MATHAIA 16

Thil mak ti tûrin Isua an phût

(Mk. 8:11-13; Lk. 12:54-56)

1Farisai-te leh Sadukai-te a hnênah an lo kal a, amah fiah nân vân ata chhinchhiahna thil mak entîr tûrin an rawn ngên a. #Mt. 12:38; Lk. 11:16. 2Ani erawh chuan a chhâng a, “Tlai lam a lo nihin, ‘khua a ṭha dâwn a ni ang, kâwl a sen êm mai,’ in ti ṭhîn. 3Zîngah pawh, ‘Vawiin chu khua a chhe dâwn a ni ang, kâwl a sen a, khua a dur êm mai,’ in ti ṭhîn a; khaw awmzia in hrethiam si a, hun chhinchhiahnate erawh chu in hrethiam thei si lo.#16:3 Mss ṭhenkhatah hêng châng hi a tel lo. 4Tûnlai mi, mi sual tak leh uire hmang takte hian chhinchhiahna thil mak an zawng ṭhîn a; nimahsela, Jona chhinchhiahna chauh lo chu chhinchhiahna thil mak rêng entîr an ni lo vang,” a ti a. Anni chu a kalsan a, a kal ta daih a. #Mt. 12:39; Lk. 11:29; Jon. 3:4,5.

Farisai leh Sadukai dawidim

(Mk. 8:14-21)

5Zirtîrten râl lehlam an thlen chuan chhang an lo ken theihnghilh a. 6Isuan an hnênah, “Farisai-te leh Sadukai-te dawidim lakah chuan invêng ula, fîmkhur rawh u,” a ti a.#Lk. 12:1. 7“Chhang kan keng hauh lo mai le,” tiin anmahni zîngah chuan an sawi ta a. 8Isuan chu chu a hriatin, “Rin tlêmte u, engati nge chhang in neih loh thu ngawt in buaipui tâk?#Mt. 6:30; 8:26; 14:31. 9Tûnah pawh in la hrethiam lo cheu maw? Mi sângnga tâna chhang panga leh a bâng in dah zât kha in la hre reng lâwm ni? #Mt. 14:17-21. 10Mi sângli tâna chhang pasarih leh a bâng in dah zât pawh kha? #Mt. 15:34-38. 11Chhang thu in hnênah ka sawi lo tih engtizia nge in hriat loh? Farisai-te leh Sadukai-te dawidim lakah erawh chuan fîmkhur rawh u,” a ti a. 12Chu veleh, chhang#16:12 Mss ṭhenkhatah ‘chhang’ tih a tel lo. dawidim lakah ni lovin, Farisai-te leh Sadukai-te zirtîrna laka fîmkhur tûrin anmahni a hrilh a ni tih an hre ta a.

Peteran Isua nihna a puang

(Mk. 8:27-30; Lk. 9:18-21)

13Isuan Filipa Kaisari bial a lo thlen chuan, “Miten Mihring Fapa hi tu nge a ni an tih?” tiin a zirtîrte chu a zâwt a. 14Anni chuan, “Ṭhenkhatin, ‘Baptistu Johana,’ an ti a, ṭhenkhatin, ‘Elija,’ an ti a, ṭhenkhatin ‘Jeremia emaw, zâwlnei tu-a emaw,’ an ti,” tiin an chhâng a. #Mt. 14:1,2; Mk. 6:14,15; Lk. 9:7,8; Jn. 1:21. 15Ani chuan an hnênah, “A nih nangnin tu nge nia mi hriat?” a ti a. 16Simon Petera chuan a chhâng a, “Krista, Pathian nung Fapa chu i ni e,” a ti a.#Jn. 6:68,69. 17Isuan a hnênah, “Simon Barjona, i nihlawh e, mihringin an hrilh lo che a, ka Pa vâna miin a hriattîr che a ni zâwk e. #1 Kor. 15:50; Gal. 1:16; Efe. 6:12; Heb. 2:14. 18Tin, nang, Petera i ni tih ka hrilh bawk a che; he lungpui chungah hian ka kohhran ka rem chho vang a, mitthi khaw kulh kawngkhârte chuan a ngam lo vang. 19Vânram chabite ka pe ang che a, lei chungah eng pawh i phuar#16:19 ‘khap... phal’ tih theih bawk a ni. apiang vânah phuar a ni ang a, lei chungah eng pawh i phelh apiang vânah phelh a ni ang,” a ti a. #Mt. 18:18; Jn. 20:23; Isa. 22:22; Thup. 1:18. 20Chumi zawhah chuan Krista a ni tih tu mah hrilh lo tûrin a zirtîrte chu a ti tlat a.

Isuan a tuar tûr thu a sawi

(Mk. 8:31—9:1; Lk. 9:22-27)

21Chumi a chinah chuan Isuan Jerusalem-a a kal tûr thu te, upate, puithiam lalte leh Dân zirtîrtute lakah thil tam tak a tuar tûr thu te, tihhluma a awm tûr leh ni thum ni-a kaihthawha a awm tûr thu te zirtîrte chu a hriattîr ṭan ta a. 22Peteran ani chu a hruai hrang a, “Lalpa, ni lul lo ve; chûng chu i chungah thleng tawp suh se,” tiin a zilhhau ta a. 23Ani erawh chuan Petera hnênah, “Setan, kal bo daih rawh, ka tân tlûkna i ni, Pathian duh dâna ngaihtuah lovin, mihring duh dânin i ngaihtuah a nih hi,” a ti a. #Mt. 4:10.

24Isuan a zirtîrte hnênah chuan, “Tu pawh mi zui duh chuan, mahni inngaihtuah chang lovin, mahni kraws puin mi zui rawh se. #Mt. 10:38; Lk. 14:27. 25Tu pawh mahni nun humhim tum chuan an chân ang a, tu pawh keimah avânga nun chân chuan an hmu ang. #Mt. 10:39; Lk. 17:33; Jn. 12:25. 26Miin khawvêl hi a pumin nei sela, a nun chân si se, a tân sâwtna eng nge awm ang? A nih leh, miin a nun aiah eng nge a pêk ang? 27Mihring Fapa hi vântirhkohte nên, a Pa ropuina nên a lo kal dâwn si a; chumi hunah chuan mi tin an thiltih ang zêlin a rûl ṭheuh vang. #Mt. 25:31; Sam. 62:12; Rom. 2:6; Thup. 22:12. 28Thu dik ka hrilh a che u, heta dingho ṭhenkhat hi, Mihring Fapa a rama lo kal an hmuh hma chu thi lo tûr an awm,” a ti a.

Currently Selected:

MATHAIA 16: MIZCLBSI

Highlight

Copy