ZAKARIA 13
13
Sual tlenfaina
1Chumi ni-ah chuan Davida chhûngte leh Jerusalem-a chêngte sualna leh bawlhhlawhna tlêng fai tûr tui a lo luang chhuak ang. 2Chumi ni chuan ram chhûnga an lam ṭhin milem zawng zawng chu ka tibo vek ang a, an hre reng tawh lo vang, tih hi Engkim Lalpa thuchhuak a ni. Zâwlneia inchhâlte leh thlarau bawlhhlawhte chu ram ata ka hnawt bo vek ang. 3Tu pawh, zâwlnei anga thu puang lui zêl chu amah hringtu, a nu leh paten a hnênah, “Lalpa hminga dâwt i sawi avângin i thi ngei tûr a ni,” an ti ang a, amah hringtu a nu leh pa chuan a thu puang lai chu an vit hlum ang. 4Chutih hunah chuan, chûng zâwlneite chuan an inlârna hmuh chu an zahpui ang a, mi bum nân sahmul kawrfual#13:4 Zâwlnei kawr, a hmul tihkawlh loh savun emaw sahmul hraw chi, kêl hmul emaw tah khâwm, kawmawl ang (2 Lal. 1:8) an ha tawh lo vang. 5“Zâwlnei ka ni lo, ka naupan têt ata lo nei mi ka ni,” a ti zâwk ang. 6“A nih, hêng i taksaa pemte hi engtizia nge?” an tih chuan, anin, “Ka ṭhiante inah min tipalh a ni,” a ti ang.
Pathian berâmpu tihhlum tûr
7“Harh teh, khandaih, ka berâm vêngtu,
Ka thawhpui chu bei rawh,”
Engkim Lalpa thuchhuak chuan a ti.
“Berâmpu chu vua la, berâmte chu darh rawh se,
A note chungah pawh kut ka thlâk ang. #Mt. 26:31; Mk. 14:27.
8Ram chhûngah hetiang thil hi a thleng dâwn a ni,”
Lalpa thuchhuak chuan a ti.
“Mi hmun thuma ṭhena hmun hnih an tlu ang a, an thi ang,
Hmun thuma ṭhena hmun khat chu an zuah ang.
9Zuahte chu meiin ka fiah ang a,
Tangkarua tihthianghlim angin ka tithianghlim ang a,
Rangkachak fiah angin ka fiah ang.
Min ko vang a, ka lo chhâng ang,
‘Ka mi in ni,’ ka ti ang a,
Annin, ‘Lalpa, kan Pathian chu i ni,’ min ti ang.”
Currently Selected:
ZAKARIA 13: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
