SEI-ATAMAI VAHTAO 2

Pentekos Teitheki Rako Mashi Kouyu

1Alia Pentekos teithe velouyu kisü puletao hrülaisü buh ali hinou vedzüa buloure. 2Alia sükhaimoa chihshoyu teikhai hüveyu kua kho alisü rakivanou veloua puletao nou buyu ki süna hisü phoupei loure. 3Alia sükisü meikei kuyu mali taosü kouloua puletao alili pei hi ve kukua taopeiyu sü puletao nou ngaoloure. 4Sühinou puletao hrülaisü Rako Mashinou phoupeiloua Rakonou puletaoye süpeiyu thaifüa kukuyu la hinou paoshu loure.

5Alia sükisü tei khehinou hrüa buyu deiphao hi tahrüh liki hinou achechea rathoyu Jihudimai taosü Jerusalem hinou tave chao-a buloure. 6Alia pai süsü choulouyu kisü maisou alaosou tave dzüloure, alia puletaosü khupa loure, daiolouzü mai sütaonou pao-a buyu sü puletao hrülainou lahlah la hinou choukhai loure. 7Alia puletao hrülai sü khupa sholoua alinou lihi paoe, “Zhukhaio, chi pao-a buyu mai haitao hrülaisü Galilee himai mowu? 8Sükulouzü kakua Eletao ali linou puletao nou paoyu sü Ehlah Eh pfünabuh la hinou choulouwe? 9Eletao sü Parthia, Media ea Elam hinou; Mesopotamia, Judea ea Kappadokia hinou; Pontas ea Asia hinou, 10Frigia ea Pamphulia hinou Ejipt ea Kurini ngheiki buyu Libia teideitao hinou ve. Eletao hrohi kamainou (süolouzü Jihudimai ea Jihudi dalou maitao) Rom hinou ve. 11Eletao kamainou Krit ea Arabia hinou ve; sütoukhaia, Eletao hrülainou puletao nou Ramai nou adu-sho soupeiyu vanou paongaoyu sü Ehlah Eh la hinou chouwe!” 12Alia puletao hrülainou khupaloua ea tsü-bo phouhaloua alinou lihi, “Haire dai khue?” tea noue.

13Ana kukhemai taonou lüloumai taoye konüa, “Mai haitaosü darkha zhaoh ashu shozhiwe!” tea paoe.

Pitar nou Pentekos ki Chi paoyu

14Ana Pitar nou kialitaoye koa lashuloua puh paisü kushoa maisou hi paoshu loure; “He Jihudimaitao ea Jerusalem hinou hrüa buyu maikhemai hrülai, süna vanou Enou neletao hi sheesha-a paongao peilai, Achipao hai soutaosou keipeikhaio. 15Neletao nou choyu kua mai haitao louzü zhaoh shozhi moe, daiolouzü chu teile haisü shona teilecho akü tabai hie. 16Ana haisü Joel rachi paolawonou paopawuyu süsüe süolouzü:

17“Ramai nou paoe, akhai teithetao hisü

haibüa palai; süolouzü,

Enou Arakosü maikhemai hrülai pei hi lakou thoupeilai:

Alia neletao nahpoutumai ea nah naotumai taonou rachi paopalai,

alia neletao vei nahlemai taonou zho ngaolai,

alia neletao vei khaimai taonou me mulai.

18Ovai, teithe sütao kisü Enou Akilai naotu-poutu maitao pei hi Arakosü lakouthou peilai;

alia puletao nou rachi paopalai.

19Alia Enou reikou ratei hinou khupa tyali ea khekou deiphao hinou shee tyali süolouzü zhe,

mei ea meikhaovei dzükhao taosü pongaolai;

20Mapao vei dushoyu ea varuyu teithe vemo jühinou teinghi sü zhitalai ea khouh sü zhe data bailai.

21Alia sükisü Mapaowo zhih kua bumai taliye sü khailu peilai.

22“He Israel maitao, chipao haitao sü keiloukhaio! Nazareth hi Jisu hai Ramai nou neletao hrohinou puh vanou mainou soulouho khupa vahtao ea sheetao souyu, süolouzü puh hai Ramai nou ae-ao touyu mai alie touyu sü neletao lah neletao nou süa bue. 23Mai hainaye sü Ramai vei soudayu ea puhvei raia süyu tsü süna thaifüa neletao bah hi thoupeiwu-a, neletao nou mai ashimaiye panou puhye sü kros vanou datheare. 24Anou Ramai nou puhye sü athaivei khouko hinou mado soupeiwu-a souhri peire, daiolouzü puhye sü athainanou bekhai shalou hoe. 25Daiolouzü David nou puh vanou haibüa paoe,

‘Enou teisanou Mapaoye Anghojünou ngaowe,

daiolouzü Eye panou kao-du tamore donou puhsü

Abahkha zhoulo hinou bue.

26Südonou Alesü sashowe alia Amali nou vashoyu chipaowe;

Sübaimoa Apfüphao-a puhye zhia hrülai.

27Daiolouzü nenou Arakoye sü athaimai deiphao hi thaokhai peiwu laimoe;

moa nenou nevei Masheeoye sü panou tah-rayu ngaolaimoe.

28Nenou Ahi hriyu ludu taosü ngaopeiwure;

alia nenou Eye koa bupeiyu sünanou

Alehai alaosou sousa peilai.’

29“Athaihou jürai maitao, Enou khuveishoa neletao hi Eletao puo-pao David vanou paopei lousüe, süolouzü puhsü thai-a thaire, ea povu-a povure, alia puh khühsü zhou koutea haihi bue. 30Südonou puhnou rachi paolamai ali soua puh tao-nahmai aliye panou puh vebuh hisü bulai tea Ramai nou cha-chouli puh hi apaopei khaitoue touyu sü puhnou süloue. 31Ramai nou thaikhaihi soure sü puhnou rai-a zhingaoloua Khrista nou hrishu laiyu vanou haibüa paoe,

‘Puhye sü thaimai deiphao hinou thaowu moe;

moa puh pfüphao sü khüh hinou tah-ramoe.’

32Jisu hainaye sü Ramai nou souhrishu peire, alia Eletao hrülaisü hainavei zhopaoh maitaoe. 33Südonou puhye sü puhpuo, Ramai bahkha zhoulo hi panou khe bulouyu vanou, alia Puo hinou apaopei khaitouyu Rako Mashi nasü ngaolouyu donou, puhnou chu neletao nou ngao-a buyu ea choua buyu Rakovei sapeina nasü lakou thoupei khaitoue. 34Daiolouzü Davidwo raki hi khemoe, ana puhnou paoe,

‘Mapaowo nou A Mapao hi paoe,

Abakha zhoulo nou bulo.

35Enou nevei ngaoba maitaoye sü ne phi khehi khaipeimo sasü.’

36“Südonou neletao nou kros vanou veatheayu Jisu hainaye sü Ramai nou Mapao-a, Khrista-a soupeire touyu sü Israel maitao hrülainou soutaosoua sülo!”

37Maikhemai taonou chipao hainasü choulouyu kisü puletao lesü daisholoua Pitar hi ea kukhe sei-atamai taohi paoe, “Athaihou jürai khemai, Ehnou dai soulai?”

38Alia Pitar nou puletao hi paoe, “Le dalo, alia neletao mah khaipeire donou, neletao mai ali linou Jisu Khrista zhih hinou dzükhao dalo; alia neletao nou Rako Mashi vei sapeina nasü ngaoloulai. 39Daiolouzü Mapaowo Eletao Ramai nou apaopei khaitouyu nasü puh hi kuve-a buyu mai hrülai hi süolouzü neletao, nele nahmaitao ea adoukounou buyu mai hrülai donoue.”

40Alia puhnou kukhe chi taoli pao-a zhopaoh soue ea puletaoye süpeiyu noupu paoe, “Neletao lahnou ashi maikha haina hinou khailu palouwo!” 41Südonou puh chipao polouyu maitaoye sü dzükhao dapeire, alia teithe süzhounou mai the asüpha puletao mehi thoupu peire. 42Alia puletaosü sei-atamai taonou doupeiyu hi, rako meime hi, raokhao soukhoyu hi ea veachi paoyu hinou tobai soumoa lenou shoa buloure.

Lüloumai taovei Ahrü

43Alia sei-atamai taonou khupa vah alaosou ea shee tyali souloure ea maikhemai hrülai sü ngaopisho loure. 44Alia lüloumai hrülaisü vedzüloua na teitei sü khaloure. 45Alia puletao nou puletao vei ki-lu, ki-na buyu teitei sü zhowu-a sütao veishi sü mai hrülai hi lah lahnou moshi laiyu thaifüa zhihpeire. 46Alia teithe tsünou puletao sü tsü-le alisoua Rathoki hinou tave dzüa bue, alia ki, ki hinou tave raokhao soukhoa puletao vei tovai sü koa sasa-a ea le alikhei soua tousho loure. 47Alia haikua Ramaiye shoa, maikhemai hrülaivei zhuvea sü ngaoloue. Alia Mapaowo nou khailuloua buyu maitaoye sü teithe tsünou puletao me hisü pothou pupeie.

Currently Selected:

SEI-ATAMAI VAHTAO 2: POUMBSI

Highlight

Copy