LUK 12

Aveikho Soumai vanou Tukha Peiyu

(Mt 10.26-27)

1Teile süpha hinou mai the taoli tavedzüa puletao alinou aliphi tai-a buyu hinou, puhnou raia puh rozümai taohi paoshu tare, “Pharisee maitao vei kheih, süolouzü puletao vei aveikho souyu vanou zhutoulo. 2Popa ngaolai moyu hokhaiyu halia hae, moa sülai moyu kukhaiyu halia hae. 3Südonou neletao nou teizhi hinou paokhai touyu atasü teiva hinou chouloulai, alia neletao nou kikha maihayu buh hinou kheikhei soua paokhai touyu atasü kipeitao hinou shapalai.

Thaohye Pire Bue

(Mt 10.28-31)

4“Asamaitao, Enou neletao hi paoe, pfüphaoye southealou khaia süthai halia soupulou hoyu puletaoye piso. 5Ana thaohye pilaisa touyu sü Enou neletao hi paongaolai: pfüphaoye southea louyu thai-a meizai hi polaithou peilou süyu khouko buyu Ramaiye pilo. Ovai, Enou neletao hi paowe, puhye pilo!

6“Pousha ahai donou khaitou angouye zholou mowu? Ana sütao ali koutea Ramai nou ngaipeimoe. 7Ana neletao pei hi peishu teitei-a phoukhai khaitoua bue. Pikhaiso; neletaowo louzü khaitou taoli jünou muh koushohie!

Khristaye Aetouyu ea Motouyu

(Mt 10.32-33; 12.32; 10.19-20)

8“Alia Enou neletao hi paoe, Eye maikhemai nghojünou aetou peiyu mai taliyesü, Mainah Poutunou-a puhye sü Ramai vei rakivamaitao nghojünou aetou peilai, 9ana Eye maikhemai nghojünou motouyu puhye sü Ramai vei rakivamaitao nghojünou motoulai.

10“Alia Mainah Poutuye paoshiyu mai taliye sü khaipeilai; ana Rako Mashiye paoshiyu puhye sü khaipei laimoe.

11“Alia puletao nou neletaoye rathobuhtao, teidei khomaitao ea soulousü khouko bumaitao nghojühi saveyu kisü, kakua moa neletao nou dainou chalalai moa neletao nou dainou paolai tea lekiso; 12daiolouzü neletao nou paore sü teile süpha hinou Rako Mashinou neletao hi doupeilai.”

Avoyu Hanimai Pouna vanou Nada

13Maisou hrohinou mailinou Jisu hi paoe, “Dou-apeio, Apuo vei kini taosü Eye koa zhire donou Ajüraihi paopeio.”

14Ana Jisu nou puh hi paoe, “Oh mainare, thaohnou Eye nehai china pei hi chiku-apeio moa zhi-apeio soure donou dopeie?” 15Alia puhnou puletao hrülaihi paoe, “Leikeilo, alia loküyu teitei hinou neletao zhutoulo; daiolouzü emai hrühai puhvei kini alao soua buyu süna hinou bubaimoe.”

16Süthaisü Jisu nou puletao hi nada ali paongaoe: “Teile alihi hanimai alivei dou hisü thoutai veishoa shiloure; 17alia puhnou lah tsüchoe, ‘Kakulai, daiolouzü Avei cha chive khairebuh thoupao alia hae.’ 18Alia puhnou paoe, ‘Enou haibüa soulai; Enou Avei thoupaosü hakhao kouloua soudu pulai: alia sühinou Enou Avei thou teitei ea kukhe Avei na veishi podzükhailai. 19Süthaisü Enou Arakohi paolai, Rako, po taoli donou nevei na alaosou podzükhaitoua bure; kaona-a solouwo, toukhaio, shokhaio ea nelah vashoa hrükhaio!’ 20Ana Ramai nou puh hi paoe, ‘Avowo! Zhou khei hinou nevei rakosü nehinou potalai; süthaisü nenou nelah neye donou soudakhai touyu teiteisü thaohvei soulai?’”

21“Ramai hilonou hani loumoa lah puhye donou kini podzükhai touyu mai tasü sükue.”

Ramaiye Lüyu

(Mt 6.25-34)

22Süthaisü Jisu nou puh rozümai taohi paoe, “Südonou Enou neletao hi paowe, neletao nou hriloure donou dai toulai, moa neletao pfüphao donou dai bah-noulai tea lekiso. 23Daiolouzü touso jünou rakonou, alia sahnü jünou pfüphaonou koua matsü hie. 24Votaoye zhukhaio, puletaosü thoutai-a vumoe moa cha-a chimoe; puletao vei na podzüyu ki moa thoupao-a hae, sütoukhaia Ramai nou puletaoye vai-a bue. Neletaowo raohoutao jünou daizhozhou muh kouhisa! 25Alia neletao thaohmainou lekiyu vanou lah hrühai daotu maiso puloulai? 26Südonou neletao nou haibüyu taishoyu süna koutea soulou holouzü, neletao nou daidonou kukhetao donou lekiwe? 27Rekouhi lily poupah taonou kabüa hrüsa chokhaio; puletaosü vah-a soumoe moa puletaosü pha süa sah-a daomoe; ana Enou neletao hi paowe, süolouzü Solomon veo koutea puhvei kini süzhou koute bukhaia poupah sütao hrohinou ali koute büa ngah veia sahnü bahnou moe. 28Ana rekouhi pouhou zhou likhei hriloua doso meifühi polai thouyu sünaye süzhou veia sahnü bahnou peilouzü, puhnou daizhozhou süjünou veikoushoa neletaoye bahnou peilai, oh lü taishoyu maitaore!

29“Südonou neletao dai toulai, dai sholai tea phouso, moa lekiso. 30Daiolouzü deiphao hi tahrüh khemai hrülainou na sütaohai phouwe; neletao Puonou sütaohai neletaoye donou matsüwe touyu sü süa bue. 31Süjüwo, puhvei vedeisü phoulo, alia na sütao teiteihai neletao vei soukhailai.

Raki hi Kini

(Mt 6.19-21)

32“Piwuso, zhaokho atainare, daiolouzü neletao hi Vedei süna peiresü neletao Puovei züpayu nasüe. 33Neletao vei kini taosü zholoua toure hamai taohi peikhaio; ratalai moyu shavüsü neletao lah neletaoye donou pokhailo, alia neletao vei kinisü rakihi podzükhailo, sühisü sütaosü hatakhai laimoe, daiolouzü sühisü vaomaia sütao ngheikihi velouhoe, alia rükhaonoua sütaoye souha louhoe. 34Daiolouzü neletao vei kini buyu buh hisü neletao le-a bulai.

Zhaiheyu Kilaitao

35“Neletao khya phulo ea meibvüsü taokhailo, 36alia sheenghiyu nühbuh hinou puletao vei paopunou kihi khaiveloua kikhu khouyuki puh hi thala-a houthou peire donou khoa buyu kilai tao kulo. 37Paopunou veyuki zhaihe-a tave ngaolouyu kilai sütaosü rakoveie; chekhaoa Enou neletao hi paowe, puhnou puhlah sakhya phuloua kukhemai taoye panou toure donou kou bulai ea puhnou tashuloua puletaoye kuvah soulai. 38Puhnou khei tsüle hinou moa sü jünou na-a tave khai-a souda khaitoua tave ngaolouyu kilai sütaosü rako veie! 39Ana hainasü sülo, süolouzü hakinou ki paopu nou kakuyu teilecho hinou vaomai nasü velaisa touyu sü raia süe toulouzü, puhnou zhaiheloua vaomai sünaye panou puh ki hisü daokhao loulaimoe. 40Neletao-a souda vuzü-a bulo; daiolouzü neletao nou puhye zhikhai moyu teilecho sühinou Mainah Poutu sü velai.”

Avei moa Ashi Kilai vei Nada

(Mt 24.45-51)

41Pitar nou paoe, “Mapao, nenou nada haina hai Eletaoye donou likhei paobaiho maikhemai hrülai donoua paowe?”

42Alia Mapao nou chila peie, “Sübüyu thaisü, teile zhou avei hinou puletao hi puletao zha touso peire donou puhvei paopuwo nou puhye panou puhvei kikha teitei pei hi kholaiyu louchelou veiyu ea tsü veishoyu touso khadapeio sü thaoh-e? 43Puhvei paopu nou khaiveyuki sübüa soua ngaolouyu kilai sünasü rako veie. 44Chekhaoa Enou neletao hi paoe, puhnou puhye panou puhvei buyu na teitei pei hi kholai. 45Ana kilai sünanou puhlah puh hi, ‘Avei paopu hai velai mohie,’ tea paolouzü, alia kukhe naotu poutu kilaitaoye tai-dashu louzü, alia toua, shoa ea zhaohsho zhia bulouzü, 46kilai sünanou zhimoyu teithe ea puhnou sümoyu pha hinou puhvei paopusü velai, alia puhye tudee peilai ea puhye sü paoyu zümoyu maitaoye koa pokhailai.

47“Alia puhvei paopunou liyusü süloukhai-a soudalou moyu moa puh züpa thaifüa soulou moyu kilai sünaye sü süda alaosou dapeilai. 48Ana puhvei züpayu sü süloumoa, dapei züdouyu vah souyu kilai naye sü khaiphoua dapeilai. Alaosou peikhaitouyu mai tali hinou alaosou kholai; alia maikhe mainou alaosou koua lüthoupei khaitouyu puh hinou puletao nou alaosou koua kholai.

Jisu nou Maikhe maiye Dadeyu

(Mt 10.34-36)

49“Enou deiphao hi mei laithou peire donou ve; alia sünahai meitao paloureshe toulouzü süsü daizhoa Enou züpa laisa! 50E dzükhao daloure ali bue; alia süna cheloumo sasü Enou daizhozhou le choroa busa! 51Deiphaohi kaonayu peire donou Enou vewe tea neletao chowu? Enou neletao hi paowe, kaonayu moe, ana dadere donoubaie; 52daiolouzü chushonou kikha alihi mai angou buyu hinou asüye ahai hinou ea ahaiye asü hinou dadelai. 53Puletao sü haibüa puoye nahpoutu hinou ea nahpoutuye puo hinou, pfüye nah naotupai hinou ea nah naotupaiye pfü hinou naiye mou hinou ea mouye nai hinou dadelai.”

Teilena Süyu

(Mt 16.2-3)

54Puhnou maisouhia paoe, “Neletao nou teinghi loulo hinou teihao payu ngaoyu kisü, neletao nou thala-a paowe, ‘Tei rülaire;’ alia sübüa süsü palouwe. 55Alia neletao nou khekou teikhainou hrükheyu kisü haibüa paoe, ‘Tei sousho laire;’ alia sübüa pabaiwe. 56Aveikho souyu maitao! Neletao nou deiphao ea tei zhai zhuloua dai palaisa touyu sü paolou süe; ana daidonou chu teile hainavei kosü neletao nou süloumoe?

Neletaoye Züa Bunaye koa Kusheelo

(Mt 5.25-26)

57“Alia neletao dai donou neletao lah kananou züe touyusü kusheelou moe? 58Alia nenou nepei hi mah dukhai peiyu puhye koa chikuki hi aduna nghojühi tahoyu kisü, chikukihi veteloumo jühi luduhi tabu kinou puhye koa chi sünasü kushee loure donou soutaosoua telo, sübümo louzü puhnou neye chiku-apeio hi seive peiwu shulai, alia chiku-apeionou neye hukhaki pei-chana bah hi thouwulai, ea pei-chana nou neye hukha kihi thouwulai. 59Enou nehi paowe, nenou akhai khailai pousha süna khapeimo koutesü sühinou ne sü alia palouhoe.”

Currently Selected:

LUK 12: POUMBSI

Highlight

Copy