MARKA 2

Zeng tihdam

(Mt. 9:1-8; Lk. 5:17-26)

1Ni eng emawti hnuah chuan Kapernaum-ah a lo lût leh a, ina a awm thu a darh ta a. 2Tichuan, pâwnah pawh kawngka bul thleng khat tlatin mi tam tak an lo pung khâwm a, an hnênah chuan thu a hril ta a.

3Mi paliin zeng pakhat an rawn zâwn a, a hnên an rawn panpui a. 4Mipui avâng chuan an hnaih hlei thei lo va, a awmna zâwn in chung chu an ṭhiat a; tin, an ṭhiat zawhin zeng chu a zâwnna chawpin an zu thlâk a. 5Isuan an rinzia a hmuhin zeng hnênah chuan, “Ka fapa, i sualte ngaihdam a ni ta e,” a ti a.

6Chutah chuan Dân zirtîrtu ṭhenkhat ṭhu ve an awm a, 7“He mi hian engah nge hetianga a tih le? Pathian pawi a sawi a ni; mi pakhat, Pathian chauh lo chuan, tu nge sualte ngaidam thei?” an ti rilru hlawm a. 8Chutiang chuan an ngaihtuah tih Isuan a hre nghâl mai a, an hnênah, “Engah nge rilrua chutiang in ngaihtuah ni? 9Zeng hnênah hian, ‘I sualte ngaihdam a ni ta,’ tih nge awl a, ‘Tho la, i mutna kha la la, kein kal tawh rawh,’ tih? 10Khawvêlah hian Mihring Fapa hian sual a ngaidam thei tih ka han hriattîr ang che u,” a ti a; zeng hnênah chuan, 11“Tho la, i mutna kha la la, i inah haw rawh, ka ti a che,” a ti a. 12Tichuan, a tho va, a mutna chu a la a, an vaia hmuhin a chhuak ta nghâl a; an za chuan mak an ti êm êm a, “Hetiang hi kan la hmu ngai rêng rêng lo,” tiin Pathian an fak a. #Mt. 9:35.

Levia koh thu

(Mt. 9:9-13; Lk. 5:27-32)

13Tin, dîl lamah chuan a kal leh a, mipuiin an rawn pan dûl dûl a, ani chuan a lo zirtîr a. 14A kal pahin, Alfaia fapa Levia#2:14 Mss ṭhenkhatah ‘Jakoba’ tih a ni. chu chhiah khawnna hmuna ṭhu a hmu a, “Mi zui rawh,” a ti a. Ani chu a tho va, a zui ta a. 15Tin, a inah#2:15 Levia inah emaw, Isua chênna inah emaw ruai an ṭheh a ni. ruai a ṭheh a, Isua leh a zirtîrte chu chhiahkhawntute leh mi sual tam takin chawhlui an rawn kîlpui hlawm a, tam takin amah an zui ve tawh a ni. 16Farisai-te zînga Dân zirtîrtute chuan chhiahkhawntute leh mi sualte a kîlpui an hmuh chuan a zirtîrte hnênah, “Engtizia nge chhiahkhawntute leh mi sualte zînga a ei ve le?” an ti a. 17Isuan chu chu a hriatin an hnênah, “Mi hrisêlten daktor an ngai lo va, mi bawrhsâwmten an ngai zâwk a ni. Mi felte lam tûr ni lovin mi sualte lam tûra lo kal ka ni zâwk,” a ti a.

Chaw nghei chungchâng

(Mt. 9:14-17; Lk. 5:33-39)

18Johana zirtîrte leh Farisai-te chaw nghei ni chuan tute emaw an lo kal a, a hnênah, “Engati nge Johana zirtîrte leh Farisai zirtîrten chaw an nghei a, i zirtîrte lêmin an nghei ve loh?” an rawn ti a. 19Isuan, “An zîngah moneitu a awm chhûng chuan mo hruaitute chuan chaw an nghei ngai em ni? Moneitu chu an awmpui chhûng chu chaw an nghei ngai lo. 20Moneitu chu an hnên ata hruai bo hun a la awm ang a, chumi hunah erawh chuan an la nghei ve ang. #Lk. 17:22.

21“Tu man puan hlui, puan thar la sûk lohvin an bel ngai lo, bel ta sela, a thar chuan puan hlui chu a kai ṭet ang a, a thlêr chu a nasa lehzual ang. 22Uain thar pawh tu man savun ip hluiah an thun ngai lo, thun ang sela, uain chuan savun ip chu a tâwn keh ang a, uain chu a bua ang a, savun ip pawh chu a chhia ang; uain thar chu savun ip tharahte an thun zâwk ṭhîn,” a ti a.

Sabat nia buh vui thliah

(Mt. 12:1-8; Lk. 6:1-5)

23Sabat ni vawi khat chu buhpui hmunahte an kal tlang a, a zirtîrte chuan kal pahin a vuite chu an thliak a. #Deut. 23:25. 24Farisai-te chuan a hnênah, “En teh, engtizia nge sabat nia tih thiang lo an tih ni?” an ti a. 25Ani chuan, “Rilṭâma ei tûr an neih loh laia Davida leh a ṭhiante thil tih kha in chhiar ngai na nge?#1 Samu. 21:1-6. 26Abiathara Puithiam lalber a nih laia Pathian ina a luha, puithiamte chauh ei thian chhangdah chu a ei a, a ṭhiante pawh a pêk ve thu kha?” a ti a. #Lev. 24:9. 27Amah vêkin, “Sabat hi mihring tâna siam a ni a, mihring hi sabat tâna siam a ni lo. #Exod. 23:12; Deut. 5:14. 28Tichuan, Mihring Fapa hi sabat chungah lam pawh hian Lal a ni,” a ti a.

Currently Selected:

MARKA 2: MIZCLBSI

Highlight

Copy