SHURAI 7
7
Dzüdu Veyu
1Ramai nou Noha hisü paoe, “Ne kihikhamai saloua sakhao hi taloulo, daiolouzü maiphao haina hai ne likhei anghoujü hi cheche-a hrübaie touyu Enou ngaoloure. 2Sheeyu khaonatao hai reijü-reike koa nou pa anai-nai pothoulo alia sheemoyu khaonatao hai reike reizü koa pa alili pothoulo, 3alia tei raohou reike reijü pa anai-nai haitao vei tyai hai deiphao hi khailoure donou sakhao hi pothoulo. 4Daiolouzü teithe anai zhousü Enou teirü seikou Enou soukhai touyu hrikhaona hrülai hai panou souhawure donou teithe raidai hea-khei panou teirülai.” 5Mapao nou kharochi peiyu teitei hai Noha nou souloue.
6Deiphao hi dzüdu veyu phaki Noha hai po 600 pare. 7Puh, puh chapfü, puh nahpoutu ae puletao vei chapfütao sü puhye koa dzüdu hinou turei loure donou sakhao hisü salou loure. 8Ramai nou Noha hi kharochi peiyu büa sheeyu sheemoyu hrikhaona reike reizü, khaonü khaolou, 9pa ahai-hai sakhao hisü salou loure. 10Teithe anai thaisü deiphao hi dzüdu vere.
11Noha nou po 600 payu phaki, sünavei khoukha kianai zhou hai dzüdu bomü teitei popare ae teipei dzü bomü taosü houpa peire, 12alia deiphi hisü hea-khei teithe raidai teirü koure. 13Süzhou teithe hinou Noha koa puh nahpoutu Shem, Ham ae Japheth, Noha chapfü alia puh nahpoututao vei chapfütao hai sakhao hisü talouloue. 14Puletao koa kikhaorü, rekhaona atai adu, tei raohao alia haitao vei tya kukuyu khemai, 15hrikhaona hrülai khaonü khaolou, reike reijü ahai-hai Noha koa sakhao hi talou loure, 16Ramai nou kharochi peiyu thaifüa talou loure. Süthaisü Noha thailo nou Mapao nou kikhusü khuwure.
17Teirüshi hai deiphao hi teithe raidai rükouyu phaki, dzü sü dulailai paloua sakhaosü pfüa phaopare. 18Dzü hai kulailai kheloua sakhao nasü dzüpei nou phaoloure. 19Dzü sü prousho kheloua deichi adu teitei hai holoure, 20ae dzü nou deichi adu pei jünou mitar anai phali hai kuloure. 21Deiphao hi hria buyu hrikhaona, tei raohou, soukhaona ae mai hrülai, 22deithe hi buyu ssüpha ssüthouyu hrülai hai thaire. 23Mapao nou deiphao hi hrikhaona- mai, soukhaona ae tei raohao hrülai souhawure. Noha alia puhye koa sakhao hi loulouyu tao likhei shokhai peia baie. 24Dzünou deipei hinou khaita moa buyu hai teithe 150 bue.
Currently Selected:
SHURAI 7: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
