JOHAN 14
14
Jisu nou Puo hi Vere Ludue
1“Neletao le chorowuso; Ramaiye lülo, Eye-a lülo. 2Apuo kihi buh alaosou bue; alia Enou taho neletao donou buh ali soudalai. Sütoumo louzü haihai Enou neletao hi paolai moe. 3Alia Enou taho neletaoye donou buh ali soudayu thaisü, Enou buyu buh hisü neletao-a bure donou Enou dakhaive neletaoye Ahi savelai. 4Alia Enou tahore buh hi vere dunasü neletao nou süwe.”
5Thomas nou puh hi paoe, “Mapao, nenou daiki tawe touyu Ehnou sümoe; südonou Ehnou kakua ludu nasü süloulai?”
6Jisu nou puh hi paoe, “Ludu nasüa, acheche nasüa, alia ahri nasüa E-e; Ahinou moa maita linoua Puohi vemoe. 7Neletao nou Eye süa bulouzü, Apuoye-a neletao nou süwulai; alia chushonou neletao nou puhye süloue ea puhye ngaoloure.”
8Philip nou puh hi paoe, “Mapao, Puoye sü Eh hi ngaokhaio, alia sükulouzü Ehnou rukhalai.”
9Jisu nou puh hi paoe, “Pha haisoso Enou neletaoye koa bukhaia, ne Eye sümo hiwu Philip? Eye ngaolouyu puhnou Puoye ngaoloure; sütou louzü, nenou kakua, ‘Puoye sü Eh hi ngaokhaio’ tea paowe? 10Esü Puohi bue touyu sü nenou louche mowu? Enou neletao hi paoyu chipao taosü lah Amadonou paomoe; ana Ahi buyu Apuonou lah puhvah soubaie. 11Eye louchelo, süolouzü Esü Puohi bue ea puosü Ahi bue; molouzü Enou souyu vah sütao vanou Eye louchelo. 12Cheche vuzünou Enou neletao hi paowe, ‘Eye loucheyu puhnou Enou souyu vahtao sü puh-a soulai; alia haitao jünou duyu vahtao-a puhnou soulai, daiolouzü Enou Apuohi tawe. 13Nahpoutu vanou Puoye soudusho peiloure donou, neletao nou Azhih hinou khoyu talisü Enou soupeilai. 14Neletao nou Azhih hinou hatalia kholouzü, süsü Enou soupeilai.’
Rako Mashi Seikou peire Apaopeiyu
15“Neletao nou Eye leshi louzü, Achikha taosü neletao nou zülai. 16Alia Enou Puo hinou kholai ea neletaoye koa teisanou bure soukha-apeio kukhe ali puhnou neletao hi peilai. 17Puh hai Ramai vanou achechena süngao peiyu Rako nasüe. Deiphao mainou puhye popei louhoe, daiolouzü sünanou puhye ngaomoe moa sümoe. Ana neletao louzü puhye süwe, daiolouzü puhnou neletaoye koa bue ea neletao lehi bue.
18“Enou neletaoye vearouna kua thaowu laimoe; E neletao hi khaive khailai. 19Phajü thaisü, deiphao mainou Eye ngaopukhai laimoe, ana neletao louzü Eye ngaolai; daiolouzü Enou hriyu donou, neletao-a hrilai. 20Teithe sükisü, Esü Apuohi bue, neletaosü Ahi bue ea Esü neletao hi bue touyusü neletao nou sülai.
21“Achikhatao polouyu ea sütao zülouyu mai sünasü Eye leshiyu nasüe. Eye leshiyu puhye Apuonou leshilai; alia E-a puhye leshilai ea E lah Eye puh hi pongaolai.”
22Iskariot moyu Judas nou puh hi paoe, “Mapao, nenou kakua nelah neye deiphaomai hi moanou Eletao hi ngaopeilai?”
23Jisu nou puh hi chila peie, “Maita linou Eye leshi louzü, puhnou Achipaosü zülai, alia Apuonou puhye leshilai, alia Apuo ea Enou puh hi taveloua puhye koa kilinou hrüzholai. 24Eye leshi moyu puhnou Achipao taosü zümoe; alia neletao nou chouyu chipao nasü Aveimoe ana Eye seive peiyu Apuo veie.
25“Haitao teiteisü neletaoye koa bubukinou neletao hi Enou paopeire. 26Ana Apuonou Azhih hinou seive peilaiyu soukha-apeio Rako Mashi sünanou ha teitei neletao hi doupeilai, alia Enou neletao hi paokhai touyu pfüphou neletaoye panou li-chopa loulai.
27“Kaonayu hai Enou neletao hi thaodai khaitoue; Avei kaonayu nasü Enou neletao hi peikhaitoue; Enou neletao hi peiyu hai deiphao mainou peiyu kumoe. Neletao lehai chorowuso, moa piwuso. 28‘E talai, alia neletao hi E khaive khailai,’ tea Enou neletao hi paoyusü neletao nou chouloure. Neletao nou Eye leshi louzü, neletaosü lesa loulai, daiolouzü Esü Apuohi tawe; daiolouzü Puonou Ajünou duhie. 29Alia süna palouzü neletao nou louche loure donou, süna pamo jühinou chunou Enou neletao hi sünasü paongao peire. 30Enou neletaoye koa phaso chipha khailai moe, daiolouzü deiphao hainavei paopusü laire. Puhnou Apei hi soure khouko hae; 31Ana Enou Apuoye leshie touyu hai deiphaomainou süloure donou Apuonou Ahi chikha peikhai touyu thaifüa Enou soubaie.
“Shulouwo, buh haihinou Eletao talairekhe.”
Currently Selected:
JOHAN 14: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
