SEI-ATAMAI VAHTAO 13

Barnabas ea Saulye Doloua Seitayu

1Alia chuo Antiok hi buyu lüloumaime hisü rachi paolamaitao, dou-apeimaitao, Barnabas, Simeon Ateina, Kurini hi Lukia, alia Herod veoye koa kipakhai touyu Manaen ea Saul haitao bue. 2Alia puletao nou Mapaoye thoa ea lüh-a bukinou Rako Mashinou puletao hi paoe, “Enou Barnabas ea Saulye panou soulai tea kulouyu vah süna donou puhaiye Eye donou dokupa khaipeio.”

3Sükisü puletao nou lühloua veachi paoyu thaisü, puletao bahsü puhai pei hi khaipeiwu-a puhaiye seitare.

Kupra hi Taveyu

4Sübüa puhaiye sü Rako Mashinou seitawu-a puhaisü Selukia hi takoure; alia sühinou Kupra hi koutesü dzüluki nou saopoa tare. 5Puhainou Salami hi koulouyu kisü, Jihudimai rathobuhtao hinou Ramai chipao sü paodoue. Alia Johan Mark-a koa ta-a panou puhaiye soukhae.

6Puletao nou zaipeidei teitei tachopa Paphos hi velou loure. Sühinou puletao nou khupa-kheido souyu Bar-Jisu tea kuyu Jihudimai amada rachi paolamai aliye tave daoloure. 7Puhsü zaipeidei sühi teideikhowo soua buyu Sargia Paulas tea kuyu tsü veishoyu mai sünaye koa bue. Teideikhowo hainanou Barnabas ea Saulye puh nghojü hi ku save, daiolouzü puhnou Ramai chipao keinüwe, 8ana khei-khupa do souyu Elumas nou (puh zhih sü Greek la hinou sükue) puletaoye duloua zaipeidei khowoye panou lü süna hinou tarei loure donou ate loure. 9Sükisü Paul tea kuyu Saul nou Rako Mashinou phoupeiloua khei-khupa do souyu mai süna hisü zhuteiloua, 10puh hi paoe, “He! do ashi amadanou phoupeia buyu, acheche teiteiye ngaobayu rashivei nahpoutu, newo Mapao vei acheche ludu nasü süthaima süthaimoyu thaolai mowu? 11Alia chuo zhukhaio, Mapao vei bahkha nepei hi khapoa bue, alia ne nghisü chaloua teile phajü teiva ngaolai moe.”

Sübü hinou puhnghi sü teihao ea teizhinou kou züloure ea kamaiye panou puhye bahnou süthai peire donou maikhe maiye phou sühao tare. 12Sükisü teideikhowo sünanou pa-a buyu sü ngaoloua louche loure, daiolouzü puhsü Mapao vei vanou doupeiyu hinou khupasho loure.

Paul nou Pisidia hi Antiok hinou Vah souyu

13Chuo Paul ea puhye koa laimaitao nou Paphos hinou dzüluki saopoa Pamphulia teidei Perga hi vetare. Alia Johan Mark sü sühinou puletaoye thaowu-a Jerusalem hi khaivere. 14Ana puletaowo Perga hinou taposhu Pisidia hi buyu Antiok hi vetare, alia Soteithe kisü puletao nou rathobuh hi tave louloua sühinou kou chobuloure. 15Alia razhaina ea rachi paolamaitao vei larübvü sü phouyu thaisü rathobuh hi peicha maitao nou puletao hi chi seita-a panou paoe, “Thaihou jürai maitao, maikhemai taoye donou le souho peire chipao neletao hi bue toulouzü paopeikhaio.” 16Südonou Paul nou tashu laloua puletao hi bahnou zhangao-a paoe:

“Israel maitao, ea kukhe Ramaiye pi-a laimaitao keikhaio! 17Israel maitao Ramai nou Eh puopaomaiye doloua puletao nou shevai-shesü soua Ejipt teidei hinou hrübu kisü puletaoye soudu-sho peie, alia teidei sühinou puhnou puletaoye dushoyu puhvei khoukonou süthai papeie. 18Alia po raidai pha puhnou puletaoye koa rekounou shamea-a salaipeie. 19Alia puhnou Kainan teidei hi buyu tahrüh anaiye souhawu-a teidei sütaovei paopu panou soure donou po kaidai-a raingou pha puhnou puhmaitao hi peie.

20“Süthaisü Samuel rachi paolawo koutesü puhnou puletao hi chikupeimai peie. 21Süthaisü puletao nou veomaili peire donou khoyu kisü, Ramai nou puletao hi Benjamin khü himai, Kish nahpoutu Saulye panou po raidai veo soure donou peie. 22Alia Saulye phalaiyu thaisü puhnou David ye panou puletao veo soupeie. Puhnou sükua David vanou zhopaoh pei-a paoe: ‘Enou Jesse nahpoutu David hinou Azüpa mainasü ngaoloure, puhnou Enou li-choyu pfüphou soupeilai.’ 23Ramai nou Israel maitao hi peilai tea apaopeikhai touyu khailu-apeio Jisu ye sü panou mai haina tao-nah hinou veloue. 24Jisu vemo jühi sü Johan nou Israelmai hrülai hi le dalouyu vei dzükhao dayu vanou ko paodoupeie. 25Alia Johan nou puhvah souche louyu kisü, maikhemai hi haibüa paoe, “Neletao nou Eye nou thaoh touwe? Ewo puh moe. Ana zhukhaio, puh sü Athailo nou laie ea Eye donou puh phikha rai pheipayu koutea khamoe.

26“Athaihou jürai soua buyu Abraham nahmaitao ea neletao hrohinou Ramaiye pi-a hrüyu tahrüh kukhe maitao, Eletao hisü khailupeiyu ko haina seive peikhaitoue! 27Daiolouzü Jerusalem hinou hrüa buyu maitao ea puletao peichamainou puh hai khailu-apeio nasüe touyu sülou moyu vanou moa Soteithe tsüh phoua buyu rachi paolamai vei chipao taosü sülou moyu vanou, puh pei hisü mah dukhai peiwu-a chipao sütaosü panou vete loure. 28Alia puletao nou puhye southea züyu mah lia phouhakhaia puhye southeare donou puletao nou Pilat hinou kholoue. 29Alia puh vanou rüthou khaitouyu teitei sü puletao nou souve telouyu kisü, puhye sü puletao nou kros vanou pokouloua khüh hi pothou vure. 30Ana Ramai nou puhye sü athai hinou sou hrishu loure; 31alia puhye koa Galilee hinou Jerusalem hi takheyu maitao hisü puhnou teithe taoli puh zhu ngaopeie ea chuo puletao nou maikhemai hi puhvei zhopaoh soua bue. 32Alia Eletao puo-paomai taohi Ramai nou apaopei khaitouyu ko avei nasü Ehnou neletao hi povewe, 33süolouzü Ramai nou Jisu ye panou hrishuloua puletao nahkhemai Eletao hinou chipao süsü panou veteloure. Haisü lou larübvü chime ahai chena hi rüthouyu kue:

‘Ne sü Anah Poutue

Zhou Enou neye napeire.’

34“Alia puhye panou khüh hinou tah-rayu ngaomoa athai hinou souhri peiwulai touyu vanou Ramai nou haibüa paore:

‘Enou David hi peilai tea apaopeikhai touyu sheeyu ea veikhai moyu ha nasü nehi peilai.’

35Südonou puhnou lou larübvü buh kukhe ali hi-a paokhaie,

‘Nenou nevei Mashioye khüh hinou tah-rayu panou ngaowulai moe!’

36Daiolouzü David wo puh teile hinou Ramai nou li-choyu kuvah sü souwu-a zhitare ea puh puomaitaoye koa povure ea sükua puhvei pfüphao sü khüh hinou tah-ra tare. 37Ana Ramai nou sou hrishulouyu puhwo tah-rayu ngaomoe. 38Südonou Athaihou jürai maitao, haisü neletao nou süpeikhaio, süolouzü mai haina vanou mah khaipeiyu kosü neletao hi paodouwe. 39Moses vei razhainou neletaoye mado soupeilou hoyu teitei hinou chuo puhye louche louyu mai hrülaiye mah teitei hinou mado soupeire. 40Südonou leikeilo, molouzü rachipaolamai taonou paokhai touyu sünasü neletao pei hi vete shulai: süolouzü:

41‘Zhukhaio, maiye ngaophou moyu taore,

khua khupa khaio ea thai-a thaitawo!

Daiolouzü Enou neletao teile hinou vah ali soue;

maita linoua neletao hi vah süsü paongao khaia

Neletao nou louche khailai moe!’ ”

42Alia Paul ea Barnabas nou rathobuh nasü thaowu-a vakou tapayuki maikhe mainou puhai hisü naki Soteithekia tave chi sütaosü puletao hi doupu peikhaio tea khoe. 43Alia maikhe mainou ratholoua popayu kisü Jihudimai taoli ea leishoa rathoyu Jihudimai zhai polouyu maikhemai taolinou Paul ea Barnabas thaifüa taloure ea puhai nou puletaoye chipha-a Ramai vei zhuvea hinou tobai soumoa buloure donou soutaosoua süpeie.

44Soteithe nana hisü nuhdu sühi maikhemai poulonou Ramai chipao keiloure donou tave dzüloure. 45Ana Jihudimai taonou maisouye ngaoloukhaie ngaorai sholoua Paul nou paoyu hisü veiva loure ea puhye sü konü loure. 46Sükisü Paul ea Barnabas nou khuvei puloua paoputa khaire; “Ramai chipao hai rairaikaia neletao hi paongao peirepha vuzüe. Ana neletao nou süsü pobayu vanou ea neletao lah teisa ahrihai ngaozümoe tea cholouyu vanou zhukhaio, chuo neleye thaowu-a Ehwo tahrüh kukhe mai hi talai. 47Daiolouzü Mapao nou haibüa Eh hi chikha peikhaitoue:

‘Neye panou deiphao akhai koute hi khailu peiyu sü pove

peire donou, Enou neye tahrüh kukhemai vei ava panou souloure.’ ”

48Tahrüh kukhemai taonou süsü choulouyu kisü puletao sü sasholoua Ramai chipaoye sü paosho loure; alia teisa halouho ahri donou dopa khaitouyu maitao hrülaisü louche loure.

49Alia Mapao vei chipao sü teidei süna buh likihi paodou vere. 50Ana Jihudimai taonou mainou tsükhouyu ea lenoua rathoyu naotumaitao ea nuhdu sühi peicha maitaoye thaopeiwu-a panou Paul ea Barnabas pei hi souvea-souho peire ea puhaiye puletao teidei hinou hutare. 51Ana puhai nou puletao pei hi motouyu vei shee soua phihi naisü deiphi hi sükou khaiwu-a Ikonium hi tare. 52Alia rozümai taosü sayu nou ea Rako Mashinou phoupei loure.

Currently Selected:

SEI-ATAMAI VAHTAO 13: POUMBSI

Highlight

Copy