JOHAN 19

1Südonou Pilat nou Jisu ye saloua panou dapeire. 2Alia reihmai taonou shunou peirüli khealoua sünasü puh pei hi porü peire, süthaisü puletao nou maomüyu duzao ali puh vahi zhaopeire; 3alia puletao nou puh hi takouloua paoe, “O Jihudimai Veo, maiso theo!” Alia puletao nou puhye kou bahnou phapeie.

4Pilat nou vakouhi tapapuloua puletao hi paoe, “Zhukhaio, Enou puh hinou soumahyu alia ngaoloumoe touyu sü neletaoye panou süloure donou Enou puhye neletao hi sapalai.” 5Südonou Jisu nou shu peirü nasü rüpfüa ea maomüyu duzhao nasü zaopfüa vakou tapae. Pilatnou puletao hi paoe, “Zhukhaio, Mainaye sü!”

6Napao adumaitao ea reihkhaomai taonou puhye ngaolouyu kisü, shusoua raopa loure, “Puhye kros vanou veatheawo, puhye kros vanou veatheawo!”

Pilatnou puletao hi paoe, “Neletao lah puhye saloua kros vanou veatheawo, daiolouzü Ewo puh hinou soumahyu halia ngaomoe.”

7Jihudimai taonou puh hi chila peie, “Eletao vei razhai ali bue, alia razhai süna thaifüa puhsü thaizüe, daiolouzü puh lah puhyenou Ramai Nahpoutu tea paowe.”

8Pilat nou chipao sütao choulouyu kisü, puhsü pipusholou khaire, 9alia puhnou puh fühao hi talou puloukhaia Jisu hi noue, “Ne daikinou ve-e?”

Ana Jisu nou chila peimoe. 10Südonou Pilat nou puh hi paoe, “Ne Ahi chi paolai mowu? Enou neye phapeire ea neye veatheare khouko bue touyu ne sümowu?”

11Jisu nou puh hi chila peie, “Sünahai Ramai nou nehi peimoyukowo nenou Apei hi soure khouko alia bulai moe; südonou Eye nebah hi thoupeiyu puh vei mahnou dupuhie.”

12Süna choulouyu kisü Pilatnou phapeire bo phoue, ana Jihudimai taonou shusouloua paoe, “Nenou mai hainaye phapeire toulouzü ne sü Kaisar samai moe. Maita linou puh hai vemai alie tea paolouzü puhsü Kaisar pei hi reihzüwe!”

13Pilat nou chipao sütao choulouyu kisü puhnou Jisu ye vakouhi ku-sapaloua, “Chuhkhubuh” (süolouzü Ebria lahinou “Gabbatha”) tea buyu chikuyubuh süna hi panou kou buloure. 14Sükihai Tachonüh jübü hi soudayu teitheki heako teilecho kiahai tayu phakie. Pilatnou Jihudimai taohi paoe, “Zhukhaio, neletao Veoyesü!”

15Puletao nou shusoua raolou khaire, “Puhye satawo, puhye satawo, puhye kros vanou veatheawo!”

Pilatnou puletao hi noue, “Neletao Veoye Enou kros vanou veathea laiwu?”

Napao adumai taonou chila peie, “Kaisar baimoa Eh Veo kukhe hae.”

16Südonou Pilatnou Jisu ye kros vanou veatheare donou puletao bah hi thoupeire.

Jisu ye Kros vanou Veatheayu

(Mt 27.32-44; Mk 15.21-32; Lk 23.26-43)

Südonou puletao nou Jisu ye sapoa tare. 17Alia puhnou lah puhvei kros pfüa “Peirao Buh” süolouzü, (Ebriamai lahinou “Golgotha”) tea kuyu buh hi tare. 18Sühinou puletao nou puhye koa kukhemai ahaiye puhvei bahkha zhoulo-nalo hi ea puhyenou puhai kolehi khailoua kros vanou veatheare. 19Pilat nou chahkhao alihinou larüchah rüthouloua sünasü kros vahi dakhaire; sünasü, “Nazareth hi Jisu, Jihudimai Veo” tea rüthou khaitoue. 20Jihudimai taolinou chahkhao nasü phoue, daiolouzü Jisu ye kros vanou veatheayu buh sünasü nuhduna ngheiki bubaie ea rükhai touyu la sü Ebria, Rom ea Greek tyamai lahinou rükhaitoue. 21Südonou napao adumai taonou Pilat hi paoe, “‘Jihudimai Veo,’ tea rüwuso, ana ‘Mai hainanou paoe, Esü Jihudimai Veo süe,’ tea rüpeikhaio.”

22Pilat nou chila peie, “Enou rüthouwuyu nasü rüthouwure.”

23Reihmai taonou Jisu ye veatheayu thaisü, puletao nou puhvei sahnü taosü poloua reihmai ali linou zha chekhei ngaoloure donou zha adai soua zhiloure. Puletao nou sahlu hazheiyu peinou tei koute soulisoua dokhai touyu puhvei khele zaodu süna-a poloure. 24Südonou puletao hrohinou alinou lihi paoe, “Haina louzü Eletao nou raphalai mokhe anou haina hai thaohveilaisa touyu rako zhulaikhe.” Sükua puletao nou souyusü sheeyu larübvü hinou paoyu nasü vetere donoubaie:

“Asahnü taosü puletao lah zhiloure alia Avei duzaona donou puletao nou rako zhuloure.”

Südonou haisü reihmai taonou souyu nasüe.

25Ana Jisu kros ngheikinou puhpfü, puhpfü matoupai, Klopas chapfü Meri, alia Magdalini Meri nou la-a bue. 26Jisu nou puhpfü ea puhnou leshiyu rozümai sünanou ngheikinou la-a buyu sü ngaoloua, puhpfühi paoe, “Naotupai, ne nahpoutuye zhukhaio!”

27Süthaisü puhnou rozümai süna hi paoe, “Zhukhaio, nepfüye sü!” Alia teilecho sühinou rozümai sünanou puhye panou puh ki hinou hrüloure donou sapoa tare.

Jisu Thaiyu

(Mt 27.45-56; Mk 15.33-41; Lk 23.44-49)

28Jisu nou chuo soure vahtao teitei sü souchewure tea sülouyu thaisü, sheeyu larübvü chipao nasü panou vetere donou puhnou paoe “E reiwe.”

29Sühisü khairouyu darkha dzünou phoupeiyu khouh ali bue; südonou puletao nou phako ali poloua sünasü pothou darkha dzü hinou süchaloure ea sünasü hyssop be ali pei hi phupaloua panou küre donou puh mü hi pokhe süpeie. 30Jisu nou khairouyu darkhadzü süna külouyu thaisü, “Chuo Chere!” tea paoe.

Süthaisü puhpei sü pfüna kouloua puh rako sü thaothou peiwure.

Jisu Nahi Heung nou Khüyu

31Teithe sünasü soudayu teitheyu donou, pfüphao sütaosü kros vahi Soteithezhou panou khaimore donou (daiolouzü Soteithe sünasü kuvoua sheeshoyu teithe aliyu donou), Jihudimai taonou Pilat hinou maisütao phisü sousha-a puletaoye kros vahinou potaloure donou tave khoe. 32Südonou reihmai taonou taveloua Jisu ye koa kros vanou veatheayu mai araina phisü soushawure ea süthaisü kukhemai alina phi-a soushawure. 33Ana puletao nou Jisu hi takouyu kisü puh thaiyu sü ngaoloua puh phisü puletao nou soushamoa baire. 34Ana reihmaitao hrohinou mai alinou Jisu na hisü heung nou khüpeie, alia sübü hinou zhe alia dzü küpare. 35Süna ngaolouyu puhnou zhopaoh peire, alia puhvei zhopaoh sü cheche-e. Alia neletaoye panou louche loure donou puhnou acheche nasü paobaie touyu sü puhnou süwe. 36Daiolouzü sheeyu larübvü hinou, “Puh rao ali koutea soushawu laimoe,” tea paoyu sü vetere donou sütaosü sübüa paloure. 37Alia sheeyu larübvü buh kukhe ali hinou paoe, “Puletao nou heung nou khüyu puhye sü puletao nou zhulai.”

Jisu ye Vuyu

(Mt 27.57-61; Mk 15.42-47; Lk 23.50-56)

38Süthaisü Arimathea hinou veyu Josef nou Pilat hi taveloua Jisu pfüphao sü khoe. Josef hai Jihudimai taoye piyu donou kheikhei soua Jisu thaifü tayu rozümai alie. Pilatnou süna poloure chi lüpeiyu donou puhnou taveloua puh pfüphao nasü poloure. 39Alia raiki Jisu hi kheinou veyu Nikodemas-a Josefye koa gondhar hai agur pothou hrüyu kainüvei na sühcho shirou pha poloua tave. 40Mai sühainou Jisu pfüphao sü poloua vure donou Jihudimai zhai thaifüa kainüvei na sütaonou koa jüyu sahnou pozüre. 41Alia Jisu ye kros vanou veatheayu buh sühisü kipei ali bue, alia kipei sühisü maitalia povukhai moyu sheetouyu khüh ali bue. 42Südonou teithe sünasü Jihudi maivei soudayu teitheyu donou ea khüh sünasü nghei-a bubaiyu donou, puhai nou Jisu ye sühi povuwure.

Currently Selected:

JOHAN 19: POUMBSI

Highlight

Copy