpeie. 16Ana Jisu nou nahtumai taoye puh hi kukouloua paoe, “Nahtumai taoye panou Ahi koukhaio, alia puletaoye nuso; daiolouzü Ramai Vedeihai haibüyu mai veie. 17Enou neletao hi chekhaoa paoe, maita linou nahtumai ali büa Ramai Vedei nasü polou molouzü puhnou sühisü hatakia loulou hoe.”
Hani Pouna
(Mt 19.16-30; Mk 10.17-31)
18Alia Jihudimai peichamai alinou Jisu hi noue, “Dou-apei Aveio, Enou teisa ahri ngaoloure donou dai soulai?”
19Alia Jisu nou puh hi paoe, “Daidonou nenou Eye nou Aveio tea kuwe? Ramai likhei baimoa kukhe veiyu mailia hae. 20Nenou, ‘Mai chapfüye sapaso, maiye southeaso, vaoso, madayu zhopaoh peiso, ne pfüpuoye tsükhoulo,’ touyu chikhataosü süwe.”
21Mai sünanou chila peie, “Haitao teiteisü Enou taibu kinou reiloure.”
22Alia Jisu nou süsü choulouyu kisü puh hi paoe, “Chukoute nehi chemoyu hali bue. Nevei buyu teitei zholaiwu-a pousha nasü toure hamai hi zhihpeio, alia raki hinou nevei kini bulai; süthaisü taveloua Athai fülo.” 23Ana puhnou sünasü choulouyu kisü leveasho loure, daiolouzü puhsü hani showe.
24Mai sünanou leveasholoua buyu sü Jisu nou ngaoloua paoe, “Hanimaitao donou Ramai Vedeihi veloure sü daizhozhou tateishosa! 25Daiolouzü hanimai alinou Ramai Vedeihi velouyu jüwo racho alinou peimihi tailouyu sünanou talahie.”
26Puhnou paoyu süna choulouyu maikhemai taonou noue, “Sübüyu thaisü thaohmainou khailulou sülai?”
27Ana Jisu nou chila peie, “Maiye donou soulou hoyu nataosü Ramaiye donou louzü soulou sübaie.”
28Alia Pitar nou paoe, “Zhukhaio Eh nou Eh kisü thaowu-a nethai füloure.”
29Jisu nou puletao hi paoe, “Chekhaoa Enou neletao hi paoe, Ramai Vedei donou maitalinou puhki moa puh chapfü moa thaihou-jürai moa pfüpuo moa nahmaitaoye thaowu louzü, 30puhnou chu hria buyu teile hi-a zha alaosou koua ea vere teile hi-a teisa ahrisü ngaolai.”
Jisu nou Puhvei Athai vanou Lüh Asü Chena Paoyu
(Mt 20.17-19; Mk 10.32-34)
31Alia Jisu nou rozümai kiahai taoye sakupaloua puletao hi paoe, “Zhukhaio, Eletao Jerusalem hi tapa-a bue, alia rachi paolamai taonou Mai Nahpoutu vanou rüthoukhai touyu teiteisü vete khoulai. 32Daiolouzü puhye sü tahrüh kukhe maitao bah hi thoupeilai, alia puhye sü konüa ea sou ahrao peiwu-a puhvahi taidzü süsholai. 33Puletao nou puhye sü südanou dapeiwu-a southealai, alia teithe asü kisü puhsü hrishulai.”
34Ana puletao nou chipao sütaosü halia sülou moe; paopeiyu sünavei kosü puletao hinou pokure, alia puletao nou paopeiyu sünasü halia polou moe.
Jisu nou Tosü-a Laiyu Nghichamai Aliye Souvei Peiyu
(Mt 20.29-34; Mk 10.46-52)
35Alia Jisu nou Jeriko hi takou ngheiyu kisü, sühisü nghichamai ali dupe hinou tosü-a bue. 36Alia maisounou ta-a buyu sü chouloua süsü dai souwe tea puhnou noue.
37Puletao nou puh hi “Nazareth hi Jisu ta-a bue,” tea paopeie.
38Alia puhnou paikua shapae, “David Nahpoutu Jisu, Eye zhuvea peio!”
39Alia nghojülonou tayu maikhemai taonou puhye sü nasha-a bukhaio tea züpeie; ana puhnou lejünou pai kupuloua paoe, “David Nahpoutu, Eye zhuvea peio!”
40Südonou Jisu nou chouloua puhye puh hi sakoure donou kharochi peire; alia puhnou ngheikihi takouyu kisü puhnou puh hi noue, 41“Eye panou neye donou dai soupei nüwe?”
Puhnou chila peie, “Mapao Eye panou Anghithou sü ngaoloukhaio.”
42Jisu nou puh hi paoe, “Ne nghithou sü ngaolouwo; nevei lünou neye souvei peire.”
43Alia sübü hinou puh nghithou sü ngaoloure ea Ramaiye shopoa Jisu thai füloure; alia maikhemai hrülainou süsü ngaoloua Ramaiye sholoure.
Currently Selected:
LUK 18: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
