SHURAI 20

Abraham alia Abimelek

1Abraham nou buh sühinou Negeb füdei hilosa tapoa Kadesh ae Shur ko hinou ve hrüe. Puhnou Gerar nuh hinou shetumai ali soua hrüa buki, 2puhnou “puh chapfü Sarah ye nou atupai baie” tea pao-a baiwe. Südonou Gerar hi veo Abimelek nou mai seiho Sarah ye saloure. 3Ana Ramai nou süzhou khei zhiho mekou nou Abimelek hi paoe, “Zhukhaio, ne thailai, daiolouzü nenou polouyu naotupai hai maivei chapfüe.”

4Ana Abimelek nou naotupai nghiki koumo hie, südonou puhnou paoe, “Mapao, ne mahmo soumoyu mai-a southa bailaiwu? 5Abraham-a lah haibüa ahi paoe, ‘Naotupai sü atupai baie’. Alia naotupai-a ‘Puhsü apou baie’ tea paomowu? Süvanou Esü tsü sheemoyu lia ha-a haisü souwure.”

6Süthaisü mekou hinou Ramai nou puh hi paoe, “Ovai, nenou tsüle sheemoyu lia ha-a haisü soua baie touyu Enou süwe. Südonou neye panou anghoujü hinou mah soulou moe, alia neye panou naotupaiye deiloumoe. 7Ana chuo mai chapfü sü maipuo hi dakhai peio, daiolouzü puh hai rachipaolayu mailie alia neye panou thaimore donou puhnou neye veachi paopeilai. Ana nenou naotupaiye lukhai peimo louzü, ne alia nevei mai hrülaiye sü southa khai bailai touyu sülo.”

8Südonou Abimelek nou shona kushu loua puh maitaoye kuloua haibüa vepare touyu teitei sü paongao peie, alia puletao nou süsü süloua ngaopi shore. 9Süthaisü Abimelek nou Abraham ye kuloua puh hi paoe, “Nenou ahi souyu haisü daige? Enou ne hi daimah soupei khaitoua ahi ae avei vedei hi hashi pove thou peilai touwe? Nenou souzü moyu vah ali ahi soupeiwure. 10Ne daitsüli choloua haibüyu vah sü ahi souwe?”

11Abraham nou chila peie, “Enou haibüa souyu hai, buh haina hi hrüa buyu mainou Ramai ye piyu hai bupai moe, alia achapfüye shaoloua Eye southa shulai tea Enou choloua souwure. 12Süli themoa chechea honapai hai atupai baie, apuo nah-e, ana apfü nah moe, süvanou Enou puhye naloue. 13Ramai nou Eye apuo ki hinou vakou seitayu phaki, Enou puh hisü haibüa paowure, ‘Nenou Eye tsükhouyu zhai hinou ahai nou buhliki veyuma, E hai ne pou baie’ tea paolo.”

14Süthaisü Abimelek nou zhaotu, chode, ae qila mai taoli poloua Abraham hi peie, alia puh chapfü Sarah ye sü puh hi dakhai peie. 15Puhnou Abraham hi paoe, “Zhukhaio, avei vedei haitao hi nenou hrünüyu buh hisü hrüa bailai.” 16Alia Sarah hi puhnou paoe, “Zhukhaio, Enou nepou hisü shahu theli peiwure. Haisü neye koa buyu mai hrülai nghoujü nou ne hai mah hae touyu shee souyu nasüe, alia mai hrülai nghoujü nou ne hai sheetou tea baie.”

17Süthaisü Abraham nou Ramai hi veachi paopeia Ramai nou Abimelek ye souvei peie, alia puh chapfü, puh qila maipfü hrülai-a souvei peia panou tounah hrüloure. 18Daiolouzü Abraham chapfü Sarah ye polo vanou Abimelek kikha buyu naotumai hrülaiye sü panou nahmai hrümore donou Ramai nou khuwure.

Currently Selected:

SHURAI 20: POUMBSI

Highlight

Copy